વિશ્વના સૌથી ધનિક વ્યક્તિઓમાંના એક અને એમેઝોનના સ્થાપક જેફ બેઝોસ ટૂંક સમયમાં તેની મંગેતર લોરેન સાંચેઝ સાથે લગ્ન કરવા જઈ રહ્યા છે. આ લગ્ન કોલોરાડોના એસ્પેન શહેરમાં યોજાશે અને તે અત્યાર સુધીના સૌથી ભવ્ય લગ્નોમાંથી એક માનવામાં આવે છે. અહેવાલો અનુસાર, આ લગ્નનો ખર્ચ લગભગ 600 મિલિયન ડોલર એટલે કે 5096 કરોડ રૂૂપિયા હોઈ શકે છે.
ન્યૂયોર્ક પોસ્ટ અનુસાર જેફ બેઝોસ અને લોરેન સાંચેઝના લગ્ન આવતા શનિવારે યોજાશે. જો કે, અત્યાર સુધી બેઝોસ અથવા સાંચેઝ તરફથી લગ્નની તારીખ અંગે કોઈ સત્તાવાર પુષ્ટિ કરવામાં આવી નથી.
આ ભવ્ય લગ્નમાં અનેક હાઈ-પ્રોફાઈલ હસ્તીઓ હાજરી આપે તેવી શક્યતા છે. મીડિયા રિપોર્ટ્સ અનુસાર, બિલ ગેટ્સ, લિયોનાર્ડો ડી કેપ્રિયો અને જોર્ડનની રાણી રાનિયા જેવી હસ્તીઓ લગ્નમાં હાજરી આપી શકે છે.
પાર્ટી આયોજકોએ આ ભવ્ય કાર્યક્રમની તૈયારી માટે નોન-ડિસ્કલોઝર એગ્રીમેન્ટ (ગોપનીયતા કરાર) પર હસ્તાક્ષર કરવાના હતા, જેથી લગ્ન સંબંધિત સંપૂર્ણ માહિતી સાર્વજનિક ન થઈ શકે. એસ્પેનમાં આયોજિત આ લગ્નને ખાસ બનાવવા માટે દુનિયાભરમાંથી પસંદગીની વસ્તુઓ લાવવામાં આવશે. એસ્પેનના લગ્નના આયોજકે જણાવ્યું હતું કે દંપતીની મનપસંદ કેક પેરિસથી લાવવામાં આવશે, હેર સ્ટાઈલિશ ન્યૂયોર્કથી લાવવામાં આવશે અને સમારંભમાં તેમનું મનપસંદ મ્યુઝિક બેન્ડ પરફોર્મ કરશે.
લોરેન સાંચેઝ પ્રખ્યાત પત્રકાર, ટીવી હોસ્ટ અને હેલિકોપ્ટર પાઇલટ છે. તેણી 2023 થી જેફ બેઝોસ સાથે સંબંધમાં છે. આ લગ્ન વિન્ટરલેન્ડ થીમ પર સજાવવામાં આવશે, જે આ સિઝનના સૌથી યાદગાર લગ્ન બની શકે છે. આ લગ્નમાં માત્ર જેફ બેઝોસની જીવનશૈલી અને પ્રાથમિકતાઓ દર્શાવવામાં આવશે નહીં, પરંતુ તેને યાદગાર બનાવવા માટે કરવામાં આવેલી વ્યવસ્થા લગ્ન સમારંભો માટે એક નવું ધોરણ સ્થાપિત કરી શકે છે.