ભૂતપૂર્વ અને વર્તમાન અમેરિકી રાષ્ટ્રપતિ ડોનાલ્ડ ટ્રમ્પને આખરે વૈશ્વિક સ્તરે શાંતિ માટેનું એક મોટું સન્માન પ્રાપ્ત થયું છે, જોકે આ સન્માન જેની તેમણે આશા રાખી હતી તે નોબેલ શાંતિ પુરસ્કાર નથી, પરંતુ ફૂટબોલની વૈશ્વિક સંસ્થા ફિફા દ્વારા આપવામાં આવેલો નવો શાંતિ પુરસ્કાર છે. ગઇકાલે વોશિંગ્ટન ડી.સી.માં યોજાયેલા 2026 ફીફા વર્લ્ડ કપ ડ્રો સમારોહ દરમિયાન ટ્રમ્પને આ એવોર્ડ એનાયત કરવામાં આવ્યો હતો. આ પુરસ્કારની જાહેરાત બાદ તરત જ ફૂટબોલ જગત અને રાજકીય વર્તુળોમાં આશ્ચર્ય ફેલાયું હતું, કારણ કે તે ફિફાના પરંપરાગત રમતગમત પરના ધ્યાનથી નોંધપાત્ર રીતે અલગ હતો.
ટ્રમ્પને આ નવા રચાયેલા ફિફા પુરસ્કાર માટે મજબૂત દાવેદાર માનવામાં આવતા હતા, કારણ કે તેઓ નોબેલ શાંતિ પુરસ્કાર ન જીતી શક્યા. ફિફાના પ્રમુખ જિયાની ઈન્ફન્ટિનો (Gianni Infantino), જેઓ ટ્રમ્પના ગાઢ સહયોગી છે, તેમણે આ પુરસ્કાર એનાયત કર્યો હતો. પ્રમાણપત્રમાં ટ્રમ્પના વિશ્વભરમાં શાંતિ અને એકતાને પ્રોત્સાહન આપવા માટેના કાર્યોને માન્યતા આપવામાં આવી છે. ઈન્ફન્ટિનોએ ટ્રમ્પને સોનાનો મેડલ અને ટ્રોફી આપતાં કહ્યું કે, આ તમારો પુરસ્કાર છે, આ તમારો શાંતિ પુરસ્કાર છે.
આ સન્માન બદલ આભાર વ્યક્ત કરતાં ડોનાલ્ડ ટ્રમ્પે ટૂંકા સંબોધનમાં કહ્યું કે, આ ખરેખર મારા જીવનના મહાન સન્માનોમાંનું એક છે. ફિફાએ આ પુરસ્કારને શાંતિ માટે અપવાદરૂૂપ અને અસાધારણ કાર્યો કરનાર અને વિશ્વભરના લોકોને એક કરનાર વ્યક્તિઓને પ્રોત્સાહિત કરવા માટેનું એક પગલું ગણાવ્યું છે. જોકે, કેટલાક વિવેચકોએ આ પગલાને રાજકીય ગણાવ્યું છે, જે ટ્રમ્પને નોબેલ ન મળ્યા બાદ તેમના અહમને સંતોષવા માટે ઈન્ફન્ટિનો દ્વારા કરવામાં આવ્યું છે.