Udaan
ડોક્ટર બનવાનું સ્વપ્ન અધૂરું છોડી શિક્ષણ ક્ષેત્રે કર્યા અનેકના સ્વપ્ન સાકાર
શિક્ષણ સાથે અનેક સેવાકીય પ્રવૃત્તિ કરી સમાજમાં પ્રેરણારૂપ બન્યા છે પૂજાબેન પૈજા
2012-13ના વર્ષમાં ધરમપુર પ્રાથમિક શાળામાં પ્રથમ વખત વાર્ષિકોત્સવની ઉજવણી થઈ હતી.શાળાના વિદ્યાર્થીઓ, વાલીઓ, અગ્રણીઓ સહિત અનેક પદાધિકારીઓ પણ ઉપસ્થિત હતા.સમગ્ર શાળાની કાર્ય પદ્ધતિ અને આચાર્યાની કામગીરીથી પ્રભાવિત થઈને ગોંડલના નવીનભાઈ ટીલાળાએ 45 જેટલા વિદ્યાર્થીઓને મુંબઈ હવાઈ મુસાફરીની ભેટ આપી.આચાર્યાએ પણ વધુ મહેનત કરી બાળકોને મુંબઈમાં રહેવા,જમવા,ફરવા તેમજ પરત લાવવાના ખર્ચની વ્યવસ્થા કરી.જે બાળકોએ રેલવે સ્ટેશન પણ નહોતું જોયું એ બાળકો માટે આ યાત્રા સ્વપ્ન સમાન બની રહી.કોઈ વ્યક્તિ ધારે તો શું કરી શકે તેનું આ ઉત્તમ ઉદાહરણ હતું.મીડિયામાં પણ આ ઘટનાની મોટા પાયે નોંધ લેવાઈ હતી.શાળાના હિતમાં અને વિદ્યાર્થીઓના વિકાસ માટે હર હંમેશ પ્રયત્નશીલ રહેતા આ આચાર્યા એટલે હાલ પડધરી તાલુકામાં બ્લોક રીસોર્સ કોર્ડિનેટર (ઇછઈ)તરીકે ફરજ બજાવતા પૂજાબેન પૈજા.’
જન્મ, ઉછેર અને અભ્યાસ રાજકોટમાં કર્યો. ડો.પ્રવિણભાઈ પૈજા અને વસંતબેન પૈજાના ચાર સંતાનોમાં દીકરી પૂજા ભણવામાં હોશિયાર અને ડોક્ટર બનવાની ઈચ્છા ધરાવતી હતી.પરિવારમાં આર્થિક સમસ્યાને કારણે ભાઈ બેન બંને વિજ્ઞાન પ્રવાહમાં હોવા છતાં દાદા-દાદીની જુનવાણી વિચારસરણીના કારણે દીકરાને ડોક્ટર બનાવવાનું અને દીકરી પૂજાને વિજ્ઞાન પ્રવાહ છોડાવવાનો નિર્ણય લેવાયો.સંજોગોને સ્વીકારી સાયન્સ નહિ તો શિક્ષણ ક્ષેત્રે આગળ વધી કંઈક નવું કરવાનો નિર્ણય કર્યો.પીટીસી કરી શિક્ષક તરીકેની પ્રથમ નોકરી રાજાવડલા ગામે મળી.લગ્ન બાદ પતિ ગૌતમભાઈ ઇન્દ્રોડિયા સાથે જસદણમાં ફરજ બજાવી અને હાલ પડધરી તાલુકામાં પતિ પત્ની બંને સાથે કામગીરી કરે છે. તેમના બંને દીકરા પૂરબ અને શુભમ પણ માતા-પિતાની જેમ તેજસ્વી છે અને એન્જિનિયરિંગમાં અભ્યાસ કરી રહ્યા છે. પૂજાબેનની સામાન્ય શિક્ષકથી બી.આર.સી કોર્ડિનેટર સુધીની સફર નદીના સામે પ્રવાહે તરવા જેવી હતી.જે પણ જગ્યાએ તેઓ શાળામાં જાય ત્યાં શાળાની હાલત સારી ન હોય, વિદ્યાર્થીઓની સંખ્યા નહિવત હોય અને બીજી અનેક સમસ્યા હોય, છતાં પણ તેઓ પોતાની સૂઝ અને મહેનત દ્વારા કોઈ પણ વિદ્યાર્થીઓને સરકારી શાળામાં ભણવા આવવાનું મન થાય તેવું સુંદર વાતાવરણ બનાવતા. તેમનો ‘વાલી શાળા’નો કોન્સેપ્ટ રાષ્ટ્રીય અને આંતરરાષ્ટ્રીય કક્ષાએ ખૂબ જ પ્રશંસા પામ્યો છે. ગ્રામ્ય વિસ્તારમાં વાલીઓને પોતાના બાળકો માટે સજાગ કરી ગ્રૂપ બનાવી અને તેનું મોનિટરિંગ પણ વાલીઓ જ કરે જેમાં લાઈફ સ્કીલ ડેવલોપમેન્ટના કાર્યક્રમો પણ થાય. આ પ્રોજેક્ટ ખૂબ જ સફળ બન્યો. જે વ્યક્તિને કંઈક કરવું છે તેના માટે સંજોગો સમસ્યારૂપ બનતા નથી જેનું જીવંત ઉદાહરણ છે પૂજાબેન. વિપરિત પરિસ્થિતિમાં પણ કામગીરી કરી અને 2017 ની સાલમાં તેમને ગુજરાત સરકારનો બેસ્ટ ટીચરનો એવોર્ડ મળ્યો તથા એનસીઇઆરટીની સંસ્થા ‘નીપા’ કે જેમાં કંઈક અલગ કરનારને એવોર્ડ અપાતો હોય છે તે એવોર્ડ પણ તેમને મળ્યો.નાના-મોટા અનેક એવોર્ડ તેમને અત્યાર સુધીમાં મળ્યા છે.આ સફળતામાં તેમને પતિનો સંપૂર્ણ સાથ મળ્યો છે.છેલ્લા 24 વર્ષથી શિક્ષક તરીકેની ફરજ બજાવતા તેઓએ અનેક મુશ્કેલીઓનો સામનો કર્યો છે.એક મહિલા તરીકે તેમની પ્રગતિમાં પથ્થર ફેંકવાવાળા પણ મળ્યા છે,પરંતુ તેઓ પોતાના ધ્યેય માટે અડગ રહ્યાં છે. પૂજાબેન 3 મહિનાથી પડધરીમાં બ્લોક રીસોર્સ ક્લસ્ટર કોર્ડિનેટર તરીકેની ફરજ બજાવે છે જેમાં સમગ્ર તાલુકાની શાળાઓનું મોનિટરિંગ કરવાનું હોય છે.આ ફરજ પણ તેઓ બખૂબી નિભાવે છે.શિક્ષણ સાથે સેવાની પ્રવૃતિ કરતા પૂજાબેનને પોતાની નોકરી પછીનો સમય બાળકોના શિક્ષણ માટે અને વૃદ્ધોની એકલતા દૂર કરવાની પ્રવૃત્તિમાં વિતાવવો છે. પૂજાબેનને ભવિષ્ય માટે ખૂબ ખૂબ શુભેચ્છાઓ….
