પીએમ નિવાસસ્થાને ગૃહમંત્રી, રાજનાથ સિંહ અને બી.એલ. સંતોષની હાજરીમાં નામ ફાઇનલ; બે દિવસમાં જાહેર કરાશે
ભાજપે સંગઠનાત્મક ચૂંટણીઓને ધ્યાનમાં રાખીને, ગઇકાલે 16મી એપ્રિલના રોજ વડાપ્રધાન નિવાસસ્થાને એક મહત્વની બેઠક યોજાઈ હતી. વડાપ્રધાન નરેન્દ્ર મોદી ઉપરાંત ગૃહમંત્રી અમિત શાહ, સંરક્ષણ મંત્રી રાજનાથ સિંહ અને ભાજપના રાષ્ટ્રીય સંગઠન મંત્રી બીએલ સંતોષ હાજર રહ્યા હતા. પ્રધાનમંત્રી મોદીની આગેવાની હેઠળની આ બેઠકમાં અન્ય મુદ્દાઓની સાથોસાથ ભાજપના રાષ્ટ્રીય અધ્યક્ષની ચૂંટણી અંગે પણ ચર્ચા કરવામાં આવી હતી.
સૂત્રોનું કહેવું છે કે બેઠકમાં રાષ્ટ્રીય અધ્યક્ષની ચૂંટણીની સાથે ગુજરાત, ઉત્તર પ્રદેશ, મધ્ય પ્રદેશ સહિત ઘણા રાજ્યોના ભાજપના પ્રદેશ પ્રમુખોના નામો પર પણ ચર્ચા કરવામાં આવી હતી. આગામી 2 થી 3 દિવસમાં અડધો ડઝન રાજ્ય પ્રમુખોના નામ જાહેર થઈ શકે છે. આનો અર્થ એ થયો કે ભાજપ 18 કે 19 એપ્રિલ સુધીમાં ઘણા નવા પ્રદેશ પ્રમુખોની જાહેરાત કરી શકે છે. ઉપરાંત, ભાજપ 20 એપ્રિલ પછી ગમે ત્યારે તેના રાષ્ટ્રીય અધ્યક્ષની ચૂંટણીની જાહેરાત કરી શકે છે.
આ રીતે, ભારતીય જનતા પાર્ટીને ટૂંક સમયમાં એક નવા રાષ્ટ્રીય અધ્યક્ષ મળશે. આ પહેલા ગુજરાત, ઉત્તર પ્રદેશ, કર્ણાટક, તમિલનાડુ, પશ્ચિમ બંગાળ સહિત ઘણા રાજ્યોના પ્રદેશ પ્રમુખોના નામ જાહેર કરવામાં આવશે. રાષ્ટ્રીય અધ્યક્ષની પસંદગી માત્ર પક્ષ સંગઠનને નવી દિશા આપશે નહીં પરંતુ આગામી વિધાનસભા ચૂંટણીની રણનીતિમાં પણ ખૂબ જ મહત્વપૂર્ણ રહેશે.
આ સંગઠનાત્મક પરિવર્તન ભારતીય જનતા પાર્ટીની ચૂંટણી વ્યૂહરચના પર મોટી અસર કરી શકે છે. રાષ્ટ્રીય પ્રમુખની ચૂંટણી જાન્યુઆરીમાં થવાની હતી પરંતુ એપ્રિલનો અડધો ભાગ વીતી ગયો છે અને ચૂંટણી હજુ સુધી થઈ નથી. એવું માનવામાં આવે છે કે પ્રમુખની પસંદગીમાં એવા નેતાને પ્રાથમિકતા આપવામાં આવી રહી છે જે સંગઠનને મજબૂત બનાવી શકે.
એવી માહિતી પણ સામે આવી રહી છે કે ભારતીય જનતા પાર્ટીને નવો પ્રમુખ મળ્યા બાદ 50 ટકા રાષ્ટ્રીય મહાસચિવોને પણ દૂર કરવામાં આવશે. આ સાથે, યુવા નેતાઓને નવા પ્રમુખની ટીમમાં મહાસચિવ તરીકે સ્થાન આપી શકાય છે. આ ઉપરાંત, સરકારમાંથી કેટલાક નેતાઓને પણ સંગઠનમાં લાવી શકાય છે.