મૃતક સભાસદોની સહી કરાઈ હોવાનો આક્ષેપ, ભાજપના બે જૂથ સામસામે, સહકારી ક્ષેત્રમાં ચકચાર
સુરેન્દ્રનગરની ઝાલાવાડ જિનીંગ એન્ડ પ્રેસીંગ સહકારી મંડળી લિમિટેડમાં મોટાપાયે ભ્રષ્ટાચાર થયો હોવાની રાવ 2 વર્ષ પહેલા વ્યકત કરાઈ હતી. સહકારી ક્ષેત્રે અને પોલીસ વિભાગમાં અનેક રજૂઆતો બાદ કોઈ કાર્યવાહી ના થતા અંતે સભાસદ એવા અરજદારે સુરેન્દ્રનગર એડીશનલ ચીફ કોર્ટમાં પોલીસ ફરિયાદ દાખલ કર્યો હતો. જેમાં કોર્ટે ગત 24મીએ જવાબદારો સામે છેતરપિંડીનો ગુનો દાખલ કરવાનો પોલીસને હુકમ કરતા જિલ્લાના સહકાર ક્ષેત્રમાં ખળભળાટ મચી ગયો હતો. ત્યારે કોર્ટના હુકમ બાદ 6 દિવસે એ ડીવીઝન પોલીસ મથકે મંડળીના પ્રમુખ સહિત 9 સામે ગુનો નોંધાયો છે.
ઝાલાવાડ જીનીંગ એન્ડ પ્રેસીંગ સહકારી મંડળી લિમિટેડ વર્ષ 1957માં ખેડૂત સભાસદોના હિતમાં ઉભી કરવામાં આવી હતી. મંડળીમાં સમય જતા હોદેદારો અને વહીવટકર્તાઓના ગેરવહીવટને લીધે મંડળી 10-7-1993ના રોજ ફડચામાં લઈ જવાની કાર્યવાહી શરૂૂ કરાઈ હતી અને મંડળી ત્યારથી એટલે કે, છેલ્લા 30 વર્ષથી ફડચામાં છે. ફડચામાં ગયેલી આ મંડળીને વર્ષ 2020માં પુન: જીવીત કરાઈ હતી. અને ત્યારબાદ રૂૂપીયા 2.66,75,000ની જમીન જંત્રી કરતા ઉંચા ભાવે વઢવાણ તાલુકાના દેદાદરા ગામ પાસે ખરીદી કરવામાં આવી હતી. આ સમગ્ર વાત બહાર આવતા વસ્તડીના વજુભાઈ અલુભાઈ ગોહીલે સમગ્ર કૌભાંડ વર્ષ 2021માં છતું કર્યું હતું.
આ કૌભાંડ અંગે ગત 25-10-2021ના રોજ સહકારી વિભાગમાં છેક ગાંધીનગર અને દિલ્હી સુધી તથા પોલીસ વિભાગમાં પણ જિલ્લા પોલીસ વડા અને ગૃહમંત્રી સુધી રજુઆતો થઈ હતી. જેમાં 12-03-2020ના રોજ મંડળીને પુન: જીવીત કરવા જિલ્લા રજીસ્ટ્રાર સહકારી મંડળીઓમાં 61 સભાસદોની સહી સાથે અરજી કરાઈ હતી. પરંતુ મંડળીના સભાસદોની મળેલી બેઠકમાં 7 સભાસદો મૃત્યુ પામેલા હોવા છતાં તેઓને જીવંત દર્શાવી સહીઓ કરી હતી અને 21 સભાસદો ગેરહાજર હોવા છતાં તેઓની સહી કરી હાજર દર્શાવાયા હોવાનું રજુઆતમાં જણાવાયું હતું. આ સમગ્ર રજુઆતો બાદ પણ પોલીસ તરફથી કોઈ ગુનો દાખલ ન થતા અંતે વજુભાઈ ગોહીલે 13-12-2021ના રોજ સુરેન્દ્રનગર એડીશનલ ચીફ જયુડીશયલ કોર્ટમા કેસ દાખલ કર્યો હતો. જેમાં 24 માર્ચના રોજ કોર્ટે આ કેસમાં અરજદારની અરજી મુજબ દોષીત વ્યકતીઓ સામે છેતરપિંડીની કલમો સાથે ફોજદારી ગુનો દાખલ કરવા હુકમ કર્યો હતો.
કોર્ટના હુકમના 6 દિવસ બાદ ગત 29મી માર્ચના રોજ મોડી સાંજે ઝાલાવાડ જીનીંગ એન્ડ પ્રેસીંગ સહકારી મંડળી લીમિટેડના કૌભાંડમાં પોલીસ છેતરપીંડીની કલમો સાથે કેસ દાખલ કરતા જિલ્લાના સહકાર ક્ષેત્રમાં ખળભળાટ મચી ગયો છે. આ છેતરપિંડીના ખેલની વધુ તપાસ પીએસઆઈ જી.એન. શ્યારા ચલાવી રહ્યા છે.આ અંગે ઝાલાવાડ જીનિંગ કૌભાંડ કેસના ફરિયાદી વજુભાઈ ગોહીલે જણાવ્યુ કે, મને ન્યાય તંત્ર પર પુરો ભરોસો હતો, અને આથી જ કોર્ટે ફરીયાદ દાખલ કરવાનો હુકમ કર્યો હતો. આ ખેડ્વોના પરસેવાની કમાણી છે. તેમાં ગેરરીતિ કરનારને પોલીસ પણ નહીં છોડે અને સરકાર પણ બક્ષસે નહીં. આગામી સમયમાં પણ નામદાર કોર્ટે દોષિતોને કડક સજા કરશે તેનો મને વિશ્વાસ છે.
કોની કોની સામે ફરિયાદ દાખલ થઈ
રાયમલભાઈ ગોવીંદભાઈ ચાવડા(મૂળ ખોલડીયાદ, તા. વઢવાણ, હાલ રહે દેદાદરા)
રામજીભાઈ હરીભાઈ ગોહીલ (મૂળ ખોલડીયાદ, તા. વઢવાણ, હાલ રહે રામ દરબાર સોસાયટી, વઢવાણ)
હરીસંગભાઈ મનુભાઈ ડોડીયા(રામ દરબાર સોસાયટી, વઢવાણ)
લખમણભાઈ મગનભાઈ કોળી પટેલ(કુલગ્રામ, તા. વઢવાણ)
પ્રતાપભાઈ મોહનભાઈ ચાવડા(રામપરા, તા. વઢવાણ)
મોહનભાઈ નારાયણભાઈ ચાવડા(બાકરયળી, તા. વઢવાણ)
લાલજીભાઈ તુકારામભાઈ પટેલ(માળોદ, તા. વઢવાણ)
કરશનભાઈ નરશીભાઈ જાદવ(બજરંગપુરા, તા, લખતર)
ભરતભાઈ માનસંગભાઈ ચૌહાણ(વાડલા, તા. વઢવાણ)
જેસીંગભાઈ ભવાનભાઈ ડોડિયા(દેદાદરા, તા. વઢવાણ)
ડી.ડીમોરી (નિવૃત ફડચા અધિકારી, રહે.ખમીસાણા રોડ, સુરેન્દ્રનગર)
