કાલાવડ માર્કેટિંગ યાર્ડના ચેરમેન પદે મૌલિકભાઈ દિલીપભાઈ નથવાણીની સતત બીજી વખત સર્વાનુમતે વરણી થતાં ખેડૂતો, વેપારીઓ તેમજ શુભેચ્છકોમાં આનંદની લાગણી જોવા મળી હતી. તેમની પુન:વરણીને કૃષિ ક્ષેત્ર માટે વિશ્વાસ અને વિકાસના નવા અધ્યાય તરીકે જોવામાં આવી રહી છે.
મૌલિકભાઈ નથવાણીએ તેમના અગાઉના કાર્યકાળ દરમિયાન ખેડૂતોને વધુ સારી બજાર વ્યવસ્થા, પારદર્શક વહીવટ, ઝડપી હરાજી પ્રક્રિયા તેમજ યાર્ડમાં વિવિધ સુવિધાઓ ઉપલબ્ધ કરાવવા માટે નોંધપાત્ર કામગીરી કરી હતી. ખેડૂતોને તેમની કૃષિ ઉપજના યોગ્ય ભાવ મળે તેમજ વેપારીઓને સરળ વ્યવસાયિક વાતાવરણ મળી રહે તે માટે તેમણે સતત પ્રયત્નો કર્યા હતા. તેમના કાર્યકાળ દરમિયાન માર્કેટિંગ યાર્ડમાં વિકાસલક્ષી અનેક નિર્ણયો લેવામાં આવ્યા હતા, જેના કારણે ખેડૂતો અને વેપારીઓનો વિશ્વાસ વધુ મજબૂત બન્યો હતો.
સતત બીજી વખત ચેરમેન તરીકે પસંદગી થતાં મૌલિકભાઈ નથવાણીએ તમામ સભ્યો, ખેડૂતો અને વેપારીઓનો આભાર વ્યક્ત કર્યો હતો. તેમણે જણાવ્યું હતું કે, “મારા પર મુકવામાં આવેલા વિશ્વાસને હું સંપૂર્ણ નિષ્ઠા અને જવાબદારી સાથે નિભાવીશ. ખેડૂતોના હિતને સર્વોપરી રાખીને માર્કેટિંગ યાર્ડના સર્વાંગી વિકાસ માટે વધુ અસરકારક કામગીરી કરવામાં આવશે. પારદર્શિતા, વિકાસ અને ખેડૂતોને શ્રેષ્ઠ સુવિધાઓ આપવાનો અમારો સંકલ્પ યથાવત રહેશે.”
આ પ્રસંગે માર્કેટિંગ યાર્ડના ડિરેક્ટરો, વેપારી આગેવાનો, ખેડૂતો તેમજ વિવિધ સામાજિક અને રાજકીય આગેવાનોએ મૌલિકભાઈ નથવાણીને શુભેચ્છાઓ પાઠવી હતી.યાર્ડ ખાતે શુભેચ્છકોનો ધસારો જોવા મળ્યો હતો. ફૂલહાર પહેરાવી અને મીઠાઈ ખવડાવી શુભેચ્છાઓ પાઠવવામાં આવી હતી.
કાલાવડ માર્કેટિંગ યાર્ડ આગામી સમયમાં ખેડૂતોને આધુનિક સુવિધાઓ, પારદર્શક કામગીરી અને વધુ સશક્ત કૃષિ બજાર વ્યવસ્થા પૂરી પાડવાના ઉદ્દેશ સાથે આગળ વધશે તેવી આશા વ્યક્ત કરવામાં આવી હતી. મૌલિકભાઈ નથવાણીના અનુભવી નેતૃત્વ હેઠળ યાર્ડ વિકાસના નવા શિખરો સર કરશે તેવી ખેડૂતો અને વેપારીઓમાં આશાવાદી લાગણી જોવા મળી રહી છે.