અસંગઠિત યુવાનોના સ્વયંભૂ આંદોલનથી દેશની રાજનીતિમાં તોળાતું પરિવર્તન
ભાજપના ધારાસભ્યો, પ્રથમ હરોળના પદાધિકારીઓને યુવાનો સાથે સીધો સંવાદ સાધવા સૂચના, દરેક જિલ્લામાં વિશેષ યુવા ટીમો બનાવાશે
ભાષણબાજી અને ગુણગાન ગાવાના બદલે સોશિયલ મીડિયા મારફત યુવા પેઢી સાથે સંપર્કો બનાવી મંતવ્યો-સવાલો મેળવવાનો વ્યૂહ
તાજેતરમાં દિલ્હીના જંતર-મંતર ખાતે યોજાયેલા વિરોધ પ્રદર્શન દરમિયાન ‘Gen-Z’ (નવી પેઢીના યુવાનો) ની ભારી ઉપસ્થિતિ અને તેમના પ્રભાવે દેશના રાજકીય ચિત્રને એક નવો વળાંક આપ્યો છે. યુવાનોની બદલાતી આકાંક્ષાઓ અને તેમની વાતચીતની નવી શૈલીને ધ્યાનમાં રાખીને, દેશની શાસક ભારતીય જનતા પાર્ટી (BJP) એ પોતાની રાજકીય અને સંચાર વ્યૂહરચનામાં મોટો ફેરફાર કરવાનો નિર્ણય લીધો છે. હવે ભાજપ એકતરફી ભાષણો આપવાને બદલે યુવાનો સાથે સોશિયલ મીડિયા પર પારદર્શક અને દ્વિ-માર્ગી સંવાદ સ્થાપિત કરવા માટે સજ્જ થયું છે. અને ભાજપના તમામ ધારાસભ્યો તથા પ્રથમ હરોળના પદાધિકારીઓને જેન-ઝેડ સાથે સીધા સંવાદ માટે મેદાનમાં ઉતાર્યા છે. આ ઉપરાંત નીટની પરીક્ષામાં સફળ થયેલા છાત્રોના હકારાત્મક અભિપ્રાયો પણ લેવા સુચના આપી છે.
આ કેમ્પેઇન માટે સ્થાનિક યુવા ટીમો દેશના દરેક જિલ્લામાં વિશેષ યુવા ટીમો બનાવવામાં આવશે, જે સ્થાનિક સ્તરે યુવાનોના પ્રશ્નો સમજીને સંવાદ સાધશે. સરળ અને આકર્ષક ક્ધટેન્ટ જટિલ સરકારી ડેટા કે લાંબા ભાષણોને બદલે આકર્ષક રીલ્સ, પ્લેકાર્ડ્સ અને મીમ્સ દ્વારા નીતિઓ સમજાવાશે. દ્વિ-માર્ગી સંવાદ માત્ર સરકારી સિદ્ધિઓ ગણાવવાને બદલે યુવાનોના મંતવ્યો અને સવાલો મેળવવાની વ્યવસ્થા કરાશે.
તાજેતરમાં દેશભરમાં ચર્ચાયેલા NEET પેપર લીક વિવાદ અને તે પછી વિદ્યાર્થીઓ દ્વારા કરવામાં આવેલા આકરા વિરોધ પ્રદર્શનો પરથી બોધપાઠ લઈને ભાજપે તેની કોમ્યુનિકેશન સ્ટેટેજી બદલવાની પ્રક્રિયા ઝડપી બનાવી છે. પક્ષના ઉચ્ચ વર્તુળોનું માનવું છે કે આજનો યુવાન માત્ર એકતરફી ભાષણો કે સરકારી આંકડા સાંભળવામાં રસ ધરાવતો નથી. તેને પોતાના પ્રશ્નોના સીધા અને પારદર્શક જવાબો જોઈએ છે. જો સમયસર સચોટ માહિતી યુવાનો સુધી ન પહોંચે, તો વિરોધ પક્ષો કે અન્ય તત્વો ખોટી માહિતી ફેલાવીને વાતાવરણ ડહોળી શકે છે. તેથી, પાર્ટી યુવાનો સાથે એક મજબૂત અને ભૂલરહિત વાતચીત પદ્ધતિ સ્થાપિત કરી રહી છે જેથી કોઈપણ મુદ્દે ‘નેરેટિવ’ (વાર્તા) ના યુદ્ધમાં પાછળ ન પડી જવાય.
ભાજપના આંતરિક આકલન મુજબ, એકસ (અગાઉનું Twitterયિ) અને Facebook જેવા પરંપરાગત પ્લેટફોર્મ હવે Gen-Z વસ્તી વિષયક સુધી પહોંચવામાં એટલા અસરકારક રહ્યા નથી. આજનો યુવા વર્ગ નવીનતમ સોશિયલ મીડિયા એપ્સ પર વધુ સમય વિતાવે છે. પાર્ટી હવે આ નવી પ્લેટફોર્મ્સ તરફ વળી રહી છે. જે મુજબ Instagram થકી ટૂંકી રીલ્સ અને સ્ટોરીઝ દ્વારા આકર્ષક રીતે પહોંચવા, Snapchat થકી વિઝ્યુઅલ ક્ધટેન્ટ દ્વારા તરુણો અને યુવાનો સાથે દૈનિક કનેક્ટ બનાવવા અને Reddit થકી ઊંડાણપૂર્વકના વિષયો પર યુવાનોના સવાલોના જવાબો આપવા અને ચર્ચા કરવા પાર્ટી દ્વારા સુચના અપાઇ છે.
આ એપ્લિકેશન્સ પર સક્રિય વિશાળ યુવા વર્ગ સુધી પહોંચવા માટે ભાજપે વ્યાપક રોડમેપ તૈયાર કર્યો છે. પક્ષ માને છે કે યુવાનો સાથે તેમની જ ભાષામાં વાત કરી શકાય તો જ સંવાદ અસરકારક બને છે.
ખુદ વડાપ્રધાન મોદીના એક અઠવાડિયામાં Gen-Z સ્ટાઇલના પાંચ વીડિયોને 107 કરોડ વ્યૂ મળ્યા
નીટના પેપર લીક થયા બાદ દિલ્હીમાં ઉઠેલા યુવાનોના આંદોલનને દેશના રાજકારણની દિશા બદલી હોય તેમ ખુદ વડાપ્રધાન મોદીએ જેન-ઝેડના આંદોલન બાદ યુવાનોનો આક્રોશ ઠંડો પાડવા યુવાનોની સ્ટાઇલમાં જ અડધી રાત્રે શોર્ટ વીડીયો કિલપ બનાવી સોશિયલ મીડીયામાં વાયરલ કરવાનો વ્યુહ અપનાવ્યો છે. તા.23 જુલાઇથી શુક્રવારની રાત સુધીના એક અઠવાડીયામાં વડાપ્રધાનના પાંચ વીડીયો બનાવ્યા છે.
જેમાં મિલિયનોમાં વ્યુઅર્સ મળ્યા છે. આ પાંચ વીડીયોમાં કુલ 107 કરોડ વ્યુ મળ્યા બાદ ભાજપે આખી રણનીતિ બદલી નાખી છે. વડાપ્રધાનના વીડીયો વાયરલ કરવાનો સમય પણ ગણતરી પુર્વકનો નક્કી કરાયો હતો. રાત્રે 11 વાગ્યા પછી યુવા વર્ગ ‘ઓનસ્ક્રીન’ વધુ રહેતા હોવાથી વીડીયો વાયરલ કરવા માટે આ સમય નકકી કરાયો હોવાનું માનવામાં આવે છે.
