IPL-2020નો પૂરો કાર્યક્રમ ગુપ્ત કેમ છે?

મુંબઈ તા.14
29 માર્ચે મુંબઈ ઈન્ડિયન્સ અને ચેન્નાઈ સુપર કિંગ્સ વચ્ચે રમાનારી મેચથી ઈન્ડિયન પ્રીમિયર લીગ-2020નો પ્રારંભ થશે. આ મેચ બાદ બીજી મેચ 30 માર્ચે દિલ્હી કેપિટલ્સ અને કિંગ્સ ઈલેવન પંજાબ વચ્ચે રમાશે અને ત્રીજી મેચમાં રોયલ ચેલેન્જર્સ બેંગલોરનો સામનો કોલકાતા નાઈટ રાઈડર્સ સામે થશે. આઈપીએલના આયોજકોએ ફ્રેન્ચાઈઝીઓને આ કામચલાઉ શિડ્યુલ આપ્યું છે. ફ્રેન્ચાઈઝીઓને 20 દિવસ અગાઉ આ શિડ્યુલ આપવામાં આવ્યું હતું. પરંતુ ટુર્નામેન્ટનું પૂરો કાર્યક્રમ તેમને હજી સુધી આપવામાં આવ્યો નથી.
કહેવામાં આવી રહ્યું છે કે કોલકાતા અને દિલ્હીમાં એપ્રિલના બીજા અને ત્રીજા સપ્તાહમાં કેટલીક કોન્ફરન્સ અને કોન્કલેવ યોજાવાની છે. જેના કારણે આ દિવસોમાં ટીમોને એકોમોડેશન મળવામાં મુશ્કેલીનો સામનો કરવો પડી શકે છે. આ ઉપરાંત ગુવાહાટીમાં પણ મેચના આયોજનને લઈને મુશ્કેલી સર્જાઈ શકે છે. રાજસ્થાન રોયલ્સે ગુવાહાટીમાં કેટલીક મેચો રમાડવાનો નિર્ણય લીધો હતો.
હવે જાણવા મળી રહ્યું છે કે કોન્ફરન્સ, સેમિનાર અને રેલીઓના કારણે ખેલાડીઓના એકોમોડેશનમાં કોઈ મુશ્કેલી નડશે નહીં પરંતુ બીજા અન્ય કેટલાક કારણ છે જેના કારણે આઈપીએલના આયોજકો ટુર્નામેન્ટના શિડ્યુલને જાહેર કરવામાં વિલંબ કરી રહ્યા છે. તેનું એક કારણ છે ઓલ-સ્ટાર ગેમ. આ મેચનો ભારતીય ક્રિકેટ કંટ્રોલ બોર્ડના પ્રમુખ સૌરવ ગાંગુલીએ રજૂ કર્યો છે. ઓલ-સ્ટાર ગેમની તારીખ અને સ્થળ વિશે ચર્ચા કરવામાં આવી રહી છે. જોકે, ફ્રેન્ચાઈઝી પોતાના ખેલાડીઓને આ મેચમાં રમવા માટે મંજૂરી આપવા ઈચ્છતી નથી.
બીજુ એક કારણ 18 અને 21 માર્ચે બાંગ્લાદેશમાં રમાનારી એશિયા ઈલેવન અને વર્લ્ડ ઈલેવન વચ્ચેની મેચ છે. ગાંગુલીએ આ બંને મેચ માટે કેટલાક ભારતીય ખેલાડીઓને મોકલવાનું વચન આપી દીધું છે. આ બંને મેચ બંગબંધુ શેખ મુજીબુર રહેમાનની જન્મ શતાબ્દીની યાદગીરી રૂપે રમાશે
અને આઈસીસીએ પણ આ બંને મેચને આંતરરાષ્ટ્રીય મેચનો દરજ્જો આપ્યો છે.
આ મેચમાં કયા ભારતીય ખેલાડીઓ રમશે તે હજી સુધી નક્કી નથી પરંતુ બીસીસીઆઈ ચારથી પાંચ ખેલાડીઓને ઢાકા મોકલશે. પરંતુ ફ્રેન્ચાઈઝીએ તેના વિશે વાંધો ઉઠાવ્યો છે કેમ કે આ બંને મેચ આઈપીએલનો પ્રારંભ થાય તેના 10 દિવસ પહેલા જ રમાવાની છે. તેવામાં ખેલાડીઓની ગેરહાજરીથી ટીમની તૈયારીઓને અને તેમના પ્રમોશનલ કેમ્પેનને અસર પડી શકે છે. તેથી આઈપીએલનું શિડ્યુલ જાહેર કરવા માટે આ તમામ બાબતોને ધ્યાનમાં રાખવામાં આવી રહી છે.

રિલેટેડ ન્યૂઝ