મધ્ય પૂર્વમાં ચાલી રહેલા તણાવ વચ્ચે એક મોટા અને સકારાત્મક સમાચાર સામે આવ્યા છે. ઇઝરાયલ અને લેબનોન નવેસરથી યુદ્ધવિરામ (Ceasefire) લાગુ કરવા માટે સહમત થયા છે. અમેરિકાની મધ્યસ્થીમાં યોજાયેલી વાટાઘાટોના ચોથા રાઉન્ડ બાદ બંને દેશો અંતે આ સમજૂતી પર પહોંચ્યા છે. યુદ્ધવિરામની સમજૂતી હેઠળ લેબનોનમાં પ્રાયોગિક ધોરણે કેટલાક સુરક્ષા ઝોન બનાવવામાં આવશે, જ્યાંથી હિઝબુલ્લાહના આતંકવાદીઓને સંપૂર્ણપણે બહાર રાખવામાં આવશે.
અમેરિકન વિદેશ વિભાગમાં થયેલી વાટાઘાટો બાદ જારી કરાયેલા સંયુક્ત નિવેદનમાં બંને પક્ષોએ જણાવ્યું હતું કે, આ પગલું વ્યાપક શાંતિ અને સુરક્ષા સમજૂતીની દિશામાં એક મહત્વપૂર્ણ પ્રગતિ છે. યુધ્ધવિરામની મુખ્ય શરતોમાં હિઝબુલ્લાહ દ્વારા ગોળીબાર સંપૂર્ણપણે બંધ કરવામાં આવશે, લિટ્ટાની નદીની દક્ષિણના તમામ વિસ્તારોમાંથી ઇઝરાયલના કાર્યકર્તાઓ અને હથિયારોની વાપસી કરવામાં આવશે, આ નવા સુરક્ષા વિસ્તારોનું સંપૂર્ણ નિયંત્રણ લેબનીઝ સેના(Lebanese Army) પાસે રહેશે, આ સુરક્ષા વિસ્તારોમાં હિઝબુલ્લાહની કોઈપણ પ્રકારની ગતિવિધિ પર સખત પ્રતિબંધ રહેશે નો સમાવેશ થાય છે.
આ કરારમાં ઈરાનને પણ આડકતરી રીતે સ્પષ્ટ સંદેશ આપવામાં આવ્યો છે. સંયુક્ત નિવેદનમાં ભારપૂર્વક જણાવાયું છે કે ઇઝરાયલ અને લેબનોન વચ્ચેના ભવિષ્યના સંબંધો તેમની સાર્વભૌમ સરકારો દ્વારા જ નક્કી કરવામાં આવશે. લેબનોનના ભવિષ્યને પ્રભાવિત કરવાના કોઈપણ રાજ્ય અથવા બિન-રાજ્ય તત્વોના પ્રયાસોને સંપૂર્ણપણે ફગાવી દેવામાં આવ્યા છે, જે સીધો જ હિઝબુલ્લાહના મુખ્ય સમર્થક ઈરાન તરફ ઈશારો કરે છે. અમેરિકાની મધ્યસ્થીથી થયેલી આ વાટાઘાટોને છેલ્લા ઘણા મહિનાથી ચાલી રહેલા તણાવને ઘટાડવાની દિશામાં એક મોટું પગલું માનવામાં આવે છે. જોકે, પ્રાદેશિક નિષ્ણાતોનું કહેવું છે કે આ સમજૂતીની સફળતા માટે હિઝબુલ્લાહની ભૂમિકા અને ઈરાનનું વલણ જ નિર્ણાયક સાબિત થશે.
