ગુલબર્ગ હત્યાકાંડમાં બચી ગયેલા ફિરોઝખાને ઝૂકાવ્યું ચૂંટણી જંગમાં

  • ગુલબર્ગ હત્યાકાંડમાં બચી ગયેલા ફિરોઝખાને ઝૂકાવ્યું ચૂંટણી જંગમાં

અમદાવાદ તા,12
2002માં હિચકારા ગોધરાકંડ બાદ રાજ્યભરમાં ફાટી નીકળેલા તોફાનમાં ગુલબર્ગ સોસાયટી સામૂહિક હત્યાકાંડમાં બચી ગયેલ ફિરોઝખાન પઠાણ હવે આગામી લોકસભા ચૂંટણીમાં ગાંધીનગરથી ભાજપ પ્રમુખ અમિત શાહ વિરુદ્ધ ચૂંટણીના મેદાનમાં ઝંપલાવશે. આ હાઈપ્રોફાઇલ બેઠક હંમેશાથી ભાજપનો ગઢ રહી છે અહીંથી અડવાણી વાજપેયી સહિતના દિગ્ગજ નેતાઓ લડ્યા છે. તેમજ એક સમયના સુપરસ્ટાર રાજેશ ખન્ના પણ અહીંથી ચૂંટણી લડ્યા હતા.
ગુલબર્ગ કાંડમાં પોતાના પરિવારના 10 સભ્યો ગુમાવી દેનાર પઠાણે(45) કહ્યું કે, ‘આ ચૂંટણીમાં ગાંધીનગરથી ઉમેદવારી નોંધાવીને હું એ દર્શાવવા માગુ છું કે હજુ આટલા વર્ષો પછી પણ ગુલબર્ગ સોસાયટીના પીડિતોને ન્યાય નથી મળ્યો.’
આ પહેલા 2014માં ફિરોઝખાન પઠાણે ગુલબર્ગ હત્યાકાંડના કેસને લઈને વિવિધ આંદોલન કરનાર માનવાધિકાર એક્ટિવિસ્ટ તીસ્તા સેતલવાડ વિરુદ્ધ પણ ફરિયાદ નોંધાવી હતી. તેમણે કહ્યું હતું કે હત્યાકાંડના પીડિતોના નામે અને ગુલબર્ગ સોસાયટી ડેવલોપમેન્ટ માટે તિસ્તા સેતલવાડે મેળવેલા કરોડો રુપિયાની ઉચાપત કરી છે. ઉલ્લેખનીય છે કે 2002ના તોફાનો બાદ ગુલબર્ગ સોસાયટીના પીડિતોની ન્યાયની લડત માટે તિસ્તા સેતલવાડની સંસ્થા સિટિઝન ફોર જસ્ટિસ એન્ડ પીસ દ્વારા કાયદાકીય મદદ આપવામાં આવી હતી.
પઠાણે વધુમાં કહ્યું કે, ‘હું ગુજરાતમાં રહેતા દરેક મુસ્લીમ સમાજના લોકોને કહેવા માગુ છું કે આપણે વિધાનસભા અને લોકસભા બંનેમાં ગુજરાતમાંથી વધુ મુસ્લીમ પ્રતિનિધિત્વ મળે તે માટે માગણી કરવી જોઈએ. કોંગ્રેસે ગુજરાતમાંથી ફક્ત એક જ મુસ્લીમને લોકસભાની બેઠક આપી છે.
જો હું સાંસદ બનીશ તો ફરીથી ગુલબર્ગ સોસાયટીમા કાયમ માટે વસવાટ કરવા જઈશ.
ગુલબર્ગ સોસાયટી હત્યાકાંડ કેસ ગોધરા અને ગોધરાકાંડ બાદ ફાટી નીકળેલા તોફાનો પૈકીના 10 મુખ્ય કેસો પૈકી એક છે. જેની તપસા સુપ્રીમ કોર્ટની દેખરેખમાં સ્પે. ઇન્વેસ્ટિગેશન ટીમને સોંપવામાં આવી હતી. 2016માં જ આ મામલે ખાસ કોર્ટે પોતાનો ચુકાદો આપ્યો હતો. જેમાં 24 લોકોને ગુનેગાર ઠેરવ્યા હતા જ્યારે 36 લોકોને નિર્દોષ જાહેર કર્યા હતા. જ્યારે 24 ગુનેગાર પૈકી 11ને હત્યાના દોષી તો 13 વ્યક્તિઓને નાના ગુનાઓમાં દોષી ગણાવ્યા હતા. આ હત્યાકાંડમાં પઠાણના માતા, દાદી, કાકી, ભાઈ, ભાભી, ભત્રીજા-ભત્રીજી ગુમાવ્યા હતા. તેમનો બંગલ પૂર્વ સાંસદ અને હત્યાકાંડમાં જેમની હત્યા થઈ હતી તેવા અહેસાન જાફરીની ઘરની બાજુમાં જ આવેલ છે.