‘વાલી શાળા’નો નવતર પ્રયોગ અને ‘પુસ્તક પરબ’ના અનોખા વિચારથી પૂજાબેન પૈજાની આગવી ઓળખ બની
સાત પગલાંનો સાથ નિભાવે છે પતિ ગૌતમભાઈ ઇન્દ્રોડિયા
પૂજાબેનને પતિ ગૌતમભાઈનો સાથ ડગલે ને પગલે મળી રહે છે.આજે તેઓ સફળતાના સોપાન સર કરી શક્યા છે તેનો સંપૂર્ણ શ્રેય તેઓ પતિને આપે છે. બંનેને બેસ્ટ ટીચરના એવોર્ડ મળ્યા છે છતાં પહેલા પત્નીને એવોર્ડ મળે તેવી તેમની ઈચ્છા હતી.2017માં પૂજાબેનને એવોર્ડ મળ્યા બાદ 2018માં ગૌતમભાઈને પણ બેસ્ટ ટીચરનો એવોર્ડ મળ્યો હતો.પત્ની બી.આર.સી કોર્ડિનેટર હોવાથી તેની નીચે તેઓને સી.આર.સી તરીકેની કામગીરી કરવાની હોવા છતાં પણ તેઓ નાનપ અનુભવવાને બદલે પત્ની માટે ગર્વ અનુભવે છે.
પતિ અને પત્નીનો સહિયારો સેવાયજ્ઞ
પૂજાબેન પોતાના પતિ સાથે અનેક સેવાકીય પ્રવૃત્તિઓ પણ કરી રહ્યા છે જેમાં પુસ્તક પરબ માં ત્રણ રવિવારે રાજકોટ ખાતે બજરંગવાડી, પ્રેમમંદિર અને ભગતસિંહ ગાર્ડન પાસે વિનામૂલ્યે પુસ્તક પ્રેમીઓને વાંચવા માટે પુસ્તકો આપે છે.ચોથા રવિવારે બગીચાઓમાં જઈ અને બાળકોને દેશી રમતોથી અવગત કરાવે છે. શિયાળામાં તેઓ ધાબળા વિતરણ કરે છે. શાળાઓ શરૂ થાય ત્યારે જરૂરિયાત મંદ બાળકોને સ્ટેશનરી અપાવે છે તેમજ સ્પર્ધાત્મક પરીક્ષા માટે જેને જરૂર હોય તેને મટીરિયલ પણ પૂરું પાડે છે. પર્યાવરણનું જતન કરતા તેઓ બીજ બેંક પણ ચલાવે છે અને જે શાળામાં વૃક્ષોનું જતન થતું હોય ત્યાં બીજ વાવે છે. ચકલી બચાવો અભિયાનમાં બાળકોને જોડવા માટે તેઓ ગરબામાંથી બનાવેલ માળાઓ લઈ વિનામૂલ્યે શાળામાં આપે છે. તેઓએ તજજ્ઞ તરીકે પણ સેવા આપી છે તેમજ મોડ્યુલેખનમાં પણ તેમની ઉત્તમ કામગીરી છે. ૠઈઊછઝ સાથે પણ તેઓ સંકળાયેલા છે અને તેના માટે પણ કામગીરી કરે છે.
ટાઈમ મેનેજમેન્ટ કરો
મહિલાઓને સંદેશ આપતા પૂજાબેને જણાવ્યું હતું કે સપના જુઓ અને તે પૂરા કરો. તમારામાં જે ટેલેન્ટ છે,તમને જે કામ કરવું ગમે છે તે જરૂરથી કરો. જો તમે ટાઈમ મેનેજમેન્ટ કરશો તો ઘર પરિવારની સંભાળ સાથે તમે તમારું કામ પણ કરી શકશો. બીજી વાત કે બીજા શું કહેશે તેવું ન વિચારો ભગવાને એક જન્મ આપ્યો છે તે જીવી લો.જ્યારે સફળતા મળશે ત્યારે તમારા વિરુદ્ધ બોલનારા લોકો જ તમારી પ્રશંસા કરશે.
