કેન્દ્ર સરકારે તાજેતરમાં જ ત્રણ નવા કાયદાઓ પસાર કર્યા છે, જે દેશની કાનૂની પ્રણાલીમાં આમૂલ પરિવર્તન લાવશે. આ કાયદાઓની અમલવારીને સુનિશ્ચિત કરવા માટે રાજકોટ રેન્જ આઇજી અશોકકુમાર યાદવે આજે જામનગરની મુલાકાત લીધી હતી. તેમણે જામનગર જિલ્લાના પોલીસવડા પ્રેમસુખ ડેલુ, દ્વારકા એસપી નિતેશ પાંડે અને અન્ય ઉચ્ચ અધિકારીઓ સાથે એક મહત્વપૂર્ણ બેઠક યોજી હતી.
આ બેઠકમાં નવા કાયદાઓની અમલવારી અંગે વિસ્તૃત ચર્ચા વિચારણા કરવામાં આવી હતી. આઇજી અશોકકુમાર યાદવે અધિકારીઓને નવા કાયદાઓ વિશે વિગતવાર માહિતી આપી હતી અને તેમની અમલવારી માટે જરૂૂરી માર્ગદર્શન આપ્યું હતું. તેમણે જણાવ્યું હતું કે આ કાયદાઓનો મુખ્ય ઉદ્દેશ્ય ગુનાઓને રોકવા, પીડિતોને ઝડપી ન્યાય અપાવવા અને કાયદો અને વ્યવસ્થાની સ્થિતિને વધુ મજબૂત કરવાનો છે. આ બેઠકમાં નવા કાયદાઓના અમલીકરણ માટે જરૂૂરી તાલીમ, સંસાધનો અને અન્ય તૈયારીઓ અંગે પણ ચર્ચા કરવામાં આવી હતી.
આઇજી અશોકકુમાર યાદવે તમામ અધિકારીઓને નવા કાયદાઓ વિશે સંપૂર્ણ રીતે માહિતગાર થવા અને તેમની અમલવારીમાં કોઈ કસર ન છોડવા સૂચના આપી હતી. તેમણે એમ પણ જણાવ્યું હતું કે આ કાયદાઓની સફળ અમલવારી માટે પોલીસ અને જનતા વચ્ચે સહકાર અત્યંત જરૂૂરી છે. આ મુલાકાત દરમિયાન, જામનગર જિલ્લાના પોલીસવડા પ્રેમસુખ ડેલુએ આઇજી અશોકકુમાર યાદવને જિલ્લાની વર્તમાન કાયદો અને વ્યવસ્થાની સ્થિતિ વિશે માહિતી આપી હતી. તેમણે જણાવ્યું હતું કે જામનગર પોલીસ નવા કાયદાઓના અમલીકરણ માટે સંપૂર્ણ રીતે તૈયાર છે અને આ અંગે જરૂૂરી પગલાં લેવામાં આવી રહ્યા છે.
આ બેઠકમાં દ્વારકા એસપી નિતેશ પાંડેએ પણ તેમના જિલ્લાની તૈયારીઓ વિશે માહિતી આપી હતી. આઇજી અશોકકુમાર યાદવે જામનગર અને દ્વારકા પોલીસની તૈયારીઓ બદલ સંતોષ વ્યક્ત કર્યો હતો અને તેમને જરૂૂરી સહકાર આપવાની ખાતરી આપી હતી.