રણનીતિ ઘડવા બેઠક યોજાઇ, તાલુકાથી રાજ્ય સ્તર સુધી સંગઠન મજબૂત કરવા નિર્ણય

ગુજરાત વિધાનસભાની ચૂંટણીમાં આમ આદમી પાર્ટીએ તમામ બેઠકો પર પોતાના ઉમેદવારો ઉભા રાખ્યા હતાં. દિલ્હીના મુખ્યમંત્રી કેજરીવાલ અને પંજાબના મુખ્યમંત્રી ભગવંત માનની રેલીમાં સેંકડો લોકો જોડાતા હતાં. તે છતાં પણ પાર્ટીના પ્રદેશ પ્રમુખ ગોપાલ ઈટાલિયા અને ઈસુદાન ગઢવી જેવા નેતાઓને પરાજયનો સામનો કરવો પડ્યો હતો. આ ચૂંટણીમાં રાજકીય નિષ્ણાંતોના મતે આમ આદમી પાર્ટીના કારણે જ કોંગ્રેસને કારમો પરાજય મળ્યો છે. પરંતુ હવે આગામી લોકસભા ચૂંટણીને લઈને આમ આદમી પાર્ટી ફરીવાર સક્રિય થઈ ગઈ છે. સંગઠનને મજબૂત કરવા તેમજ આગળના કાર્યક્રમો માટે આમ આદમી પાર્ટીના હોદ્દેદારોની એક બેઠક મળી હતી.
આમ આદમી પાર્ટીના હોદ્દેદારોએ એક બેઠકમાં આગામી કાર્યક્રમો અંગે ચર્ચાઓ કરી હતી. તેમજ સંગઠનને વધુ મજબૂત કરવા માટે શું કરવું જોઈએ તેની વિગતો મેળવી હતી. આમ આદમી પાર્ટીના પ્રદેશ પ્રમુખ ગોપાલ ઈટાલિયાએ ટ્વિટર પર ટ્વિટ કરીને જણાવ્યું હતું કે, આમ આદમી પાર્ટીના આગળના કાર્યક્રમો તેમજ સંગઠનમાં વધુ મજબૂતી લાવવાના આયોજન સંદર્ભે મિટિંગ મળી હતી. તેમણે મીટિંગના કેટલાક ફોટો પણ ટ્વિટર પર ટ્વીટ કર્યાં હતાં.
હાલમાં આમ આદમી પાર્ટીએ ગુજરાતની ચૂંટણી લડીને રાષ્ટ્રીય પક્ષનો દરજ્જો મેળવી લીધો છે. ગુજરાતમાંથી આમ આદમી પાર્ટીએ વીસાવદર, ગારિયાધાર, જામજોધપુર, બોટાદ અને ડેડીયા પાડા બેઠક પરથી જીત મેળવી છે.

એક મતદાન મથક દીઠ સરેરાશ 60 હજારનો થયો ખર્ચ; ગત ચૂંટણી કરતા 10 થી 15 હજાર બૂથ દીઠ ખર્ચ વધ્યો : ચૂંટણી પંચ પાસેથી ગ્રાંટ મગાઈ

