કાલે ભારત-ન્યૂઝીલેન્ડની ટેસ્ટમાં પુણેની પિચ બેટસમેનો માટે પડકાર

ભારત અને ન્યુઝીલેન્ડ વચ્ચે 16 ઓક્ટોબરથી ટેસ્ટ સિરીઝ શરૂ થઈ હતી. વરસાદથી પ્રભાવિત બેંગલુરુમાં રમાયેલી પ્રથમ ટેસ્ટમાં ન્યૂઝીલેન્ડે 8 વિકેટે જીત મેળવી હતી. હવે શ્રેણીની બીજી મેચ પૂણેમાં રમાવા જઈ રહી છે, જે 24 ઓક્ટોબરથી શરૂૂ થશે. પુણેનું આ મેદાન લગભગ 5 વર્ષ પછી ટેસ્ટ મેચનું આયોજન કરશે. એક તરફ, કિવી ટીમ શ્રેણીમાં 2-0થી અજેય લીડ લેવા માંગે છે, તો બીજી તરફ, ભારત પુનરાગમન કરી લેવલ ડ્રો કરવા માંગે છે.
પૂણેના મેદાનની પીચ કાળી માટીમાંથી તૈયાર કરવામાં આવી છે અને બેંગલુરુની સરખામણીમાં અહીં ઓછો ઉછાળો જોવા મળી શકે છે. આ પીચ પર રન બનાવવો ઘણો મુશ્કેલ સાબિત થશે અને સ્પિન બોલરોને ઘણી મદદ મળશે. જ્યારે ન્યુઝીલેન્ડના ફાસ્ટ બોલરો મેટ હેનરી, વિલિયમ ઓથરોર્કે અને ટિમ સાઉદીએ પ્રથમ મેચમાં પાયમાલી સર્જી હતી, ત્યારે ફાસ્ટ બોલરો પૂણેની પિચ પર સંઘર્ષ કરી શકે છે. પરંતુ જેમ જેમ મેચ આગળ વધે તેમ ફાસ્ટ બોલરોને રિવર્સ સ્વિંગ મળવાની અપેક્ષા છે.

વર્ષ 2017 માં, ભારત-ઓસ્ટ્રેલિયા મેચ પૂણેના સમાન મેદાન પર યોજાઈ હતી, જેમાં સ્પિનરોએ ચાર ઇનિંગ્સમાં કુલ 31 વિકેટ ઝડપી હતી. કાળી માટીથી બનેલી પીચ આ વખતે સ્પિન બોલિંગ માટે પણ યોગ્ય રહેશે. પ્રથમ ટેસ્ટમાં જ્યાં ભારતે રવિચંદ્રન અશ્વિન, રવિન્દ્ર જાડેજા અને કુલદીપ યાદવ રમ્યા હતા, આ વખતે ટીમ ઈન્ડિયા 4 સ્પિનરો સાથે જઈ શકે છે. નોંધનીય છે કે વોશિંગ્ટન સુંદરને છેલ્લી 2 ટેસ્ટ મેચ માટે ટીમ ઈન્ડિયાની ટીમમાં સામેલ કરવામાં આવ્યો છે.

જ્યારે જસપ્રિત બુમરાહ અને મોહમ્મદ સિરાજ પેસ આક્રમણ ચાલુ રાખી શકે છે. 6 બોલરો રમવાનો અર્થ એ નથી કે ભારતની બેટિંગ નબળી પડી જશે કારણ કે અશ્વિન, જાડેજા અને સુંદર ઓલરાઉન્ડર છે અને ભારતની બેટિંગને ઊંડાણ પ્રદાન કરશે.