પોતાના અભિનયની આભાથી ટેલિવિઝન અને રંગભૂમિના તખ્તા પર રાજ કર્યું છે સ્વાતિ શાહે

‘પ્યાર કા પહેલા નામ રાધા મોહન’ની કાદમ્બરીની જેમ જ ઘર,કેરિયર,પરિવારને સાચવે છે સ્વાતિ શાહ

મુંબઈ ટાટા મેમોરિયલ હોસ્પિટલમાં એક મહિલા જીવનના છેલ્લા શ્વાસો ગણી રહી હતી.તેની અભિનેત્રી પુત્રીનો એ જ સમયે કોમેડી નાટકનો શો હતો.દીકરીનું મન માતા પાસે હતું પણ એક કલાકાર તરીકે રંગભૂમિ પ્રત્યે પણ તેની ફરજ હતી. મન મક્કમ કરી માતાને મન ભરીને જોઈ લીધા બાદ પોતાના શો માટે જાય છે. મનમાં માતાની ચિંતા છતાં રંગભૂમિ પર હાસ્યપ્રધાન ભૂમિકા નિભાવવાની હતી.આમ છતાં શો મસ્ટ ગો ઓન વિચારી પોતાની ભૂમિકાને પૂરતો ન્યાય આપે છે.ઓડિયન્સમાં તાળીઓના ગડગડાટ વચ્ચે હૈયાનો એક ખૂણો માંની ચિંતામાં ભીનો હતો.પોતાનો શો શરૂ થયો હતો ત્યારે જ હોસ્પિટલમાં માતાએ છેલ્લા શ્વાસો લઈ લીધા હોય છે પરંતુ તેના પતિએ તેની કાળજી રાખતા આ સમાચાર તેના સુધી પહોંચવા દીધા નહિ. જ્યારે ઘરે પહોંચે છે ત્યારે જાણ થાય છે કે માતાએ દુનિયા છોડી દીધી છે.આ અભિનેત્રી પુત્રી એટલે નાટક, ફિલ્મ અને ટેલિવિઝનના ખૂબ જાણીતા કલાકાર સ્વાતિ શાહ.
કચ્છી લોહાણા પરિવારમાં જન્મ, અભ્યાસ અને ઉછેર માયાનગરી મુંબઈમાં જ થયો. હોમ સાયન્સ સાથે ડિપ્લોમા અને આર્ટસમાં ગ્રેજ્યુએશન કર્યું, નાનપણથી જ ગાવાનો ખૂબ શોખ હતો. શાળા-કોલેજના કાર્યક્રમો,સ્ટેજ શો અને નવરાત્રીના કાર્યક્રમો પણ ઘણા કર્યા.આવા જ એક કાર્યક્રમમાં ગુજરાતી ફિલ્મ માટેની ઓફર આવી. ગુજરાતી ફિલ્મ બાદ 1996ની સાલમાં રાજેન્દ્ર બૂટાલા સાથે નાટક કરી કોમર્સિયલ થિયેટરમાં પગ મૂક્યો. ‘સુગંધનું સરનામું’ નાટકમાં સહકલાકાર પરાગ શાહ સાથે મિત્રતા થઈ અને ત્રણ વર્ષની મિત્રતા બાદ લગ્ન કરવાનું નક્કી કર્યું પરંતુ માતાએ કેરિયર પર ધ્યાન કેન્દ્રિત કરવા લગ્નની સંમતિ ન આપી,જેથી એક જોડી કપડાં અને વેનિટી બેગ લઈ ભાગીને લગ્ન કર્યા.
લગ્ન બાદ જીવનનો સંઘર્ષ શરૂ થયો. મોટા ફ્લેટમાં રહેતા સ્વાતિ શાહે સંયુક્ત કુટુંબ સાથે વન રૂમ કિચનમાં જિંદગી શરૂ કરી. સવારે 5:00 વાગે ઊઠે ત્યારથી લઈ અને રાત્રિના નાટક પૂરા થાય ત્યાં સુધી કામ,કામ અને કામ જ રહેતું.2000ની સાલમાં પરેશ રાવલના થિયેટર ગ્રુપમાંથી ‘શાદી બરબાદી ડોટ કોમ’ હિન્દી નાટક માટે પતિ-પત્ની બંનેને ઓફર મળી. આ નાટકે કારકિર્દીને તો વેગ આપ્યો જ સાથે-સાથે આર્થિક ગાડી પણ પાટા પર ચડી ગઈ. ઘરનું ઘર લીધું, નામ, દામ અને કામ મળ્યા. આ નાટકે અમેરિકામાં જ 100 જેટલા શો પૂરા કર્યા.2004માં પુત્રનો જન્મ થયો.બાળકની સંભાળ,નાટકોના રિહર્સલ,ત્રણ-ત્રણ શિફ્ટમાં કામ વચ્ચે પણ કારકિર્દીમાં નિખાર આવતો રહ્યો.ભારતના પ્રથમ ડેઇલી શો ‘એક મહલ હો સપનો કા’ માં દિગ્ગજ કલાકારો સાથે કામ કરવા મળ્યું એ સફર ખૂબ યાદગાર હતી.2007ના વર્ષમાં તીન બહુરાનિયા,સાથ નિભાના સાથિયા સહિતની લોકપ્રિય સિરિઅલો મળી અને અત્યારે પ્યાર કા પહેલા નામ રાધા મોહન ધૂમ મચાવે છે. કામની બાબતમાં સ્વાતિ પોતાની જાતને ખૂબ જ ભાગ્યશાળી માને છે કારણ કે તેઓને ખૂબ સારા નાટકો મળ્યા જેના કારણે પોતાને અને નિર્માતા નિર્દેશકને ફાયદો થયો.અભિનય ક્ષેત્રે તેમને દરેક પ્રકારના રોલ મળ્યા છે જે તેઓએ બખૂબી નિભાવ્યા છે.અવાજથી લઈને આંખો,હાવભાવ દ્વારા સંપૂર્ણ પાત્ર વ્યક્ત કરનાર આ જાજરમાન અભિનેત્રીને ઉજ્જવળ ભવિષ્ય માટે ખૂબ ખૂબ શુભકામનાઓ…..