Written by Bhavna Doshi
માટી ચિકિત્સાથી આકર્ષાઈને 100થી વધુ પ્રોડક્ટ બનાવી હેલ્થ,વેલ્થ અને બ્યુટી ક્ષેત્રે ક્રાંતિ સર્જી છે ડો. અંજુ પાડલિયાએ
પોતાના સંઘર્ષ જેવી તકલીફ અન્ય મહિલાને વેઠવી ન પડે તે માટે મહિલાઓને આત્મનિર્ભર બનાવે છે ડો.અંજુ પાડલિયા
દિવાળીનો સમય હતો એ મહિલા કામની શોધ માટે એક બ્યુટીપાર્લરમાં જાય છે.પતિની દારૂૂની લત અને બાળકોના ઉછેરની જવાબદારીના કારણે રડી રહી હતી. બ્યુટી સલૂન ચલાવતી તે મહિલાએ પોતાની પ્રોડક્ટ તેને બતાવી અને જણાવ્યું કે દિવાળીનો સમય છે તું તારી તાકાત લગાડી અને આ પ્રોડક્ટ વેચ અને તારી દિવાળી સુધાર. એ મહિલાએ પણ ચેલેન્જ સ્વીકારી અને મહેનત કરી પ્રોડક્ટનું વેચાણ કરી બતાવ્યું.પેલી મહિલાએ આર્થિક રીતે કાયમ માટે પગભર બને એ માટે કોર્સ શીખવ્યો અને પોતાની પ્રોડક્ટ વેચવા માટે આપી.આવક થતાં તેનું સમગ્ર જીવન સુધરી ગયું.આ સલૂન ચલાવતી મહિલા એટલે માટીની 101 પ્રોડક્ટ બનાવતી સ્ત્રી સંચાલિત ‘કાયાપલટ’ના માલિક અને સ્થાપક ડો.અંજુ પાડલિયા.તેઓએ આ એક નહિ પણ અનેક મહિલાઓને આત્મનિર્ભર બનાવી તેમના જીવનની કાયાપલટ કરી છે પરંતુ આ બદલાવની યાત્રા સહેલી નહોતી.
અમરેલીના નવા ઉજળા ગામે જન્મ.માતા પ્રભાબેન બગથરિયા પિતા બટુકભાઈ બગથરિયા. ચાર બહેન અને એક ભાઈમાં સૌથી મોટું સંતાન હોવાથી નાનપણથી જ જવાબદારીઓ માથે આવી. નાના ભાઈ-બહેનને સાચવવાથી લઈને ચૂલામાં રસોઈ,વાડીએ ભાત લઈને જવું, નદીએ કપડાં ધોવા વગેરે તેઓ કરતા.પિતાજી માનતા કે કરિયાવરથી દીકરીનું ઘર ન ચાલે,પોતાની પાસે કલા હોવી જોઈએ એટલે મોતીકામ, સિલાઈકામ શીખ્યા.બાળપણમાં રમવાની ઉંમરમાં જ કમાવા લાગ્યા.જે કરવું તેમાં સફળ થઈને જ રહેવું એ મંત્ર નાનપણ થી જ મનમાં કોતરાઈ ગયો હતો.જવાબદારીના બોજ વચ્ચે વીતેલા બાળપણ વખતે ક્યાં ખબર હતી કે હજુ તો દોજખના દરિયાને ઓળંગવાનો છે.ધો.12 પૂરું કર્યું, ન કર્યું ત્યાં લગ્ન થઈ ગયાં.લગ્ન પછી નબળી આર્થિક સ્થિતિ,સંયુક્ત કુટુંબ,જુનવાણી વિચારધારા વચ્ચે બે બાળકોનો જન્મ થયો. બંને બાળકોને જોઈને જાણે જિંદગી જીવવા જેવી લાગતી પરંતુ દિવસે દિવસે આર્થિક સંઘર્ષ અને શારીરિક,માનસિક ત્રાસ વધતો ગયો.પતિથી અજાણ નાનકડી ખુરશીમાં આઈબ્રો કરવાથી પાર્લરની શરૂૂઆત કરી. પૈસા આવતા સુખનું કિરણ દેખાયું પરંતુ પતિની લત અને બેકારી વચ્ચે જિંદગી નિરાશાના વંટોળથી ઘેરાયેલી જ રહી.પોતાના કામ અને સ્વભાવના કારણે બ્યુટી પાર્લરની આવક વધતા પોતાનું ઘર લીધું અને ધીમે ધીમે આર્થિક સ્થિતિ સ્થિર થવા લાગી પરંતુ માનસિક પરિતાપ એ જ રહ્યો અંતે બંને દીકરાના ભવિષ્યનો વિચાર કરી 2016માં પતિથી અલગ થવાનો નિર્ણય કર્યો.જાણે આ નિર્ણયમાં ભગવાન પણ સાથે હોય તેમ અલગ થયા બાદ દરેક પગલે જીવનમાં સફળતા મળતી ગઈ. પ્રથમ વખત 550 બહેનોના સેમિનાર સાથે અત્યાર સુધીમાં 1000 સેમિનાર કર્યા.વિધાનસભાની ચૂંટણીમાં પણ ઊભા રહ્યા. ગુજરાતમાં ટોપ 25 બિઝનેસમેનમાં તેમનું નામ છે.2019માં બેસ્ટ મેકપ આર્ટિસ્ટ ઓફ ઇન્ડિયા તથા ગુજરાત રાઈઝિંગ સ્ટારનો એવોર્ડ મળ્યો. નેચરોપેથીનો અભ્યાસ શરૂૂ કર્યો. ગઉઉઢ નેચરોપેથી એન્ડ યોગની ડિગ્રી મેળવી.તેઓએ દુબઈ સહિત અનેક એક્સપો ઓર્ગેનાઇઝ કર્યા છે.સત્સંગ શિક્ષણની પરીક્ષામાં પ્રારંભ થી પ્રાજ્ઞ-3 સુધી પરીક્ષામાં 8 ગોલ્ડ મેડલ મળ્યા છે.
