વહેલી સવારે 3 વાગ્યે ઓપરેશન, બંગાળના રાજકારણમાં ગરમાવો
પશ્ચિમ બંગાળની રાજનીતિમાં આજે વહેલી સવારે મોટો રાજકીય વિવાદ સર્જાયો, જ્યારે તૃણમૂલ કોંગ્રેસ (TMC)ના દિગ્ગજ નેતા અને મુખ્યમંત્રી મમતા બેનર્જીના ભત્રીજા અભિષેક બેનર્જીના કોલકાતાના કાલીઘાટ સ્થિત નિવાસસ્થાને પોલીસ દ્વારા રેડ પાડવામાં આવી હોવાનું સામે આવ્યું છે.
માહિતી અનુસાર, પોલીસ ટીમ વહેલી સવારે લગભગ 3 વાગ્યે અભિષેક બેનર્જીના ઘરે પહોંચી હતી. લાંબા સમય સુધી દરવાજો ન ખુલતા અધિકારીઓએ તાળું તોડીને ઘરમાં પ્રવેશ કર્યો અને સમગ્ર ઘરની તપાસ હાથ ધરી હતી. ઘટનાની જાણ થતાં જ પશ્ચિમ બંગાળના પૂર્વ મુખ્યમંત્રી મમતા બેનર્જી પણ તાત્કાલિક સ્થળ પર પહોંચી ગયા હતા. સ્થાનિક સૂત્રોના જણાવ્યા મુજબ પોલીસ સાથે મહિલા અધિકારીઓ અને સુરક્ષા દળના જવાનો પણ હાજર હતા. પોલીસ અધિકારીઓએ શરૂૂઆતમાં ઘરમાં રહેલા લોકોને અવાજ કરી દરવાજો ખોલવા કહ્યું હતું. જોકે લાંબા સમય સુધી કોઈ પ્રતિસાદ ન મળતાં અધિકારીઓએ તાળું તોડવાનો નિર્ણય લીધો હતો.
ત્યારબાદ લગભગ પાંચ કલાક સુધી સમગ્ર ઘર અને પરિસરની તપાસ કરવામાં આવી હતી. ઘરની બહાર Central Forcesના જવાનો પણ મોટી સંખ્યામાં તૈનાત કરવામાં આવ્યા હતા, જેના કારણે સમગ્ર વિસ્તાર High Security Zone માં ફેરવાઈ ગયો હતો.
પોલીસ કાર્યવાહી પૂર્ણ થયા બાદ અભિષેક બેનર્જી ઘરની બહાર આવ્યા અને મીડિયા સાથે વાત કરતાં જણાવ્યું કે, “પોલીસે તાળું તોડીને ઘરમાં પ્રવેશ કર્યો અને સમગ્ર ઘરની તપાસ કરી. દરેક ઘટનાનો Record ઉપલબ્ધ છે.” તેમણે વધુ કોઈ વિગતવાર નિવેદન આપ્યું નહોતું, પરંતુ આ કાર્યવાહી રાજકીય વર્તુળોમાં ચર્ચાનો મુખ્ય વિષય બની ગઈ છે. હાલ સુધી પોલીસ અથવા રાજ્ય સરકાર તરફથી સત્તાવાર રીતે સ્પષ્ટ કરવામાં આવ્યું નથી કે કયા કેસના સંદર્ભમાં આ કાર્યવાહી કરવામાં આવી હતી. સૂત્રો અનુસાર સાલબોની પોલીસ સ્ટેશન (Salboni Police Station)ની ટીમ આ કાર્યવાહી માટે પહોંચી હતી. જોકે કેસની વિગતો જાહેર કરવામાં આવી નથી.
રાજકીય નિરીક્ષકોનું માનવું છે કે આ ઘટના પશ્ચિમ બંગાળની રાજનીતિમાં આગામી દિવસોમાં વધુ ગરમાવો લાવી શકે છે. એક તરફ TMC આ કાર્યવાહી પાછળ રાજકીય હેતુઓ હોવાનો આરોપ મૂકી શકે છે, જ્યારે બીજી તરફ તપાસ એજન્સીઓ પોતાના કાનૂની અધિકાર મુજબ કાર્યવાહી થઈ હોવાનો દાવો કરી શકે છે. હાલ સમગ્ર મામલાને લઈને સત્તાવાર વિગતોની રાહ જોવામાં આવી રહી છે.
પોલીસે ઘરેથી કોઈ વસ્તુ જપ્ત કરી છે કે નહીં, તેની માહિતી હજુ સુધી બહાર આવી નથી. સાથે જ તપાસ કયા કેસમાં ચાલી રહી છે તે અંગે પણ સત્તાવાર સ્પષ્ટતા બાકી છે. પરંતુ વહેલી સવારે થયેલી આ રેડે પશ્ચિમ બંગાળના રાજકીય માહોલમાં ભારે ચર્ચા જગાવી દીધી છે અને આગામી દિવસોમાં આ મુદ્દે વધુ મોટા ખુલાસા થવાની શક્યતા વ્યક્ત કરવામાં આવી રહી છે.