થિયેટર અને સિરિઅલોએ આપી આગવી ઓળખ : ગુજ્જુભાઈ ધ ગ્રેટ ફિલ્મ બેસ્ટ સપોર્ટિંગ એક્ટરનો રાષ્ટ્રીય એવોર્ડ મેળવનાર સ્વાતિ શાહની ફિલ્મો,સિરિઅલો અને નાટકોની યાદી લાંબી છે.તેઓને અનેક વખતનો મિનેશન મળેલા છે તેમજ એવોર્ડ મળેલા છે. નાટકોમાં લાજવંતીથી શરૂૂ કરીને બીજી નજરનો પ્રેમ, સુગંધનું સરનામું, કઠપૂતળી,મારો સમય તારો સમય, બસ કર બકુલા સહિત અનેક નાટકો છે અને સિરિઅલોની વાત કરીએ તો હમ પાંચ,રેશમ ડંખ, અફલાતૂન,હમ દોનો હે અલગ અલગ,સાથ નિભાના સાથિયા,જિંદગી મેરે ઘર આના, તીન બહુરાનિયા સહિત ઘણી સિરિઅલોમાં તેઓએ અભિનય આપ્યો છે.

દરેક સ્ત્રીએ પગભર હોવું જોઈએ : મહિલાઓને સંદેશ આપતા સ્વાતિ શાહે જણાવ્યું કે દરેક સ્ત્રીએ પગભર હોવું જોઈએ. દુનિયાને કે પુરુષને પાછળ છોડવા માટે નહિ પરંતુ તમારી પોતાની ઓળખ માટે અને તમારામાં જે આવડત છે તે બહાર લાવવા માટે જરૂરી છે. જે કરો તેમાં ખુશી મળે એવું કરો,તમારી ખુશી બીજા પર ડીપેન્ડન્ટ ન હોવી જોઈએ. કંઈક કરશો તો માનસિક રીતે પણ બેલેન્સ રહી શકશો.

રિયલ લાઈફમાં પણ પતિ સાથી બની સાથ નિભાવે છે
સ્વાતિ શાહે જણાવ્યું કે પોતાના જીવનમાં પતિ પરાગ શાહનો સાથ બેક બોન જેવો છે.ડગલે ને પગલે,દરેક પરિસ્થિતિમાં પતિએ સાથ આપ્યો છે. પોતે આજે જે સ્થાન પર છે તે બદલ પતિ અને સાસુ, સસરા, દિયર, દેરાણી,નણંદ બધાનો ખૂબ આભાર માને છે. પરિવારને મહત્વ આપતા સ્વાતિ શાહ પોતાની જાતને નસીબદાર માને છે કે તેમને પરિવારનો પ્રેમ અને સહકાર મળ્યો છે. સ્વાતિ બહુ મહત્વાકાંક્ષી નથી એટલે ભવિષ્યના બીજા કોઈ સ્વપ્ન નથી પરંતુ દીકરા કથનને વિદેશમાં ભણવવાનાં સ્વપ્ન સાથે પોતાનું પણ સ્વપ્ન જોડાયું હતું જે હમણાં જ પૂરું થયું છે.

• ભાવના દોશી