કોરોનાના કપરા સમયમાં સમયનો સદુપયોગ કરીને ‘કાયાપલટ’ બ્યુટી પ્રોડક્ટનું નિર્માણ કર્યું.સફરના આ પડાવમાં ડિપ્રેશન આવ્યું, નિરાશા પણ આવી પરંતુ હાર સ્વીકારે એ અંજુ નહિ.બાળકો સાથે ઇઅઙજ ના સત્સંગ અને સભામાં જતા અને પૂજ્ય પ્રમુખ સ્વામી મહારાજ પ્રત્યે આસ્થા જાગી. બંને દીકરાઓના સાથ અને ધર્મના સંગાથના કારણે કાંટાળા માર્ગ પર ચાલવું સરળ બન્યું.મોટો દીકરો બોની ખઇઅ છે અને કંપનીમાં એમડી છે અને પુત્રવધૂ નમ્રતા એચઆર છે અને નાનો દીકરો ડો.કેવલ કંપનીમાં સીઈઓ છે.તેમનું એક માત્ર સ્વપ્ન છે પોતાની કંપનીને 1,000 કરોડની ફર્મ બનાવવી છે અને હજારો નહિ પણ લાખો મહિલાઓને આર્થિક રીતે પગભર કરવી છે.અંજુબેનને ખૂબ ખૂબ શુભકામનાઓ….
કોઈના પ્રભાવમાં નહીં પણ પોતાના સ્વભાવમાં રહી નિર્ણય કરો
મહિલાઓને સંદેશ આપતા અંજુબેને જણાવ્યું કે જીવનના કોઈપણ તબક્કે આત્મવિશ્વાસ ગુમાવવો નહીં.સુખ અને દુ:ખ એ એક સિક્કાની બે બાજુઓે છે. કોઈના પ્રભાવમાં નહીં પરંતુ પોતાના સ્વભાવમાં રહી અને નિર્ણય કરવો. હંમેશા પોતાની છબી ઉજળી કરવાનો પ્રયત્ન કરશો તો મંઝિલ સુધી પહોંચતા વાર નહીં લાગે.
કુમકુમ બ્યુટીપાર્લરથી કાયાપલટ કંપનીની આ છે સફળ યાત્રા
એક સમયે ખુરશી રાખીને કુમકુમ બ્યુટીપાર્લર ચલાવનાર અંજુબેન પાડલિયા આજે કાયાપલટના 3 માળના કોર્પોરેટ બિલ્ડિંગના માલિક છે જેનો પ્રારંભ આવતી કાલે થવાનો છે.તેઓએ કોવિડના સમયમાં આહાર ચિકિત્સા, માટી ચિકિત્સા અને જળ ચિકિત્સા દ્વારા માટીની 3 પ્રોડક્ટ બજારમાં મૂકી. જુદી-જુદી માટી લઈને 2000 લોકો પર પ્રયોગો કર્યા. 17 બહેનોને ટ્રેઈન કરી.આ પ્રોડક્ટ પુના, મુંબઈ, હૈદરાબાદ, તેલંગાણા, આફ્રિકા, કેનેડા સહિત આઠ ક્ધટ્રીમાં પણ જાય છે ફક્ત 1000 રૂૂપિયામાં પ્રોડક્ટના ડિસ્ટ્રિબ્યુટરને 11 દિવસ તાલીમ આપે છે.20 % થી લઈને 50% ડિસ્કાઉન્ટ આપે છે તેમજ મોલ ખોલવો હોય તો 26 જાતની થેરેપી સાથે સમગ્ર પાર્લરની વ્યવસ્થા પણ કરે છે આ રીતે 17 બેચ પૂર્ણ થઈ છે. નવા રિટેલ મોલમાં પ્રોડક્ટનું વેચાણ થશે,નિ:શુલ્ક સેમિનાર ચલાવવામાં આવશે તેમજ બહેનોને આત્મનિર્ભર બનાવવા માટેની ટ્રેનિંગ પણ આપવામાં આવશે આ ઉપરાંત અમેરિકા માન્યતા ધરાવતો વર્લ્ડ વાઈડ યોગનો કોર્સ પણ કરાવવામાં આવશે. તેઓએ જણાવ્યું કે 0% કેમિકલ ફ્રી માટી સિક્કિમથી લાવવામાં આવે છે વાવડીમાં તેનું પ્રોડક્શન થાય છે.માટી ઉપર ખાસ પ્રોસેસ કરીને પ્રોડક્ટ બનાવવામાં આવે છે જેમાં મેકઅપ થી લઈને ફેશિયલ કીટ વગેરે 101 પ્રોડક્ટ છે. આ પ્રોડક્ટ ગવર્મેન્ટ સર્ટિફાઇડ છે. હાલ તેમાં 4,500 હેલ્થ કોચ છે.
ઘરમાં બજાવે છે સામાન્ય ગૃહિણીની ભૂમિકા: વહેલી સવારે ઊઠી ચા, પાણી, રસોઈ, સાફ-સફાઈ દરેક કામ તેઓ જાતે કરે છે
છેલ્લા પચીસ વર્ષથી ભારતીય જનતા પક્ષમાં વિવિધ જવાબદારી નિભાવતા કંચનબેન રાજકોટની જનતાના પ્રશ્નોના ઉકેલ માટે પોતાનો અનુભવ કામે લગાડશે
‘આજે મારી આંખોમાં હરખના આંસુ છે,કારણ કે બે દાયકાથી વધુ પક્ષમાં કરેલ કામગીરી, અનુભવની કદર થઈ હોય તેવું લાગે છે.ફક્ત હું જ નહિ પણ મહિલા મોરચા સહિત મારા દરેક સાથી કાર્યકરો ખુશ થયા છે. મેં હંમેશા પક્ષને આગળ રાખીને કામ કર્યું છે. કોઈ કામને નાનું કે મોટું ગણ્યું નથી અને એટલે જ જાણે એ દરેક કામના ફળ રૂૂપે,લોકોના આશીર્વાદ રૂપે આ પદ મળ્યું છે.’ આ શબ્દો છે રાજકોટના ડેપ્યુટી મેયર પદે વરણી થયેલ કંચનબેન સિદ્ધપુરાના.ડેપ્યુટી મેયર પદ માટે નામ જાહેર થતાં નાના-મોટા દરેક લોકો ફૂલોના ગુલદસ્તા સાથે અભિનંદન આપી પોતાની ખુશી વ્યક્ત કરી રહ્યાં હતા. બધાનો સૂર એક જ હતો કે બેન, તમારી મહેનત રંગ લાવી છે. હસતા ચહેરે દરેકની શુભેચ્છાનો સ્વીકાર કરતા કંચનબેનના મોં પર આત્મસંતોષ છલકાતો હતો. વ્યસ્ત હોવા છતાં તેમની આ ઉડાન વિષે તેઓએ ખૂબ રસપૂર્વક માહિતી આપી હતી.
