નોવાક જોકોવિચ સહિતના નામાંકિત ખેલાડીઓની આગેકૂચ

ભૂતપૂર્વ ગ્રાન્ડસ્લેમ ચેમ્પિયન સ્વિર્ટ્ઝલેન્ડના સ્તેનિસ્લાસ વાવરિંકાના અભિયાનનો અંત આવી ગયો હતો. ગ્રીસના પાંચમા ક્રમાંકિત સિત્સિપાસે સ્પેનના 30 વર્ષીય રોબર્ટો કાર્બેલસને સીધા સેટમાં 6-3, 7-6, 6-2થી હરાવીને ત્રીજા રાઉન્ડમાં પ્રવેશ કર્યો હતો. કારકિર્દીમાં 22 ગ્રાન્ડસ્લેમ જીતી ચૂકેલા જોકોવિચે ફુસ્કોવિચ સામે પ્રથમ સેટ ટાઇબ્રેકરમાં પહોંચ્યા બાદ 7-6 (7-2), 6-0, 6-3થી હરાવીને ત્રીજા રાઉન્ડમાં પ્રવેશ કર્યો હતો. મેન્સ તથા વિમેન્સ સિંગલ્સમાં એક-એક અપસેટ સર્જાયા હતા. 2017ની ફ્રેન્ચ ઓપન ચેમ્પિયન લેટવિયાની જેલેના ઓસ્ટાપેન્કોનો અમેરિકાની પેટયન સ્ટન્સ સામે ત્રણ સેટના સંઘર્ષ બાદ 6-3, 1-6, 6-2થી પરાજય થયો હતો.

ચેકોસ્લાવેકિયાના 1996ના ઓસ્ટ્રેલિયન ઓપન ચેમ્પિયન પેટ્ર કોર્ડાના પુત્ર 24 વર્ષીય અમેરિકાના સબાસ્ટિયન કોર્ડાને બીજા રાઉન્ડમાં ઓસ્ટ્રિયાના સેબેસ્ટિયન ઓફનર સામે સીધા સેટમાં 6-3, 7-6, 6-4થી પરાજયનો સામનો કરવો પડયો હતો. વિમેન્સ સિંગલ્સમાં ઇલેના સ્વિટોલિનાએ ઓસ્ટ્રેલિયાની સ્ટોર્સ સેન્ડર્સને ત્રણ સેટની મેચમાં 2-6, 6-3, 6-1થી હરાવી હતી. અમેરિકાની સ્લોએન સ્ટિફન્સે ગ્રાચેવાને 6-2, 6-1થી, આર્યના સબાલેન્કોએ શીમાનોવિચને 7-5, 6-2થી તથા ઇલિસ મર્ટેન્સે ઓસોરિઓ સેરાનોને 6-3, 7-6 (7-3)થી હરાવીને પોતાનું અભિયાન આગળ વધાર્યું હતું.

ત્રણેય ફોર્મેટમાં નવી જર્સી સાથે દેખાશે ટીમ

ભારતીય ટીમ 7 જૂનથી ઓસ્ટ્રેલિયા વિરુદ્ધ વિશ્વ ટેસ્ટ ચેમ્પિયનશિપની ફાઈનલ રમશે. આ પહેલા ટીમ ઈન્ડિયાના નવા કિટ સ્પોન્સર એડિડાસે ત્રણેય ફોર્મેટ માટે ટીમ ઈન્ડિયાની નવી જર્સી લોન્ચ કરી છે. હવે ભારતીય ટીમ ત્રણેય ફોર્મેટમાં નવી જર્સી પહેરીને રમશે, જે જૂની જર્સીથી ઘણી જ અલગ છે. ભારતીય ક્રિકેટ ટીમ અને એડિડાસે સોશિયલ મીડિયા હેન્ડલ પર એક વીડિયો શેર કરીને નવી જર્સીની જાહેરાત કરી છે.

