અમેરિકામાં 9/11ના આતંકવાદી હુમલા અંગે એક મોટો ખુલાસો થયો છે. ગુપ્ત ફાઇલોમાં ખુલાસો થયો છે કે એક શંકાસ્પદ વ્યક્તિ – જે અગાઉ FBI દ્વારા હાઇજેકર્સ સાથેના ઊંડા સંબંધોને કારણે પૂછપરછ કરવામાં આવી હતી – તેણે સાઉદી અધિકારીઓ સાથે પણ ગાઢ સંબંધો જાળવી રાખ્યા હતા. અગાઉ ન જોયેલા વીડિયો ફૂટેજનું વિશ્ર્લેષણ કરતા, રિપોર્ટમાં જણાવાયું છે કે શંકાસ્પદ વ્યક્તિ 9/11ના હુમલાના ઘણા સમય પછી અલ-કાયદાના આતંકવાદી અનવર અલ-અવલાકી સાથે પેઇન્ટબોલ રમતી જોવા મળી હતી.
વીડિયો ફૂટેજમાં ઓમર અલ-બયુમી અલ-કાયદાના આતંકવાદી અલ-અવલાકીને ભેટતો જોવા મળ્યો છે. વર્ષોથી, અલ-બયુમી અલ-કાયદા સાથે કોઈ સંબંધ હોવાનો ઇનકાર કરતો હતો. વધુમાં, બીજી એક વિડિઓ ક્લિપમાં બંને પુરુષો સાઉદી અરેબિયાના ઇસ્લામિક બાબતોના મંત્રાલયના એક અધિકારી સાથે સાન ડિએગો નજીક પેઇન્ટબોલ રમતા દેખાય છે.
રિપોર્ટ મુજબ, એફબીઆઈએ 2001 માં થયેલા 9/11 હુમલાના થોડા દિવસો પછી જ આ વિડિઓ ફૂટેજ મેળવ્યું હતું. આ ફૂટેજ 9/11 ના પીડિતોના પરિવારો દ્વારા સાઉદી અરેબિયા સામે 1 ટ્રિલિયનના મુકદ્દમામાં રજૂ કરાયેલા પુરાવાનો એક ભાગ છે. પરિવારોનો આરોપ છે કે ઓમર અલ-બયુમીએ હુમલા કરનારા 19 હાઇજેકરોમાંથી બેને મદદ કરી હતી. સાઉદી અરેબિયાએ વારંવાર કોઈપણ પ્રકારની સંડોવણીનો ઇનકાર કર્યો છે.
બાયુમી 1994 માં સાઉદી અરેબિયાથી સાન ડિએગો આવ્યો હતો, દેખીતી રીતે અંગ્રેજીનો અભ્યાસ કરવા માટે. કોર્ટના રેકોર્ડમાં પાછળથી જાણવા મળ્યું કે તેણે મોટાભાગે પોતાનો અભ્યાસ છોડી દીધો હતો અને તેના બદલે ધાર્મિક કાર્યક્રમોનું આયોજન કરવામાં વ્યસ્ત હતો. 1997 ના અંતમાં અથવા 1998 ની શરૂૂઆતમાં લેવાયેલા ફૂટેજમાં બાયોમી, ભાવિ અલ-કાયદા આતંકવાદી અવલાકી અને અન્ય લોકો લશ્કરી શૈલીની પેઇન્ટબોલ લડાઇમાં ભાગ લેતા દેખાય છે.
એક અહેવાલમાં જણાવાયું છે કે 11 સપ્ટેમ્બરના હુમલા પછી, બાયોમીની તપાસ કરી રહેલા એફબીઆઈ એજન્ટોને જાણ કરવામાં આવી હતી કે કેટલાક વ્યક્તિઓ આ સત્રોનો ઉપયોગ જેહાદ તાલીમ માટે કરતા હતા. અવલાકીની ઉગ્રવાદી પ્રવૃત્તિઓનો સંપૂર્ણ હદ પ્રકાશમાં આવે તે પહેલાં જ તેના અલ-કાયદાના વ્યક્તિઓ સાથે સંબંધો હતા.