રાજકોટમાં લુહાર પરિવારમાં જન્મ અને કોડીનારમાં અભ્યાસ કર્યો અને ફરીથી રાજકોટ આવ્યા.3 ભાઈ અને 2 બહેનનો પરિવાર હતો.માતા ઉજ્જમ બેન કવા અને પિતા હરજીવનભાઈ કવા.પરિવારની આર્થિક સ્થિતિ સારી ન હોવાના કારણે 8 ધોરણ સુધીનો અભ્યાસ કરી માતાને મોતીકામ, ચાંદીકામ વગેરેમાં મદદ કરવા લાગ્યા.યોગ્ય ઉંમર થતાં રાજકોટમાં જ રાજેશભાઈ સિદ્ધપુરા સાથે લગ્ન થયા.લગ્ન પછી પતિના કામ માટે પાંચેક વર્ષ મુંબઈ રહ્યા પરંતુ સાસુ મૂક-બધિર હોવાથી તેમના છેલ્લા દિવસોમાં સેવા કરવા માટે ફરી રાજકોટ આવ્યા. અહીં વોર્ડમાં ભારતીય જનતા પક્ષની નાની-મોટી મિટિંગો થતી તેમાં તેઓ હાજરી આપતા અને ધીમે ધીમે રસ જાગવા લાગ્યો ત્યારે ખબર પણ નહોતી કે ગૃહિણીની જવાબદારી નિભાવતા આ મહિલા ડેપ્યુટી મેયરના પદ સુધી પહોંચશે. આ બાબતે કંચનબેને જણાવ્યું કે, ‘રાતોરાત અહીં સુધી નથી પહોંચી.ધીમે ધીમે પગથિયાં ચડતા આ મંઝિલ મળી છે. સૌ પ્રથમ વોર્ડ નં 18(જૂનો)માં મહામંત્રીની જવાબદારી મળી. 3 વર્ષ બાદ મહિલા મોરચાના પ્રમુખ તરીકેની જવાબદારી નિભાવી, આ કામગીરી જોતા તેમની નિમણૂંક રાજકોટ જિલ્લા જેલ સમિતિમાં મહિલા સામાજિક કાર્યકર તરીકે થઈ.જ્યાં જવાબદારી સોંપાઈ ત્યાં નિષ્ઠાપૂર્વક કામ કર્યું. કોઈ પણ ચૂંટણી હોય ત્યાં ગંભીરતાથી કામગીરી કરી છે. 2009માં શહેર ભાજપ મંત્રી તરીકે ફરજ નિભાવી,ઉપરાંત શહેર મહિલા મોરચાના મહા મંત્રી તરીકે ફરજ બજાવી હતી.’
તેઓ કાયદા નિયમોની કમિટીમાં ચેરમેન પદે છે.લુહાર જ્ઞાતિમાં પ્રથમ મહિલા છે જે અહીં સુધી પહોંચ્યા છે.હંમેશા તેઓ બહેનોને સાથે રાખીને કામ કરે છે.નાની મોટી કોઈ પણ વ્યક્તિને પ્રેમથી જવાબ આપવો અને તેની વાત સાંભળી તરતજ તેનું કામ થઈ જાય તેવા પ્રયત્નો કરે છે.અત્યાર સુધી રોજ સવારે વોર્ડમાં જઈ લોકોના પ્રશ્ર્નો (કચરો, પાણી, ગટર, બ્લોક) સાંભળતા તેમજ બપોરના સમયે કોર્પોરેશનની ઓફિસમાં નિયમિત હાજરી આપી લોકોના પ્રશ્નોને વાચા આપતા.આધાર કાર્ડ, ચૂંટણી કાર્ડ,વિધવા પેન્શન જેવા અનેક પ્રશ્નોનો તેઓ જાતે જઈને ઉકેલ લાવતા.એક ઘટનાનો ઉલ્લેખ કરતાં તેઓએ જણાવ્યું કે, ‘એક 95 વર્ષના વૃદ્ધા પાસે આધાર કાર્ડ,ચૂંટણી કાર્ડ નહોતા. પાંચ દીકરા હોવા છતાં મુશ્કેલીમાં જીવન વિતાવતા હતા.તેઓને બંને કાર્ડ કઢાવી દીધા અને પેન્શન ચાલુ કરાવી દીધા.માજી ખૂબ ખુશ થયા અને દિલથી આશીર્વાદ આપ્યા. આવા આશીર્વાદના કારણે જ હું આજે આ સ્થાને છું. ’ તેઓનું ભવિષ્યનું કોઈ મોટું સ્વપ્ન કે યોજના નથી ,બસ લોકોની સેવામાં જીવન વિતે એ જ ઈચ્છા છે.કંચનબેનને ખૂબ ખૂબ શુભેચ્છાઓ….
ઘરમાં તેઓ હોય છે ગૃહિણીના રોલમાં
ડેપ્યુટી મેયરની ઓફિસમાં ટેબલ પાછળ બધાની શુભેચ્છાઓ ઝીલતા કંચનબેન ઘરમાં એકદમ ગૃહિણી જેવું જીવન વિતાવે છે. સવારે ઊઠીને ચા, પાણી કરવા, સાફ-સફાઈ, રસોઈ વગેરે જાતે જ કરે છે.બધું જ કામ પતાવી 9:30 વાગ્યે તૈયાર થઈ જાય છે.સામાન્ય રીતે તેઓ સાડીમાં જોવા મળે છે, ક્યારેક ફરવા જાય તો સલવાર-કુર્તા પહેરે છે. તેમને સાદું ભોજન પસંદ છે.
