હીરાનો ટોચનો વેપારી પરિવાર ‘સંયમ પંથે’

અમદાવાદ: હર્યોભર્યો પરિવાર અને એક પ્રતિષ્ઠિત ડાયમંડ કંપનીમાં માર્કેટિંગ હેડ જેવી જોબ સાથે 6 આંકડાની સેલેરી તમામ સુખ-સુવિધાઓ વચ્ચે રહેતા વિપુલ શેઠ(42)ના પુત્રે સંસાર છોડીને દીક્ષા લેવાનો નિર્ણય કર્યો આ સાથે જ પુત્રના પગલે ચાલવામાં પિતાને પણ બહુ સમય ન લાગ્યો અને તેમની સાથે તેમના પત્ની અને પુત્રી પણ જોડાયા.
આગામી 2 ડિસેમ્બર વિપુલ શેઠ(42), તેમના પત્ની નિપુના(41), પુત્રી હીર(14) અને પુત્ર જૈનાર્થ(12) સાથે સુરત નજીક દીક્ષા ગ્રહણ કરશે. વિપુલ શેઠે કહ્યું કે, ‘હું જ્યારે 25 વર્ષનો હતો ત્યારે મારે દીક્ષા ગ્રહણ કરવી હતી જો કે તે શક્ય ન બન્યું અને મારા લગ્ન થયા બાદ હું સાંસારિક વ્યક્તિ બની ગયો. પરંતુ ભાવિમાં લખાયેલું હશે તે કોણ દૂર કરી શકે. મારા પુત્રને સંસાર ત્યાગવાની ઈચ્છા થઈ અને તેણે દ્રઢ નિશ્ર્ચય દેખાડ્યો ત્યારે મારા અંદર ક્યાંક ધરબાયેલી ઈચ્છા ફરી જાગી અને દ્રઢ નિશ્ર્ચયમાં પરીણમી.’
શેઠે કહ્યું કે મારા પુત્રે સૌથી પહેલા તે 7 વર્ષનો હતો ત્યારે દીક્ષા લેવા માટે માગણી કરી હતી. જેથી મેં તેને થોડો સમય રાહ જોવા અને પોતાના નિર્ણય પર વિચાર કરવા કહ્યું હતું. જો કે આટલા વર્ષે પણ તે મક્કમ રહ્યો હતો. છેલ્લા બે દાયકાથી મુંબઈમાં રહેતા પરંતુ મૂળ સ્વરૂપે ગુજરાતના બનાસકાંઠા જિલ્લાના દાંતિવાડાના શેઠ અને તેમનો પરિવાર આગામી 2 ડિસેમ્બરે દીક્ષા ગ્રહણ કરશે.
વિપુલ શેઠના ભાઈ કેતન શેઠે કહ્યું કે, અમારા સમાજ માટે આ પહેલો મોકો હશે કે બનાસકાંઠાના 60 જેટલા ગામડાઓમાં વસતા લોકો એક વિશાળ ધાર્મિક કાર્યમાં ભેગા થશે અને જ્યારે આખો પરિવાર દીક્ષા ગ્રહણ કરતો હોય તેવા દિવ્ય પ્રસંગના સાક્ષી બનશે.

રિલેટેડ ન્યૂઝ