સાઉદી-આગેવાની હેઠળના ગઠબંધન દળોએ યમનમાં હુથીઓના ઠેકાણાઓ સામે લશ્કરી કાર્યવાહી તેજ કરી છે. ગઠબંધને 136 લશ્કરી લક્ષ્યાંકોનો નાશ કર્યાની જાહેરાત કરી છે, જ્યારે યમનના સરકારી દળોનો દાવો છે કે આ વિસ્તૃત આક્રમણ દરમિયાન 1,400થી વધુ હુથી લડવૈયાઓને ઠાર મારવામાં આવ્યા છે.
’યમનમાં કાયદેસરતાના સમર્થન માટેના ગઠબંધન’ Coalition to Support Legitimacy in Yemen) દ્વારા શુક્રવારે રાત્રે આ કાર્યવાહીની જાહેરાત કરવામાં આવી હતી. ગઠબંધનના પ્રવક્તા મેજર જનરલ તુર્કી અલ-માલિકીએ જણાવ્યું હતું કે આ અભિયાનમાં હુથી લડવૈયાઓ અને તેમની લશ્કરી ક્ષમતાઓને નિશાન બનાવવામાં આવી હતી, જેમાં ગઠબંધનના વિમાનોએ વિવિધ મોરચાઓ પર યમનના સરકારી દળોને ચોવીસે કલાક હવાઈ સહાય પૂરી પાડી હતી.
અલગથી, યમનના સશસ્ત્ર દળોના પ્રવક્તા બ્રિગેડિયર જનરલ માજેદ અબ્દુલ્લા અલ-નાધિબે દાવો કર્યો હતો કે સરકારી દળોએ છેલ્લા 24 કલાકમાં હુથીઓના ઠેકાણાઓ પર 2,750થી વધુ હુમલા કર્યા છે. યુદ્ધક્ષેત્રના પ્રાથમિક મૂલ્યાંકનને ટાંકીને તેમણે કહ્યું કે 1,400થી વધુ હુથી લડવૈયાઓને ઠાર મારવામાં આવ્યા છે અને 250થી વધુ લશ્કરી વાહનો તથા સાધનોનો નાશ થયો છે અથવા તેને નુકસાન પહોંચ્યું છે.
ઉપલબ્ધ માહિતીના આધારે જાનહાનિના આંકડા અને યુદ્ધક્ષેત્રના નુકસાનના મૂલ્યાંકનની સ્વતંત્ર રીતે પુષ્ટિ કરવામાં આવી નથી. આ લશ્કરી અભિયાન ’ઓપરેશન ડોન ઓફ યમન’ (Operation Dawn of Yemen)નો એક ભાગ છે, જેની શરૂૂઆત આ અઠવાડિયાની શરૂૂઆતમાં યમનની પ્રેસિડેન્શિયલ લીડરશીપ કાઉન્સિલના અધ્યક્ષ રશાદ અલ-અલીમી દ્વારા કરવામાં આવી હતી. સાઉદી મીડિયાના અહેવાલો અનુસાર, આ આક્રમણનો ઉદ્દેશ્ય હુથીઓના કબજા હેઠળના પ્રદેશને પાછો મેળવવાનો, સરકારનું નિયંત્રણ પુન:સ્થાપિત કરવાનો અને અંતે રાજધાની સનાને ફરીથી કબજે કરવાનો છે.