જિલ્લામાં અસામાજિક પ્રવૃત્તિઓ, ગેરકાયદેસર હથિયારો, જુગાર અને પ્રોહિબિશન સંબંધિત ગુનાઓ સામે કડક કાર્યવાહી કરવા નાયબ પોલીસ મહાનિરીક્ષક રાજકોટ વિભાગ શ્રી નિર્લિપ્ત રાય (આઈપીએસ) તથા જિલ્લા પોલીસ અધિક્ષક ડો. રવિ મોહન સૈની (આઈપીએસ)ના માર્ગદર્શન હેઠળ સ્થાનિક ક્રાઇમ બ્રાન્ચ (એલ.સી.બી.) દ્વારા સઘન કામગીરી હાથ ધરવામાં આવી રહી છે.
આ અંતર્ગત એલ.સી.બી.ના પોલીસ ઇન્સ્પેક્ટર વી.બી. ચૌધરીના માર્ગદર્શન હેઠળ પોલીસ સબ ઇન્સ્પેક્ટર એ.વી. ખેર અને એલ.સી.બી. સ્ટાફે અસામાજિક તત્વોની હિલચાલ અંગે બાતમીઓ એકત્રિત કરી કાર્યવાહી હાથ ધરી હતી.
દરમિયાન એલ.સી.બી. સ્ટાફના દિલીપભાઈ તલાવડિયા, મયુરસિંહ પરમાર, યુવરાજસિંહ ઝાલા અને ઋષિરાજસિંહને મળેલી ચોક્કસ બાતમીના આધારે ધ્રોલ-રાજકોટ હાઇવે પર મોડપર ગામના પાટિયા નજીક વોચ ગોઠવવામાં આવી હતી. જ્યાંથી વિરેન્દ્રસિંહ કિશોરસિંહ જાડેજા (રહે. ખાખરાબેલા- તા. પડધરી, જી. રાજકોટ)ને ઝડપી લેવામાં આવ્યો હતો.
તપાસ દરમિયાન તેની પાસેથી લાયસન્સ કે પરવા વગર ની એક પિસ્ટલ કિંમત રૂૂ. 25,000 એક જીવતો કાર્ટૂસ કિંમત રૂૂ. 100 અને એક મોબાઇલ ફોન કિંમત રૂૂ.-5’000 મળી કુલ રૂૂ. 30,100નો મુદ્દામાલ કબજે કરવામાં આવ્યો હતો.
આ અંગે એલ.સી.બી.ના પોલીસ હેડ કોન્સ્ટેબલ હિતેન્દ્રસિંહ જાડેજાની ફરિયાદના આધારે પોલીસ સબ ઇન્સ્પેક્ટર એ.વી. ખેર દ્વારા હથિયાર ધારા હેઠળ ગુનો નોંધી કાયદેસરની કાર્યવાહી હાથ ધરવામાં આવી હતી. વધુ તપાસ માટે કેસ ધ્રોલ પોલીસ સ્ટેશનને સોંપવામાં આવ્યો છે. પ્રાથમિક તપાસમાં હથિયાર મધ્યપ્રદેશના અનિલ ભુરીયા નામના વ્યક્તિ દ્વારા સપ્લાય કરવામાં આવ્યું હોવાનું સામે આવ્યું છે. હાલ પોલીસ દ્વારા હથિયાર સપ્લાયરને ઝડપી પાડવા માટે તજવીજ હાથ ધરવામાં આવી રહી છે.
આ સમગ્ર કાર્યવાહી એલ.સી.બી.ના પોલીસ ઇન્સ્પેક્ટર વી.બી. ચૌધરીના માર્ગદર્શન હેઠળ પોલીસ સબ ઇન્સ્પેક્ટર એ.વી. ખેર તથા એલ.સી.બી. સ્ટાફ દ્વારા સફળતાપૂર્વક પાર પાડવામાં આવી હતી.