હિંસા સાથે સંકળાયેલા વિરોધ પ્રદર્શનમાં સામેલ લોકોને સરકારી નોકરી નહીં મળે

ઉત્તર પ્રદેશમાં વિરોધ પ્રદર્શનો કે હિંસક આંદોલનોમાં ભાગ લેનારા ઉમેદવારો માટે એક નવો આદેશ જારી કરવામાં આવ્યો છે. આ આદેશ મુજબ, જો કોઈ વ્યક્તિ યુપીમાં હિંસા સાથે સંકળાયેલા કોઈ વિરોધ પ્રદર્શનમાં ભાગ લે છે, તો તે સરકારી નોકરી માટે અયોગ્ય ઠરશે. યુપીમાં અરજદારો માટેની ચારિત્ર્ય ચકાસણી નીતિને વધુ કડક બનાવવામાં આવી છે. જોકે નીતિમાં સ્પષ્ટતા કરવામાં આવી છે કે માત્ર રાજકીય વિચારધારાના આધારે કોઈ વ્યક્તિને અયોગ્ય ગણવામાં આવશે નહીં, પરંતુ કોઈપણ પ્રકારના હિંસક વિરોધ પ્રદર્શનમાં ભાગ લેવો એ સરકારી નોકરી મેળવવાની તેમની તકોમાં અવરોધ બની શકે છે.

આ આદેશ ઉત્તર પ્રદેશના તમામ સરકારી વિભાગો, નિગમો અને સ્થાનિક સંસ્થાઓમાં ભરતી માટે ચારિત્ર્યની વધુ કડક ચકાસણી ફરજિયાત બનાવે છે. આ સૂચનાઓ નિમણૂક વિભાગના અગ્ર સચિવ એમ. દેવરાજે જારી કરી છે. આદેશમાં સ્પષ્ટ કરવામાં આવ્યું છે કે માત્ર એફઆઈઆર (FIR) નોંધાવી દેવાથી કે તપાસ ચાલુ હોવાથી ઉમેદવાર આપોઆપ અયોગ્ય બની જતા નથી; પરંતુ, તેનાથી એક ઔપચારિક તપાસ પ્રક્રિયા શરૂૂ થશે. પોલીસે 30 દિવસની અંદર ચકાસણી અહેવાલ (વેરિફિકેશન રિપોર્ટ) સબમિટ કરવાનો રહેશે. નોંધનીય છે કે, ચકાસણીની આ જોગવાઈઓ હાલમાં સરકારી સેવામાં કાર્યરત વ્યક્તિઓને લાગુ પડશે નહીં.

આદેશમાં વધુમાં જણાવવામાં આવ્યું છે કે, આ નિયમો એવા સંગઠનો સાથે સંકળાયેલા વ્યક્તિઓને લાગુ પડશે જે હિંસા દ્વારા પ્રસ્થાપિત વ્યવસ્થાને બદલવા માંગે છે. આવી વ્યક્તિઓને સરકારી નોકરી માટે અયોગ્ય ગણવામાં આવશે. 21 વર્ષની ઉંમર પછી અને પૃષ્ઠભૂમિ તપાસ (બેકગ્રાઉન્ડ ચેક)ની તારીખના ત્રણ વર્ષની અંદર આવી કોઈપણ પ્રવૃત્તિમાં ભાગ લેવો એ એવો પુરાવો માનવામાં આવશે કે વ્યક્તિ હજુ પણ આવી પ્રવૃત્તિઓમાં સક્રિય છે. અલબત્ત, જો તે સમયગાળા દરમિયાન વ્યક્તિના વર્તન કે વલણમાં બદલાવ આવ્યો હોવાના નક્કર અને સકારાત્મક પુરાવા હોય, તો તે અલગ બાબત છે.

જો ઉત્તર પ્રદેશમાં સરકારી નોકરીની તૈયારી કરતા યુવાનો કોઈ એવા વિરોધ પ્રદર્શનમાં ભાગ લે છે જે હિંસક બની જાય છે, તો સમગ્ર મામલો પોલીસના અધિકારક્ષેત્રમાં આવી જશે. પોલીસ ઈચ્છે તો, વ્યક્તિના ચારિત્ર્ય અંગે પ્રતિકૂળ પ્રમાણપત્ર (એડવર્સ કેરેક્ટર સર્ટિફિકેટ) જારી કરી શકે છે, જેનાથી તે વ્યક્તિ સરકારી નોકરી મેળવવા માટે અયોગ્ય બની જશે. ટૂંકમાં, યુવાનોને સલાહ આપવામાં આવી છે કે તેઓ આવા વિરોધ પ્રદર્શનોથી દૂર રહે; અન્યથા, આમ કરવાથી સરકારી નોકરી મેળવવાનું તેમનું સ્વપ્ન કાયમ માટે તૂટી શકે છે.