ભારત અને શ્રીલંકા વચ્ચે રમાઈ રહેલી પહેલી ટેસ્ટ મેચ ’સર’ રવિન્દ્ર જાડેજા માટે કાયમ યાદગાર બની ગઈ છે. ભલે આ મેચમાં જાડેજાના બેટમાંથી કોઈ મોટી ઇનિંગ્સ જોવા ન મળી હોય, પરંતુ બોલિંગમાં તેણે એવો કમાલ કરી દીધો છે કે તેનું નામ હવે ટેસ્ટ ક્રિકેટના મહાન ઓલરાઉન્ડરોના લિસ્ટમાં સુવર્ણ અક્ષરે લખાઈ ગયું છે. રવિન્દ્ર જાડેજા ટેસ્ટ ક્રિકેટમાં 4,000 રન અને 350 વિકેટનો જાદુઈ ડબલ ફિગર પાર કરનારો દુનિયાનો માત્ર ચોથો ઓલરાઉન્ડર બની ગયો છે.
17 ઓગસ્ટના રોજ, ભારત અને શ્રીલંકા વચ્ચેની પહેલી ટેસ્ટના ત્રીજા દિવસે, જાડેજાએ શ્રીલંકાની પહેલી ઇનિંગ્સમાં શાનદાર બોલિંગ કરતા બે વિકેટ પોતાના નામે કરી. તેણે ધનંજય ડી સિલ્વા અને કેસરા નુવંથાને પેવેલિયનનો રસ્તો બતાવ્યો. આ બે વિકેટ ઝડપવાની સાથે જ જાડેજાની ટેસ્ટ કરિયરની વિકેટોનો આંકડો 350 પર પહોંચી ગયો. અગાઉ ભારતીય ઇનિંગ્સમાં બેટિંગ કરતી વખતે જાડેજાએ માત્ર 13 રન બનાવ્યા હતા. આમ, બેટથી કોઈ ખાસ કમાલ ન કરી શકવા છતાં, તેણે બોલિંગથી ઇતિહાસના પાનામાં પોતાનું નામ નોંધાવી દીધું છે.
જાડેજા પહેલાં આખી દુનિયામાં માત્ર ત્રણ જ એવા ઓલરાઉન્ડર હતા, જેઓ ટેસ્ટ ક્રિકેટમાં 4,000 કે તેથી વધુ રન બનાવવાની અને સાથે 350 વિકેટ લેવાની ડબલ સિદ્ધિ મેળવી શક્યા હતા. આ લિસ્ટમાં ભારત લેજેન્ડ કપિલ દેવ, ઇંગ્લેન્ડના ઈયાન બોથમ અને ન્યુઝીલેન્ડના ડેનિયલ વેટોરીનું નામ સામેલ છે. કપિલ દેવ આ યાદીમાં સૌથી મોખરે છે, જેમણે ભારત માટે 131 ટેસ્ટ મેચમાં 5,248 રન બનાવ્યા છે અને 434 વિકેટ ઝડપી છે. ઈયાન બોથમે 102 ટેસ્ટ મેચમાં 5,200 રન અને 383 વિકેટ પોતાના નામે કરી છે. ડેનિયલ વેટોરીએ 113 ટેસ્ટ મેચમાં 4,531 રન અને 362 વિકેટ લીધી છે.
આ ક્લબમાં સામેલ થવું જ એક મોટી વાત છે, પણ જાડેજાની સિદ્ધિ સૌથી ખાસ એટલે બની જાય છે કારણ કે તેણે આ રેકોર્ડ માત્ર 90 ટેસ્ટ મેચ રમીને હાંસલ કર્યો છે. આ દિગ્ગજોની ક્લબમાં જાડેજા એકમાત્ર એવો ઓલરાઉન્ડર છે જેણે 100 થી પણ ઓછી ટેસ્ટ મેચ રમીને આ ડબલ ધમાકો કર્યો છે. 350 વિકેટનો આંકડો પાર કરીને જાડેજાએ ભારતીય બોલરોના લિસ્ટમાં પણ પોતાનું કદ વધારી દીધું છે. તે હવે ટેસ્ટ ક્રિકેટમાં 350 કે તેથી વધુ વિકેટ લેનારો પાંચમો ભારતીય બોલર બની ગયો છે. આ લિસ્ટમાં અનિલ કુંબલે (619 વિકેટ) ટોપ પર છે.
ત્યારબાદ રવિચંદ્રન અશ્વિન (537 વિકેટ), કપિલ દેવ (434 વિકેટ) અને હરભજન સિંહ (417 વિકેટ) નો નંબર આવે છે. આ ઉપરાંત, આખા વિશ્વના ડાબોડી (Left-arm) સ્પિનરોની વાત કરીએ તો, જાડેજા 350 ટેસ્ટ વિકેટ લેનારો દુનિયાનો માત્ર ત્રીજો ડાબોડી સ્પિનર છે.
સૌથી વધુ ટેસ્ટ વિકેટ લેનારા ડાબોડી સ્પિનરો
433 વિકેટ – રંગના હેરાથ
362 વિકેટ – ડેનિયલ વેટોરી
350 વિકેટ – રવિન્દ્ર જાડેજા
297 વિકેટ – ડેરેક અંડરવુડ
271 વિકેટ – તૈજુલ ઇસ્લામ
