ગયા મહિને 28 ફેબ્રુઆરીના રોજ ઇઝરાયલ અને યુનાઇટેડ સ્ટેટ્સે સંયુક્ત રીતે ઇરાન પર હુમલો કર્યો અને ત્યારબાદ ઇરાન અને ઇઝરાયલ અને યુનાઇટેડ સ્ટેટ્સ વચ્ચે યુદ્ધ શરુ થયું તે હજુ ચાલુ છે. આ તણાવને ધ્યાનમાં રાખીને રક્ષામંત્રી રાજનાથ સિંહે દિલ્હીમાં એક મહત્વપૂર્ણ હાઈ લેવલ બેઠકની અધ્યક્ષતા કરી હતી. આ બેઠકમાં ત્રણેય સશસ્ત્ર દળોના વડાઓ, સંરક્ષણ મંત્રાલયના ઉચ્ચ અધિકારીઓ અને મુખ્ય સુરક્ષા વિભાગોના પ્રતિનિધિઓએ હાજરી આપી હતી.
રક્ષામંત્રી રાજનાથ સિંહ દ્વારા બોલાવવામાં આવેલી ઉચ્ચ-સ્તરીય સમીક્ષા બેઠકમાં વર્તમાન સુરક્ષા પરિસ્થિતિની વિગતવાર ચર્ચા કરવામાં આવી અને ભારતની લશ્કરી તૈયારીઓનું વ્યાપક મૂલ્યાંકન કરવામાં આવ્યું. આ બેઠકનો મુખ્ય ઉદ્દેશ્ય યુદ્ધને કારણે બદલાતી આંતરરાષ્ટ્રીય પરિસ્થિતિ વચ્ચે ભારતની સંરક્ષણ તૈયારીનું મૂલ્યાંકન કરવાનો અને કોઈપણ સંભવિત પડકારો માટે વ્યૂહરચના ઘડવાનો હતો.
આ ઉચ્ચ-સ્તરીય બેઠકમાં સરહદ સુરક્ષા, દરિયાઇ સુરક્ષા, હવાઈ સંરક્ષણ અને ઓપરેશનલ તૈયારી જેવા મુખ્ય મુદ્દાઓ પર વિગતવાર ચર્ચા કરવામાં આવી. આ બેઠકમાં, રક્ષામંત્રીએ સ્પષ્ટપણે જણાવ્યું હતું કે ભારત તેની સાર્વભૌમત્વ અને રાષ્ટ્રીય હિતોનું રક્ષણ કરવા માટે સંપૂર્ણપણે તૈયાર છે અને કોઈપણ પરિસ્થિતિનો સામનો કરવાની ક્ષમતા ધરાવે છે. એ નોંધવું જોઈએ કે સશસ્ત્ર દળોને સતર્ક રહેવા અને જરૂૂર પડે તાત્કાલિક કાર્યવાહી માટે તૈયાર રહેવા સૂચના આપવામાં આવી હતી. આ બેઠક એવા સમયે થઈ હતી જ્યારે વૈશ્વિક સુરક્ષા પરિસ્થિતિ ઝડપથી બદલાઈ રહી છે, અને ભારત દરેક પરિસ્થિતિ પર નજીકથી નજર રાખી રહ્યું છે.