બોલીવૂડની દુનિયામાંથી એક ખૂબ જ દુઃખદ સમાચાર સામે આવ્યા છે. પ્રખ્યાત અભિનેતા અચ્યુત પોટદારનું 91 વર્ષની વયે અવસાન થયું છે. 18 ઓગસ્ટના રોજ તેમને મુંબઈની એક હોસ્પિટલમાં દાખલ કરવામાં આવ્યા હતા, જ્યાં તેમણે અંતિમ શ્વાસ લીધા હતા. અભિનેતા વય સંબંધિત રોગોથી પીડાતા હતા. આજે તેમના અંતિમ સંસ્કાર કરવામાં આવશે. તેઓએ રાજકુમાર હિરાનીની સુપરહિટ ફિલ્મ 3 ઈડિયટ્સમાં કડક પરંતુ દિલથી નરમ પ્રોફેસરની ભૂમિકા ભજવીને દરેક ઘરમાં પોતાની ખાસ ઓળખ બનાવી હતી.
અચ્યુત પોટદાર ટેલિવિઝન અને બોલિવૂડના જાણીતા અભિનેતા હતા. અભિનેતાના મૃત્યુના સમાચારથી તેમના ચાહકોમાં શોક ફેલાયો છે. છેલ્લા કેટલાક વર્ષોમાં, હિન્દી સિનેમા ઉપરાંત, તેમણે મરાઠી ઉદ્યોગમાં પણ પોતાની ઓળખ બનાવી હતી. તેઓ એક અનુભવી કલાકાર હતા જે પોતાના અભિનયથી લોકોના દિલ કેવી રીતે જીતવા તે જાણતા હતા.
અચ્યુત પોટદારે તેમના અભિનય કારકિર્દીમાં 125 થી વધુ ફિલ્મોમાં કામ કર્યું હતું. આમાં હિન્દી, મરાઠી અને અન્ય ભાષાઓની ફિલ્મોનો સમાવેશ થાય છે. આ અભિનેતા અર્ધ સત્ય, તેજાબ, દિલવાલે, વાસ્તવ, પરિણીતા, દબંગ, 3 ઇડિયટ્સ અને લગે રહો મુન્ના ભાઈ જેવી ફિલ્મો માટે જાણીતા છે.