આ વીડિયોમાં ત્રણેય ફોર્મેટની જર્સી જોવા મળે છે. ટેસ્ટની જર્સી સફેદ રંગની છે અને તેમાં આસમાની રંગમાં ભારતનું નામ લખ્યું છે. સાથે જ ખભ્ભી બંને બાજુ આસમાની રંગની ત્રણ પટ્ટી છે. છાતી પર જમણી બાજુ બ્લૂ રંગની ત્રણ પટ્ટી છે જે નીચેથી ઉપર તરફ છે. તો વનડે અને ટી-20ની જર્સી બ્લૂ રંગની છે. એક જર્સી ડાર્ક બ્લૂ રંગની છે જ્યારે બીજી લાઈટ બ્લૂ રંગની. જો કે તે નથી જણાવવામાં આવ્યું કે આ જર્સીમાંથી કઈ વનડેની છે અને કઈ ટી-20ની.

7થી 11 જૂન દરમિયાન યોજાનાર મેચમાં રિઝર્વ-ડેની પણ જોગવાઈ

ભારતીય ક્રિકેટ ટીમના તમામ ખેલાડીઓએ આઈસીસી વર્લ્ડ ટેસ્ટ ચેમ્પિયનશિપ ફાઈનલ માટે પ્રેક્ટિસ શરૂૂ કરી દીધી છે. ઓસ્ટ્રેલિયા વિરુદ્ધ રમનાર મુકાબલા માટે રોહિત શર્માની ટીમ કોઈ કસર છોડવા માંગતી નથી. 7થી 11 જૂન વચ્ચે ઈંગ્લેન્ડના ઓવલમાં બીજી આઈસીસી વર્લ્ડ ટેસ્ટ ચેમ્પિયનશિપ ફાઈનલ રમાવાની છે. આ મેચ પર પણ વરસાદનું અનુમાન છે અને જો મેચ પૂરી ન થાય તો ટ્રોફી કોને મળશે. ભારતીય ક્રિકેટ ટીમે સતત બીજીવાર આઈસીસી વર્લ્ડ ટેસ્ટ ચેમ્પિયનશિપ ફાઈનલમાં જગ્યા બનાવી છે. પ્રથમવાર ભારતે ન્યૂઝીલેન્ડ સામે હારને કારણે રનર્સઅપથી સંતોષ કરવો પડ્યો હતો. આ વખતે ભારતીય ટીમની નજર ઓસ્ટ્રેલિયાને હરાવીને આઈસીસી ટ્રોફી કબજે કરવા પર છે.આ વખતે રોહિત શર્મા ટીમનો કેપ્ટન છે. હાલમાં ભારતમાં આઈપીએલ-2023નો મુકાબલો વરસાદથી પ્રભાવિત રહ્યો હતો. ચેન્નઈ સુપર કિંગ્સ અને ગુજરાત ટાઈટન્સ વચ્ચે રમાયેલી મેચનો નિર્ણય રિઝર્વ ડે પર આવ્યો હતો. હવે આઈસીસી વર્લ્ડ ટેસ્ટ ચેમ્પિયનશિપ ફાઈનલ પર વરસાદનો ખતરો છે અને મેચ રિઝર્વ ડે સુધી પહોંચી શકે છે. 7 જૂનથી 11 જૂન સુધી મેચમાં પરિણામ ન આવે તો તેને 1 દિવસ આગળ વધારી 12 જૂન સુધી જારી રાખી શકાય છે. આઈસીસી વર્લ્ડ ટેસ્ટ ચેમ્પિયનશિપ ફાઈનલની આ મેચ જો વરસાદને કારણે ધોવાઈ જાય તો ટ્રોફી કોને આપવામાં આવશે. આઈસીસીના નિયમ પ્રમાણે આવી સ્થિતિમાં ફાઈનલમાં પહોંચેલી ભારત અને ઓસ્ટ્રેલિયાની ટીમને સંયુક્ત વિજેતા જાહેર કરવામાં આવશે.