બન્ને મહાસત્તાએ વીટો વાપર્યો : અમેરિકાએ બહેરીન દ્વારા મૂકાવેલા ઠરાવનો ફરી ફિયાસ્કો
સંયુક્ત રાષ્ટ્ર સુરક્ષા પરિષદમાં ચીન અને રશિયાએ મંગળવારે એક મહત્વના ઠરાવ પર વીટો નાખીને વેપારી જહાજોના રક્ષણ માટેના પ્રયાસોને અટકાવી દીધા છે. બહેરીન દ્વારા આપવામાં આવેલા આ ઠરાવનો હેતુ સ્ટ્રેટ ઓફ હોર્મુઝમાં આંતરરાષ્ટ્રીય નૌકાયાનની સુરક્ષા અને સલામતી માટે દેશો વચ્ચે સંકલન વધારવાનો હતો. પરિષદના 15 સભ્યોમાંથી 11એ ઠરાવના પક્ષમાં મત આપ્યા હતા, જ્યારે ચીન અને રશિયાએ વિરોધમાં મત આપ્યો.
કોલંબિયા અને પાકિસ્તાને અનુપસ્થિતિ (abstain) કરી હતી. આ ઠરાવને અગાઉ અનેક વખત પાતળો કરવામાં આવ્યો હતો, જેમાં કોઈપણ પ્રકારની સૈન્ય કાર્યવાહી અથવા બળના ઉપયોગની અધિકૃતિને દૂર કરવામાં આવી હતી. તેના બદલે તેમાં માત્ર રક્ષણાત્મક પગલાં જેમ કે વેપારી જહાજોને એસ્કોર્ટ આપવા અને નૌકાયાનમાં અવરોધને રોકવા માટેના પ્રયાસોને પ્રોત્સાહન આપવામાં આવ્યું હતું.
ચીનના યુએન એન્વોય ફુ કોંગે કહ્યું કે આ ઠરાવ ઈરાન સામે પક્ષપાતી છે અને અમેરિકી ધમકીઓના સમયે તેને અપનાવવાથી ખોટો સંદેશ જાય. તેમણે ઉમેર્યું કે અમેરિકા ઈરાનની સંસ્કૃતિના અસ્તિત્વને જોખમમાં મૂકી રહ્યું છે. રશિયા અને ચીને મધ્ય પૂર્વની સ્થિતિ અને સમુદ્રી સુરક્ષા પર વિકલ્પિક ઠરાવનો પ્રસ્તાવ મૂક્યો છે.
અમેરિકી યુએન એમ્બેસેડર માઈક વોલ્ટ્ઝે આ વીટોને નવી નીચી સપાટી ગણાવીને તીવ્ર ટીકા કરી. તેમણે કહ્યું, રશિયા અને ચીને વૈશ્વિક અર્થતંત્રને બંદૂકની નોકે રાખનાર રેજીમની સાથે ઊભા રહ્યા છે. તેઓ ગલ્ફને ધમકી આપી રહ્યા છે અને પોતાના લોકો પર અત્યાચાર કરી રહ્યા છે. તેમણે જવાબદાર દેશોને હોર્મુઝની સુરક્ષા માટે અમેરિકા સાથે જોડાવા અપીલ કરી.
અમેરિકી રાષ્ટ્રપતિ ડોનાલ્ડ ટ્રમ્પે ઈરાનને મંગળવાર સાંજ સુધી જળમાર્ગ ખોલવાની અલ્ટીમેટમ આપી છે અને કહ્યું છે કે જો તેમ નહીં થાય તો એક સંપૂર્ણ સંસ્કૃતિ આજે રાત્રે મરી જશે. ઈરાન તરફથી કોઈ સકારાત્મક પ્રતિસાદ આવ્યો નથી. ઈરાનના યુએન એમ્બેસેડર અમીર સૈઈદ ઈરાવાનીએ વીટોને આવકાર્યો અને કહ્યું કે તેણે સુરક્ષા પરિષદને આક્રમકતાને વૈધાનિકતા આપવાથી બચાવી છે. બહેરીનના વિદેશ મંત્રી અબ્દુલ્લતીફ બિન રાશિદ અલ ઝયાનીએ નિરાશા વ્યક્ત કરી અને કહ્યું કે એક સ્થાયી સભ્યના નકારાત્મક મતને કારણે ઠરાવ અપનાવી શકાયો નથી.