સાચી નિષ્ઠાથી કામ કરો
મહિલાઓને સંદેશ આપતાં તેઓએ જણાવ્યું કે હંમેશા વાદ-વિવાદથી પર રહીને કાર્ય કરો.જે કામ કરો તે પૂરી લગન અને નિષ્ઠાથી કરો.અપેક્ષા વગર કામ કરશો તો તેનું ફળ અવશ્ય મળશે જ.
ડગલે ને પગલે મળ્યો છે પતિનો સાથ
કંચન બેને જણાવ્યું કે, ‘આ ક્ષેત્રમાં આવી ત્યારે પતિ એ જ પ્રોત્સાહન પૂરું પાડ્યું હતું અને અત્યારે પણ તેમનો સંપૂર્ણ સાથ છે.’ લગ્ન જીવનના 25 વર્ષની ઉત્સાહભેર ઉજવણી કરી હતી ત્યારે રાજેશભાઈ સિદ્ધપુરા સાચા અર્થમાં જીવન સાથી સાબિત થયા છે. તેમની સાથે હંમેશા સહાયકની ભૂમિકામાં તેઓ હાજર રહ્યા છે. પરિવાર,વ્યવહાર દરેક વખતે તેઓનો સ્નેહમય સાથ હોય જ છે જેનું કંચનબેન માટે ખૂબ મહત્ત્વ છે.
રાજકોટના પ્રશ્નોના ત્વરિત ઉકેલ માટે સજ્જ
રાજકોટની જનતાના પ્રશ્નો બાબત તેઓએ જણાવ્યું હતું કે લોકોના પ્રશ્નોના ઉકેલની કામગીરી તેઓ હંમેશ માટે કરતા આવ્યા છે એ જ રીતે તેઓ આગળ પણ કરતા રહેશે. પાંચે પદાધિકારીઓ સાથે મિટિંગ કરી અને પ્રજાલક્ષી કાર્યોનું ત્વરિત નિવારણ થાય તે રીતે કાર્ય કરશે.પોતાના અનુભવનો ઉપયોગ તેઓ લોકહિતના કાર્યમાં કરશે.
લુહાર જ્ઞાતિ મંડળમાં પણ મહત્ત્વની કામગીરી
ભાજપમાં આવ્યા બાદ લુહાર સમાજ મહિલા મંડળમાં પણ ઉપપ્રમુખ અને પ્રમુખ પદ સંભાળ્યું છે. સમાજ દ્વારા પણ તેઓને સન્માનિત કરવામાં આવ્યા છે. કોરોનાના સમયમાં પણ પોતાના સમાજની સાથે રહી રોજની 1000થી 1500 કિટનું વિતરણ કર્યું. આજે પણ દર બે મહિને ચાર દીકરીઓના આદર્શ લગ્ન કરાવે છે અને લુહાર સમાજ હિતેચ્છુ મંડળ દ્વારા અનેક સેવાકીય પ્રવૃતિ પણ કરવામાં તેમનું યોગદાન છે.તેમની ડેપ્યુટી મેયર પદ પર નિમણૂંક થતાં સમસ્ત લુહાર સમાજમાં ખુશી વ્યાપી ગઈ હતી અને તેમનું સન્માન કરવામાં આવ્યું હતું.
એક નહિ 45 દિવ્યાંગ દીકરીઓની માતા બનનાર દીપિકાબેન પ્રજાપતિ દરેકને આત્મનિર્ભર બનાવવા કટીબદ્ધ છે
સ્પેશિયલ થેરાપી દ્વારા ડિસ-એબિલિટી ઓછી કરવાનો દીપિકાબેન પ્રજાપતિનો ઉત્તમ પ્રયાસ
મારી દીકરીઓ ચિત્ર સ્પર્ધા, ભરતનાટ્યમમાં નંબર લાવે છે. ઓલમ્પિક, ખેલ મહાકુંભ સહિત જિલ્લાની અન્ય સ્પર્ધાઓમાં શ્રેષ્ઠ દેખાવ કરીને પોતાનું હીર ઝળકાવે છે.અમુકને તો ગીતાના શ્ર્લોક પણ કંઠસ્થ છે. મો પર આનંદ અને ખુશી સાથેની માતાની આવી વાત સાંભળીને કોઈને થાય કે એક માતા પોતાની દીકરીઓની વાત કરી રહી છે.આ વાત માતાની જ છે પરંતુ એક નહિ અનેક દિવ્યાંગ દીકરીઓની માતા એવા દીપિકાબેન કમલેશભાઈ પ્રજાપતિની વાત છે.આંતરરાષ્ટ્રીય મહિલા દિવસ અંતર્ગત તાજેતરમાં તેઓને સુષ્મા સ્વરાજ એવોર્ડથી સન્માનિત કરવામાં આવ્યા છે ત્યારે દિવ્યાંગ દીકરીઓના જીવનમાં ખુશીના રંગો ફેલાવતી તેમની સંસ્થા એક રંગ વિષે અને તેઓની દિવ્યાંગ દીકરીઓ પ્રત્યે સેવા અને નિષ્ઠાની વાત જાણવા જેવી છે.
