ટીમ ‘ઝીરો’! આખી ટીમ ‘શૂન્ય’માં તંબુ ભેળી: 754 રને તોતિંગ હાર

મુંબઇ,તા.21
મુંબઈની પ્રતિષ્ઠિત સ્કૂલ ટૂર્નામેન્ટ હૈરિસ શીલ્ડના પહેલા રાઉન્ડની નોક આઉટ મેચમાં એક વિચિત્ર ઘટના બની. એવી ઘટના જેને ચિલ્ડ્રન વેલફેર સ્કૂલ જલ્દીથી જલ્દી ભૂલવા માગશે. અંધેરીની આ સ્કૂલ બોરીવલીની સ્વામી વિવેકાનંદ ઈન્ટરનેશનલ સ્કૂલ સામે મેચ તો હારી પરંતુ તેનાથી પણ વિચિત્ર વાત તે હતી કે ટીમના બધા બેટ્સમેન 0 પર આઉટ થયા. જી હાં ટીમનો કોઈ બેટ્સમેન પોતાનું ખાતું પણ ન ખોલાવી શક્યો.
વિરોધી ટીમના બોલર્સનો આભાર માનો કે તેણે 7 એક્સસ્ટ્રા રન ( 6 વાઈડ અને 1 બાય) રન આપી દીધા. જો આવું ન થયું હોત તો સ્કોર બોર્ડ પર પણ 0 રન હોત. ચિલ્ડ્રન વેલફેરની ટીમ માત્ર 6 ઓવરોમાં જ ઓલ આઉટ થઈ ગઈ. વિવેકાનંદ ઈન્ટરનેશનલ સ્કૂલ તરફથી મીડિયમ પેસર અલોક પાલે ત્રણ ઓવરમાં 3 રન આપીને 6 વિકેટ લીધી. કેપ્ટન વરોદ વાજેએ 3 રન આપીને બે વિકેટ લીધી. બાકીના બે બેટ્સમેન રન આઉટ થયા.
આ શરમજનક પ્રદર્શનના કારણે ચિલ્ડ્રન વેલફેરની ટીમ 754 રનના વિશાળ અંતરથી મેચ હારી ગઈ. આ પરંપરાગત ઈન્ટરનેશનલ ટૂર્નામેન્ટમાં કદાચ સૌથી મોટી હાર હશે. આઝાદ મેદાનના ન્યૂ એરા ગ્રાઉન્ડ પર પહેલા બેટિંગ કરતા વિવેકાનંદ સ્કૂલે મીત માયેકરની ત્રેવડી સદી (338 રન અણનમ, 134 બોલ, 56 ચોગ્ગા અને સાત છગ્ગા)ની મદદથી 39 ઓવરમાં 761 રન બનાવ્યા.
આ સ્કોરમાં 156 રનની પેનલ્ટી પણ શામેલ છે. કારણ કે ચિલ્ડ્રન વેલફેરના બોલર નિર્ધારિત 3 કલાકમાં 45 ઓવર પૂરી નહોતા કરી શક્યા. તેમણે 6 ઓવર ઓછી ફેંકી. આ જીતથી સ્વામી વિવેકાનંદ ઈન્ટરનેશનલ સ્કૂલના કોચ મહેશ લોતીકર ખૂબ જ ખુશ છે. સ્કૂલના પૂર્વ વિદ્યાર્થી રહેલા ભારતીય ટીમના સુપરસ્ટાર બેટ્સમેન રોહિત શર્મા પણ જો આ સ્કોરબોર્ડ જોશે તો ખુબ ખુશ થશે.

રિલેટેડ ન્યૂઝ