અમેરિકાના પેનસિલ્વેનિયાની લેન્કેસ્ટર કાઉન્ટીમાં ગત સપ્તાહે એક માર્ગ અકસ્માતમાં એક ગુજરાતી સહિત બે ઈન્ડિયન સ્ટૂડન્ટ્સના મોત થઈ ગયા છે જ્યારે એક યુવક ઘવાયો છે. મૃતક 23 વર્ષીય સૌરવ પ્રભાકર અને 20 વર્ષીય માનવ પટેલ ઓહાયોમાં ક્લીવલેન્ડ સ્ટેટ યુનિવર્સિટીના સ્ટૂડન્ટ્સ હતા. પોલીસના જણાવ્યા મુજબ, મે 10એ લેન્કેસ્ટર કાઉન્ટીના પેનસિલ્વેનિયા ટર્નપાઈક પર તેમની કાર રસ્તા પરથી ઉતરી ગઈ અને એક ઝાડ સાથે અથડાયા બાદ પુલ સાથે ટકરાઈ ગઈ હતી.
ન્યૂયોર્કમાં સ્થિત કોન્સુલેટ જનરલ ઓફ ઈન્ડિયાએ આ ઘટના પર શોક વ્યક્ત કર્યો છે અને આ દુ:ખની ઘડીમાં શોકગ્રસ્ત પરિવારોને મદદનું આશ્વાસન આપ્યું છે. વધુમાં જણાવાયું છે કે, આ મુશ્કેલ સમયમાં અમારી સંવેદના અને પ્રાર્થનાઓ તેમના પરિવારોની સાથે છે. કોન્સ્યુલેટ પરિવારોના સંપર્કમાં છે અને તેમને શક્ય તમામ મદદનું આશ્વાસન અપાયું છે.
પેન્સિલવેનિયા પોલીસે જણાવ્યું હતું કે,શનિવારે સવારે લગભગ 7 કલાકે ઈસ્ટ કોકેલિકો ટાઉનશિપમાં રીડિંગ ઈન્ટરચેન્જ પાસે પૂર્વની તરફ જતી લેન પર થયો, જ્યારે વાહન ટર્નપાઈકથી દૂર એક ઝાડ સાથે અથડાઈ ગયું અને પછી એક પુલ સાથે જઈને ટકરાયું. લેન્કેસ્ટર ઓનલાઈનના રિપોર્ટ મુજબ, સૌરવ પ્રભાકર કાર ચલાવી રહ્યો હતો. જ્યારે માનવ પાછળની સીટમાં બેઠો હતો.
સૌરવ અને માનવના ઘટનાસ્થળે જ મોત થઈ ગયા હતા. લેન્કેસ્ટર કાઉન્ટી કોરોનર્સના રિપોર્ટમાં કહેવાયું છે કે, બંનેને ઘણી ઈજા થઈ હતી અને તેના કારણે તેમનું મોત થઈ ગયું. જ્યારે ડ્રાઈવરની બાજુમાં બેઠેલા અન્ય એક યુવકને ઈજાઓ થઈ છે. તેને રીડિંગ હોસ્પિટલ લઈ જવાયો છે. રિપોર્ટમાં કહેવાયું છે કે, ઘાયલ વ્યક્તિની સ્થિતિ અંગે કોઈ જાણકારી મળી નથી.