સુરેન્દ્રનગર જિલ્લાના નાનકડા ગામમાં જન્મ થયો.માતા સવિતાબેન રાઠોડ અને પિતા ખાતુભાઈ રાઠોડ.પિતાજીની અમદાવાદમાં બદલી થતાં અભ્યાસ અમદાવાદમાં કર્યો.બી.કોમ, એલ.એલ.બી.,પીજીડી એલસી,સ્પેશિયલ બી.એડ. (ખછ)કર્યું. લોનો અભ્યાસ ચાલતો હતો એ દરમિયાન રાજકોટમાં કમલેશભાઈ પ્રજાપતિ સાથે લગ્ન થયા.પતિ સ્કૂલમાં જોબ કરતા હતા સાથે નેશનલ સ્કૂલ ઓફ ડ્રામાના સ્ટુડન્ટ તરીકે તેઓ ગ્રામ્ય વિસ્તાર,આદિવાસી વિસ્તારના બાળકોના વિકાસ માટે સેમિનાર કરતા.આ દિવસો દરમિયાન તેઓએ મંદબુદ્ધિના બાળકોને જોયા.
દોઢ દાયકા પહેલાં સમાજમાં દિવ્યાંગ બાળકોને લઇને અવેરનેસ નહોતી.તેમની સ્થિતિ બહુ જ ખરાબ હતી.માતા-પિતા અને સમાજ દ્વારા આ બાળકો તિરસ્કૃત કરાતા.બાળકોમાં પણ દીકરીઓની સ્થિતિ વધુ ખરાબ હતી.ગામડાઓમાં દોરા-ધાગાથી લઈને શારીરિક, માનસિક ત્રાસ,શોષણ વગેરે જોઈને હૈયું હચમચી જતું હતું અને પરિણામ સ્વરૂપ 2012માં તેઓએ એક રંગ સંસ્થાનું બીજ રોપ્યું.એક દીકરીથી શરૂ કરીને આજે આ સંસ્થામાં 10 થી 30 વર્ષની વયની 45 દીકરીઓ છે. દીપિકાબેનને પણ સોશિયલ વર્કમાં રસ હતો તેથી બે બાળકોની જવાબદારી હોવા છતાં પતિનો ડગલે ને પગલે સાથ નિભાવતા હતા.એ સમયે ક્યાં ખબર હતી કે પતિ-પત્ની બંનેએ સાથે જોયેલ સ્વપ્નને પોતે એકલા હાથે સાકાર કરવાનું થશે.કોરોનાએ જેમ અનેકના પરિવાર છિન્ન-ભિન્ન કરી નાખ્યાં હતાં એ જ રીતે દીપિકાબેનના પરિવાર પર પણ આભ તૂટી પડ્યું. 21 દિવસમાં પતિ કમલેશભાઈ પ્રજાપતિ, સાસુ, સસરા ત્રણેએ અંતિમ વિદાય લીધી.પોતાના બે દીકરા સાથે 45 દિવ્યાંગ દીકરીઓની જવાબદારી માથે હતી.શું કરવું એ અસમંજસ વચ્ચે દિવ્યાંગ દીકરીઓના પ્રેમની જીત થઈ. દીપિકાબેને બંને દીકરા અને હિતેચ્છુઓ સાથે ચર્ચા કરીને એક રંગની પ્રવૃત્તિ ચાલુ રાખવાનો નિર્ણય કર્યો.
દિવ્યાંગ દીકરીઓની વાત જાણે પોતાની દીકરીઓની હોય એ રીતે દીપિકાબેન લાગણીશીલ બની જાય છે તેઓએ જણાવ્યું કે, આજે જે કંઈ પ્રવૃત્તિ ચાલે છે તેમાં દાતાઓનો ખાસ સહયોગ છે અને તેના માટે ખાસ આભારની લાગણી વ્યક્ત કરું છું.આશરે 15 જેટલા મહિલા સ્ટાફ દ્વારા મનોદિવ્યાંગ દીકરીઓની સાર-સંભાળ લેવામાં આવે છે. પૌષ્ટિકતત્ત્વોથી ભરપૂર સવાર – સાંજ નાસ્તો અને બપોર – રાત્રે ભોજન આપવામાં આવે છે.નિયમિત મેડિકલ ચેકઅપ કરવામાં આવે છે તેમજ ભજન કીર્તન પણ શીખવાડવામાં આવે છે.તેમની આટલી સાર સંભાળ થકી 6 જેટલી દીકરીઓની દિવ્યાંગતા ઘટતા તેઓને સમાજમાં પુન:સ્થાપિત થવાની તક મળી છે.આ દીકરીઓ પરિવારમાં બોજ બન્યા વગર આત્મનિર્ભર બની છે.જે દીકરીઓ પોતાનું રોજિંદું કામ પણ યોગ્ય રીતે નથી કરી શકતી તેને આત્મનિર્ભર બનાવવાનું કામ નેવાના પાણીને મોભે ચડાવવા જેવું છે આમ છતાં હિંમત હાર્યા વગર અડગ રહી કામ કરે છે.દીપિકાબેનને બે દીકરા છે જેમાં આર્ય મેડિકલમાં છે તો રુદ્ર 12માં ધોરણમાં ભણે છે.દીકરાઓની કેરિયર, સાર-સંભાળ સાથે પોતાની પ્રવૃત્તિમાં એક રંગ રહેતા દીપિકા બેનનું સ્વપ્ન રાજકોટમાં કોઈ પણ બાળક ડીસ-એબિલિટીવાળું ન હોય તે છે.તેમનું સ્વપ્ન સાકાર થાય એવી શુભેચ્છાઓ
જો તમે એક રંગમાં તમારી મદદનો રંગ ઉમેરવા માગતા હો તો 9137690064 પર સંપર્ક કરી શકો છો. તેમજ વધુ વિગતો ૂૂૂ.ફયસફિક્ષલ.જ્ઞલિ પરથી મેળવી શકો છો.
એક કલાક કોઈ પણ સેવા કાર્ય માટે રાખો
મહિલાઓને સંદેશ આપતા તેઓએ જણાવ્યું હતું કે, દરેક સ્ત્રી જો ટાઈમ મેનેજમેન્ટ કરે તો એક કલાક
કોઈપણ સેવા કાર્ય માટે આપી શકે. જરૂૂરી નથી તમે કોઈ સંસ્થા સાથે જોડાવ, રોજ એક કલાક કોઈપણ સદ્કાર્ય માટે ફાળવશો તો ખૂબ જ આત્મસંતોષ પ્રાપ્ત થશે.
