ખતરનાક ગન પાઉડરથી સીમા પરના ગામડાઓમાં સર્જી વિનાશલીલા
દક્ષિણ લેબનોનના સરહદી ગામોમાં ’ડોમિસાઈડ’ની વ્યૂહરચના હજારો લોકો વિસ્થાપિત અને શાંતિ વાટાઘાટો નિષ્ફળ જતાં મધ્ય પૂર્વમાં યુદ્ધના વાદળો વધુ ઘેરા બન્યા છે. યુદ્ધ પહેલાં ઇઝરાયેલે જાહેર કરેલા લિટાની નદી સુધીના નવા નકશા પ્રમાણેનો એજન્ડા આગળ વધારવા ભીષણ હુમલાઓ ચાલુ કર્યા છે.
બેરૂૂત દક્ષિણ લેબનોનના યુદ્ધના મેદાનમાંથી એવી તસવીરો સામે આવી રહી છે જે જોઈને દુનિયા સ્તબ્ધ છે. ઇઝરાયલી સૈન્ય પર આરોપ છે કે તેઓ તૈબેહ, નકુરા અને દેઇર સેર્યાન જેવા સરહદી ગામોને નકશા પરથી ભૂંસી રહ્યા છે. ઇઝરાયલના સંરક્ષણ પ્રધાન ઇઝરાયલ કાત્ઝે સ્પષ્ટ સંકેત આપ્યો છે કે તેઓ આ વિસ્તારમાં ’રાફા મોડેલ’ લાગુ કરી રહ્યા છે, જેમાં ઘરોમાં વિસ્ફોટકો ગોઠવી રિમોટ કંટ્રોલથી આખા મહોલ્લા ઉડાવી દેવામાં આવે છે. નિષ્ણાતો તેને ’ડોમિસાઈડ’ (વ્યવસ્થિત આવાસ વિનાશ) કહી રહ્યા છે, જેનો હેતુ ભવિષ્યમાં અહીં માનવ વસવાટ અશક્ય બનાવવાનો છે. ઇઝરાયલનો દાવો છે કે આ ઘરો નીચે હિઝબુલ્લાહની ટનલ અને હથિયારોના ભંડાર છે, જે તેની સુરક્ષા માટે મોટો ખતરો છે.
ભૌગોલિક દ્રષ્ટિએ ઇઝરાયલ હવે લિટાની નદી સુધીના વિસ્તારને પોતાના સંપૂર્ણ નિયંત્રણમાં લેવા માંગે છે. આ વ્યૂહાત્મક પગલા પાછળનો હેતુ એક ’સેફ્ટી બફર ઝોન’ બનાવવાનો છે, જેથી ઉત્તર ઇઝરાયલ પર હિઝબુલ્લાહના રોકેટ હુમલા રોકી શકાય. જોકે, આ સૈન્ય કાર્યવાહીમાં અત્યાર સુધીમાં 2,000 થી વધુ લોકોએ જીવ ગુમાવ્યા છે અને લાખો લોકો બેઘર થઈ ગયા છે. માનવીય સહાય પૂરી પાડતી સંસ્થાઓ ચેતવણી આપી રહી છે કે લિટાની નદી પરના મહત્વના પુલ તોડી પાડવામાં આવતા દક્ષિણ લેબનોન હવે બાકીના દેશથી અલગ પડી ગયું છે, જેના કારણે ત્યાં ફસાયેલા નાગરિકો માટે ખોરાક અને દવાની ભારે અછત સર્જાઈ છે.
આ શાંતિ વાટાઘાટો નિષ્ફળ જતાં હવે આ યુદ્ધ વધુ લાંબુ ખેંચાય અને ઈરાન-ઇઝરાયલ વચ્ચે સીધો સંઘર્ષ થાય તેવી ભીતિ વધી ગઈ છે. હાલમાં લેબનોનના લોકો માત્ર કાટમાળ વચ્ચે ઉભા રહીને વિશ્વ પાસે શાંતિની અપેક્ષા રાખી રહ્યા છે.