સૌરાષ્ટ્રમાં 5 સહિત રાજ્યમાં 10 વૃધ્ધાશ્રમ બનાવાશે

ગાંધીનગર, તા.9
ભારતીય સમાજ તેના પારિવારિક મૂલ્યો માટે વખણાય છે. પરંતુ હવે સમાજમાં ઝડપી પરિવર્તન આવી રહ્યું હોવાથી સંયુક્ત કરતા વિભક્ત કુટુંબોની સંખ્યામાં વધારો થઈ ગયો છે. આથી જ ગુજરાત સરકારે રાજ્યમાં જેની સારસંભાળ રાખવા માટે કોઈ ન હોય એવા વૃદ્ધો માટે નવા ઘરડાં ઘર શરૂ કરવાની પહેલ કરી છે. અત્યારે રાજ્ય સરકાર પાંચ વૃદ્ધાશ્રમ ચલાવે છે. સરકારે 10 નવા વૃદ્ધાશ્રમ માટેની પરવાનગી આપી દીધી છે. નવા ઘરડાં ઘર અમરેલી, પોરબંદર, બોટાદ, સોમનાથ, દેવભૂમિ દ્વારકા, ડાંગ, અરવલ્લી, તાપી, છોટા ઉદેપુર અને વલસાડ જિલ્લામાં ખોલવામાં આવશે.
આ ઉપરાંત સરકાર ગુજરાતના વિવિધ ભાગમાં વૃદ્ધાશ્રમ ચલાવતી 45 જેટલી સામાજિક સંસ્થાઓને ગ્રાન્ટ પણ આપે છે. સરકારે આ સંસ્થાઓના ફંડિંગમાં પણ વધારો કરવાનો નિર્ણય કર્યો છે. નવા ઘરડાં ઘર રાજ્યના નાના શહેરોમાં ખૂલશે. સરકાર લાંબા ગાળે બધા જ જિલ્લામાં વૃદ્ધાશ્રમ શરૂ કરવા માંગે છે. શરૂઆતમાં આ આશ્રમ ભાડે લીધેલી જગ્યા પર ઊભા કરાશે. સરકાર ધીરે ધીરે ત્યાં પોતાનું બિલ્ડિંગ બાંધશે.
સામાજિક ન્યાય અને અધિકારિતા વિભાગના પ્રિન્સિપાલ સેક્રેટરી મનોજ અગ્રવાલે જણાવ્યું, વિવિધ કારણોસર ઘરડા ઘરની ડિમાન્ડમાં વધારો થયો છે. શરૂઆતમાં અમે દરેકમાં 50 લોકોને આશ્રય આપીશું. ધીરે ધીરે તેની કેપેસિટી વધારવામાં આવશે.
અગ્રવાલે જણાવ્યું કે ઘરડાં ઘર ચલાવતી એનજીઓને હવે વધુ ગ્રાન્ટ આપવામાં આવશે પરંતુ આ જ પ્રવૃત્તિ કરતી ખાનગી સંસ્થાઓને કોઈ લાભ નહિ મળે. એક અધિકારીએ જણાવ્યું, અમારો આશય એવા વૃદ્ધઓને મદદ કરવાનો છે જેમને પ્રાઈવેટ વૃદ્ધાશ્રમ પરવડે તેમ નથી અને તેમની પાસે પરિવારનો કોઈ ટેકો નથી. સમાજશાસ્ત્રી ગૌરાંગ જાનીએ સરકારના આ પગલાને બિરદાવતા કહ્યું કે સરકારને વધુ વૃદ્ધાશ્રમ ઊભી કરવાની જરૂર સમજાઈ તે ખરેખર મોટી વાત છે. તેમણે કહ્યું, હવે પરિવારનું માળખુ બદલાતા આપણને વૃદ્ધો માટે આવા વધુ ઘરની જરૂર છે. ઘણા કેસમાં બાળકો વિદેશ કે પછી દેશના બીજા કોઈ ભાગમાં રહેતા હોય છે. આવા ઘરોથી વૃદ્ધો સન્માન સાથએ જીવી શકશે.

રિલેટેડ ન્યૂઝ