સેવાના અનેક રંગ ધરાવતી ‘એક રંગ’
એક રંગ ચિલ્ડ્રન્સ ડેવલપમેન્ટ ઇન્સ્ટિટયૂટના પ્રમુખ દીપિકાબેન પ્રજાપતિએ જણાવ્યું હતું કે, અહીં દિવ્યાંગ દીકરીઓને નિ:શુલ્ક રહેવા, ભણવા અને અન્ય પ્રવૃત્તિઓ કરાવવામાં આવે છે.જે દીકરીનું કોઈ ન હોય,સિંગલ પેરન્ટમાં પિતા હોય કે બીમાર માતા-પિતા હોય તેમને અહીં એડમિશન આપવામાં આવે છે. અહીં મનોદિવ્યાંગ, અપંગ, ઓટીઝમ, સેરેબ્રલ પાલ્સી, અટેન્શન ડેફિસિટ હાયપર એક્ટિવિટી ડીસઓર્ડર સહિતની વિકલાંગતા ધરાવતી આશરે 45 મનોદિવ્યાંગ દિકરીઓને નિ:શુલ્ક થેરાપી અને ડે-કેર તાલીમ આપવામાં આવે છે.સંસ્થા મનોદિવ્યાંગ બહેનોની ડિસેબિલિટી ઘટાડવા માટે ખાનગી ડોકટરો અને તજજ્ઞો દ્વારા ફિઝિયોથેરાપી,ઓક્યુપેશનલ થેરાપી, સેન્સરી ઇન્ટિગ્રેશન થેરાપી સ્પીચ એન્ડ લર્નિંગ, આર્ટ એન્ડ ક્રાફટ, મ્યુઝિક એન્ડ ડાન્સ, સાઉન્ડ હીલિંગ, હાઇડ્રો અને પ્લે થેરાપી આપવામાં આવે છે. તેમજ સ્પેશિયલ એજ્યુકેશન, પ્રિ-વોકેશનલ તાલીમ, બાળકો અને વાલીઓનું કાઉન્સેલિંગ કરવામાં આવે છે. દીકરીઓને પ્રવાસમાં પણ લઈ જવામાં આવે છે. રાજ્ય અને રાષ્ટ્રીય કક્ષાએ સ્પોર્ટ્સમાં પણ દીકરીઓએ નામ રોશન કર્યું છે. જે થેરાપી દ્વારા દિવ્યાંગ દીકરીઓની તકલીફ ઝડપથી દૂર થઈ શકે તે થેરાપી શરૂ કરવામાં આવી છે.ખાનગી હોસ્પિટલમાં એક ક્લાકની જે થેરાપીના આશરે 1100 થી 1200 રૂપિયા ચાર્જ લેવાય છે તે અહીં નિ:શુલ્ક આપવામાં આવશે.
દિવ્યાંગ બાળકોને પ્રેમ આપો
દિવ્યાંગ બાળકો સમાજની ઉપેક્ષાનો ભોગ બનતા હોય છે જે બાબતે દીપિકાબેને જણાવ્યું કે ઘણી વખત આવા બાળકોની સમાજમાં મશ્કરી થતી હોય છે પરંતુ આવું વર્તન યોગ્ય નથી.તેઓને તમારી દયાની નહીં પરંતુ પ્રેમ અને હૂંફની જરૂર છે.
ઝાલાવાડ જીનિંગ મંડળીના કૌભાંડમાં નવ સામે ગુનો નોંધાતા ખળભળાટ
મોદી વિરોધી પોસ્ટર લગાવનાર ‘આપ’ સામે ગુનો
ચોટીલાની સરકારી શાળામાં તાંત્રિક વિધી થતી હોવાના આક્ષેપથી ખળભળાર્ટ
ચોટીલાના ખેરડી અને પાળિયાદ પંથકમાં પાણીચોરી કરતાં 10 શખ્સો ઝડપાયા
હેન્ડિકેપ યુવાનનું અપહરણ કરી 92,500ની લૂંટ
રામનવમીએ ભાજપ-કોંગ્રેસની તલવારબાજી
ચોટીલાના ખેરડી અને પાળિયાદ પંથકમાં પાણીચોરી કરતાં 10 શખ્સો ઝડપાયા
હેન્ડિકેપ યુવાનનું અપહરણ કરી 92,500ની લૂંટ
રામનવમીએ ભાજપ-કોંગ્રેસની તલવારબાજી
છોટી કાશીમાં સતત 42મા વર્ષે રામસવારી નીકળી, ફલોટ્સ બન્યા આકર્ષણનું કેન્દ્ર
જૂનાગઢમાં એસઆરપી જવાનનાં મોતના મામલે મોરબીમાં કલેકટરને આવેદન
દ્વારકા જિલ્લામાં 74,905 કુંટુબોને પ્રધાનમંત્રી જન આરોગ્ય યોજનાના કાર્ડનું કરાયું વિતરણ
છોટી કાશીમાં સતત 42મા વર્ષે રામસવારી નીકળી, ફલોટ્સ બન્યા આકર્ષણનું કેન્દ્ર
જૂનાગઢમાં એસઆરપી જવાનનાં મોતના મામલે મોરબીમાં કલેકટરને આવેદન
દ્વારકા જિલ્લામાં 74,905 કુંટુબોને પ્રધાનમંત્રી જન આરોગ્ય યોજનાના કાર્ડનું કરાયું વિતરણ
જંત્રીમાં વધારા પહેલાં મોરબીમાં દસ્તાવેજોના સ્લોટો હાઉસફુલ
1 એપ્રિલથી લાગુ થશે બજેટમાં ઘોષિત આ 10 મોટા ફેરફાર; જાણો ક્યાં મળશે રાહત,ક્યાં થશે વધુ ખર્ચ