રાજકોટ શહેર સહિત જિલ્લાની 8 વિધાનસભા બેઠકમાં તાજેતરમાં થયેલી ચૂંટણી પાછળ સરકારી તંત્રને આશરે 14 કરોડનો ખર્ચ થયો છે. મતદાન મથક ખાતે મતદારો માટે ઉભી કરવામાં આવેલી સુવિધા પાછળ ખર્ચની ચુકવણી કરવા માટે ચૂંટણી પંચ પાસેથી ગ્રાંટ માંગવામાં આવી છે.
રાજકોટ શહેરમાં 1143 સહિત જિલ્લામાં 2264 મતદાન મથક છે તેમાં મતદાનના દિવસે મંડપ, પાણી, રેમ્પ, સ્ટાફ, વિડિયોગ્રાફી સહિતની સુવિધા ઉભી કરવામાં આવી હતી. બુથ ઉપર મતદારોને કોઈ અગવડતા ન પડે તે માટે એક બુથ દીઠ સરેરાશ રૂા.60 હજારનો ખર્ચ કરવામાં આવ્યો હોવાનું ચૂંટણી શાખાના સુત્રોએ જણાવ્યું હતું.
સામાન્ય રીતે એક મતદાન મથક દીઠ ચૂંટણી પંચ દ્વારા ખર્ચની મર્યાદા નક્કી કરવામાં આવતી હોય છે ગત વિધાનસભાની ચૂંટણીમાં પંચે 40 હજાર સુધીનો ખર્ચ કરવાની મંજુરી આપી હતી પરંતુ રાજકોટ શહેર-જિલ્લામાં અનેક બુથમાં ખર્ચ ઓછો થયો હતો. જ્યારે અમુક બુથમાં ખર્ચ વધી ગયો હતો. જો કે ગત ચૂંટણીમાં એક બુથ દીઠ સરેરાશ 50 હજાર આસપાસ ખર્ચ કરવામાં આવ્યો હતો.
આ વખતે સરકારી તંત્રને મોંઘવારી નડી હોય તેમ ગત વખત કરતા આ વખતે એક બુથ દીઠ સરેરાશ 10 થી 15 હજાર સુધીનો વધુ ખર્ચ થયો છે જો કે હજુ સત્તાવાર રીતે ખર્ચના હિસાબો રજુ કરવામાં આવ્યા નથી પરંતુ આગામી સોમવાર સુધીમાં તમામ 8 વિધાનસભા મત વિસ્તારના ચૂંટણી અધિકારી દ્વારા ખર્ચના હિસાબ રજુ કરી દેવામાં આવશે.
અત્યાર સુધીમાં ચૂંટણી પંચ દ્વારા રાજકોટ જિલ્લા વહીવટી તંત્રને ખર્ચ પેટે માત્ર અઢી કરોડ રૂપિયાની ગ્રાંટ ફાળવવામાં આવી છે આઠ વિધાનસભા બેઠકમાં સરકારી તંત્રને રૂા.13.59 કરોડનો ખર્ચ થયો હોય વધુ 10 કરોડનું ચુકવણુ કરવા માટે પંચ પાસે ગ્રાંટની માંગણી કરવામાં આવી છે.

અડધા સ્ટાફને ચુકવણુ બાકી
ચૂંટણી કામગીરી માટે રોકાયેલ 8000થી વધુ સ્ટાફમાંથી 50 ટકા સ્ટાફને કામગીરીનું વળતર ચુકવી દેવામાં આવ્યું છે. પી-1ને રૂા.1650 (4 દિવસ) અને પી-2 ને રૂા.1500નું મહેનતાણુ આપવામાં આવે છે. ચૂંટણી પંચે ગ્રાંટ રીલીઝ નહીં કરતા 50 ટકાથી વધુ સ્ટાફને મહેનતાણુ ચુકવાયું નથી.

 

ભૂપેન્દ્ર પટેલે આજે બીજી વખત ગુજરાતના મુખ્યમંત્રી તરીકે શપથ લીધા હતા. વડાપ્રધાન નરેન્દ્ર મોદી, ગૃહમંત્રી અમિત શાહ, ભાજપ અધ્યક્ષ જેપી નડ્ડા સહિત ભાજપ શાસિત રાજ્યોના અનેક કેન્દ્રીય મંત્રીઓ અને મુખ્યમંત્રીઓ શપથ ગ્રહણ સમારોહમાં સામેલ થયા હતા. હવે ભૂપેન્દ્ર સરકારના મંત્રીઓ શપથ લઈ રહ્યા છે. ચાલો જાણીએ કે તેમાં કોણ કોણ સામેલ છે? કેટલા જૂના અને નવા ચહેરાઓને સ્થાન મળ્યું ?

BJP's Bhupendra Patel takes oath as the Chief Minister of Gujarat for the second consecutive time. pic.twitter.com/TcWIq5HcYc

— ANI (@ANI) December 12, 2022

1. હર્ષ સંઘવી : અગાઉની ભૂપેન્દ્ર પટેલ સરકારમાં તેઓ ગૃહ રાજ્યમંત્રી હતા. મજુરાથી ધારાસભ્ય હર્ષ યુવાન છે અને તેને ફરી મંત્રી બનાવવામાં આવી શકે છે.

