તાજેતરના દિવસોમાં બાળકો ગુમ થવાના અહેવાલો વારંવાર સામે આવી રહ્યા છે. દરમિયાન, સુપ્રીમ કોર્ટે મંગળવારે કેન્દ્ર સરકારને દેશના વિવિધ ભાગોમાં બાળકો ગુમ થવાની ઘટનાઓ પાછળ કોઈ દેશવ્યાપી ગેંગ કે રાજ્ય-વિશિષ્ટ જૂથનો હાથ છે કે કેમ તેની તપાસ કરવા જણાવ્યું હતું. ન્યાયાધીશ બી.વી. નાગરત્ના અને ઉજ્જવલ ભુયાનની બેન્ચે જણાવ્યું હતું કે આ ઘટનાઓમાં કોઈ ચોક્કસ પેટર્ન છે કે તે રેન્ડમ ઘટનાઓ છે તે નક્કી કરવું મહત્વપૂર્ણ છે. તેમણે કેન્દ્ર સરકારને તમામ રાજ્યોમાંથી ડેટા એકત્રિત કરવા અને તેનું વિશ્ર્લેષણ કરવાનો નિર્દેશ આપ્યો.
કેન્દ્રનું પ્રતિનિધિત્વ કરતા એડિશનલ સોલિસિટર જનરલ ઐશ્વર્યા ભાટીએ જણાવ્યું હતું કે કેટલાક રાજ્યોએ ગુમ થયેલા બાળકો અને સંબંધિત કાર્યવાહીથી જોડાયેલો ડેટા પૂરો પાડ્યો છે, પરંતુ લગભગ એક ડઝન રાજ્યોએ તેમનો ડેટા શેર કર્યો નથી. ભાટીએ દલીલ કરી હતી કે કેન્દ્ર સરકારને સંપૂર્ણ ડેટા પ્રાપ્ત થયા પછી જ વિશ્ર્લેષણ કરી શકાય છે.
તેમણે કહ્યું, અમે જાણવા માંગીએ છીએ કે ગુમ થયેલા બાળકોની આ ઘટનાઓ પાછળ કોઈ દેશવ્યાપી ગેંગ કે રાજ્ય-વિશિષ્ટ જૂથનો હાથ છે? શું આ ઘટનાઓ પાછળ કોઈ ચોક્કસ પેટર્ન છે, કે આ ફક્ત રેન્ડમ ઘટનાઓ છે? સુપ્રીમ કોર્ટે એડિશનલ સોલિસિટર જનરલ ઐશ્વર્યા ભાટીને સૂચન કર્યું હતું કે આવી ઘટનાઓ માટે કોણ જવાબદાર છે તે નક્કી કરવા માટે બચાવેલા બાળકોનો ઇન્ટરવ્યુ લેવો જોઈએ. બેન્ચે એવા રાજ્યોની ટીકા કરી હતી જેમણે ડેટા પૂરો પાડ્યો નથી. તેમાં કહેવામાં આવ્યું હતું કે જો જરૂૂરી હોય તો તે કડક આદેશો જારી કરી શકે છે. વરિષ્ઠ વકીલ અપર્ણા ભટ્ટે દલીલ કરી હતી કે કેન્દ્ર સરકારે પહેલ કરી છે અને તમામ રાજ્યોને ડેટા પૂરો પાડવાનો નિર્દેશ આપ્યો છે.
સુપ્રીમ કોર્ટની બેન્ચ ગુડિયા સ્વયંસેવક સંસ્થાન નામના NGO દ્વારા દાખલ કરાયેલી જાહેર હિતની અરજી પર સુનાવણી કરી રહી હતી, જેમાં અનેક રાજ્યોમાં ગુમ થયેલા બાળકોની સંખ્યામાં સતત વધારો થયો છે.