દેશના નવા મુખ્ય માહિતી કમિશનરની પસંદગી માટે આજે પસંદગી સમિતિની એક મહત્વપૂર્ણ બેઠક યોજાઈ હતી. વડા પ્રધાન નરેન્દ્ર મોદી, ગૃહ પ્રધાન અમિત શાહ અને લોકસભામાં વિરોધ પક્ષના નેતા રાહુલ ગાંધીએ બેઠકમાં હાજરી આપી હતી. આ પેનલ કેન્દ્રીય માહિતી કમિશન (CIC) માં આઠ ખાલી જગ્યાઓ ભરવા માટે માહિતી કમિશનરોની નિમણૂક અંગે પણ નિર્ણય લેશે. સરકારે અગાઉ સુપ્રીમ કોર્ટને જાણ કરી હતી કે ટોચના હોદ્દા માટે અધિકારીઓની પસંદગી વડા પ્રધાનની આગેવાની હેઠળની સમિતિ દ્વારા કરવામાં આવશે.
માહિતી અધિકાર કાયદાની કલમ 12(3) હેઠળ, વડા પ્રધાન એક સમિતિની અધ્યક્ષતા કરે છે, જેમાં વિરોધ પક્ષના નેતા અને વડા પ્રધાન દ્વારા નિયુક્ત કેન્દ્રીય પ્રધાનનો પણ સમાવેશ થાય છે, જે મુખ્ય માહિતી કમિશનર અને માહિતી કમિશનરોની નિમણૂક માટે નામોની પસંદગી અને ભલામણ કરે છે. છઝઈં કાયદા મુજબ, CICમાં એક મુખ્ય માહિતી કમિશનર અને દસ માહિતી કમિશનર હોય છે, જે છઝઈં અરજદારો દ્વારા તેમની અરજીઓ પર સરકારી અધિકારીઓ દ્વારા અસંતોષકારક આદેશો સામે દાખલ કરવામાં આવેલી ફરિયાદો અને અપીલોનો નિર્ણય લે છે.
CIC ની વેબસાઇટ અનુસાર, તેની પાસે 30,838 પેન્ડિંગ કેસ છે. તેની પાસે ફક્ત બે માહિતી કમિશનર, આનંદી રામલિંગમ અને વિનોદ કુમાર તિવારી બાકી છે, અને આઠ જગ્યાઓ ખાલી છે. હીરાલાલ સમરિયા છેલ્લા મુખ્ય માહિતી કમિશનર હતા, જેમણે 13 સપ્ટેમ્બરના રોજ 65 વર્ષની ઉંમર પૂર્ણ કર્યા પછી રાજીનામું આપ્યું હતું. તેમને 6 નવેમ્બર, 2023 ના રોજ મુખ્ય માહિતી કમિશનર પદ પર નિયુક્ત કરવામાં આવ્યા હતા.