2. કનુભાઈ દેસાઈ : પારડીના ધારાસભ્ય કનુભાઈ દેસાઈને ભૂપેન્દ્ર પટેલ સરકારમાં ફરી સ્થાન મળ્યું છે. કનુભાઈએ મંત્રીપદના શપથ લીધા.

3 ઋષિકેશ પટેલઃ વિસનગરના ધારાસભ્ય ઋષિકેશ પટેલને ફરી મંત્રી પદ મળ્યું છે. ઋષિકેશ પાછલી સરકારમાં આરોગ્ય પ્રધાન હતા.

4.પુરુષોત્તમભાઇ સોલંકી : ભાવનગર ગ્રામ્યના ધારાસભ્ય પુરુષોત્તમભાઇ સોલંકીનું નામ પણ મંત્રીઓની યાદીમાં છે.

5. કુંવરજી ભાઈ બાવળિયા: જસદણના ધારાસભ્ય કુંવરજીનો પણ ભૂપેન્દ્ર પટેલ મંત્રીમંડળમાં સમાવેશ થયો છે.

6. જગદીશ પંચાલ : નિકોલથી ધારાસભ્ય તરીકે ચૂંટાયેલા જગદીશ પંચાલને પણ મંત્રી બનાવી શકાય છે. જગદીશ પાછલી સરકારમાં મંત્રી પણ હતા.

સંભવિત મંત્રીઓમાં ખંભાળીયાના ધારાસભ્ય મુળુભાઈ બેરા, જામનગર ગ્રામ્યના ધારાસભ્ય રાઘવજી પટેલ, સિદ્ધપુરના ધારાસભ્ય બળવંતસિંહ રાજપૂત, રાજકોટ ગ્રામ્યના ધારાસભ્ય ભાનુબેન બાબરીયા, સંતરામપુરના ધારાસભ્ય કુબેરભાઈ ડીંડોર, દેવગઢ બારિયાના ધારાસભ્ય બચ્ચુ ખાબર, ઓલપાડના ધારાસભ્ય મુકેશ પટેલ, મોડાસાના ધારાસભ્ય ભીખુભાઈ પરમારનો સમાવેશ થાય છે. કામરેજના ધારાસભ્ય પ્રફુલ પાનસેરિયા અને માંડવીના ધારાસભ્ય કુંવરજી હળપતિનું નામ પણ લેવામાં આવ્યું છે. આમાંના મોટાભાગના લોકોનો સમાવેશ થાય છે જેઓ અગાઉની સરકારમાં પણ મંત્રી હતા.

ગુજરાત વિધાનસભાની ચૂંટણીના પરિણામોમાં ભારતીય જનતા પાર્ટી (ભાજપ)એ એક નવો રેકોર્ડ બનાવ્યો છે. 182 સભ્યોની ગુજરાત વિધાનસભામાં ભાજપને 156 બેઠકો મળી છે. કોંગ્રેસને સૌથી વધુ નુકસાન થયું છે. કોંગ્રેસ 77 સીટોથી ઘટીને 17 પર આવી ગઈ છે. એટલે કે કોંગ્રેસને 60 બેઠકો ગુમાવવી પડી હતી. આ વખતે સરકાર બનાવવાનો દાવો કરનાર આમ આદમી પાર્ટીના માત્ર પાંચ ઉમેદવારો જ ચૂંટણી જીતી શક્યા હતા. ત્રણ બેઠકો અપક્ષ ઉમેદવારોને ફાળે ગઈ હતી, જ્યારે સમાજવાદી પાર્ટી (સપા)એ રાજ્યની એક બેઠક જીતી હતી.

૧૯૬૦ માં રાજ્યની શરૂઆતથી ગુજરાતમાં ભાજપનો સતત સાતમો વિધાનસભા ચૂંટણી વિજય છે. ગુજરાતના સીએમ ભૂપેન્દ્ર પટેલે પણ ઈતિહાસ રચ્યો હતો. તેઓ ઘાટલોડિયા બેઠક પર આશરે 1,92,000 મતોના વિક્રમી માર્જિનથી જીત્યા હતા. ગત 2017માં યોજાયેલી વિધાનસભાની ચૂંટણીમાં ભાજપે 99 બેઠકો, કોંગ્રેસને 77 અને એનસીપી, બીટીપી અને અપક્ષ ઉમેદવારોને અનુક્રમે 1, 2 અને 3 બેઠકો મળી હતી.