CoA બેઠકમાં શ્રીસંતના પ્રતિબંધ મામલે કરવામાં આવશે ચર્ચાઃ વિનોદ રાયMarch 15, 2019

નવી દિલ્હીઃ ભારતીય ક્રિકેટના મામલા પર નજર રાખી રહેલી પ્રશાસકોની સમિતિ (CoA)આગામી બેઠકમાં એસ. શ્રીસંત પર લાગેલા આજીવન પ્રતિબંધની ચર્ચા કરશે કારણ કે સુપ્રીમ કોર્ટે બીસીસીઆઈને ફાસ્ટ બોલરની સજા પર પુનર્વિચાર કરવાનું કહ્યું છે. જસ્ટિસ અશોક ભૂષણ અને જસ્ટિસ કેએમ જોસેફની બેન્ચે કહ્યું કે, બીસીસીઆઈની અનુશાસનાત્મક સમિતિ શ્રીસંતને આપેલી સજાના સમયગાળા પર 3 મહિનાની અંદર પુનર્વિચાર કરી શકે છે.  બેન્ચે સ્પષ્ટ કર્યું કે પૂર્વ ક્રિકેટરને સજા આપતા પહેલા તેના સમયગાળા વિશે શ્રીસંતનો પક્ષ સાંભળવો જોઈએ. સીઓએ પ્રમુખ વિનોદ રાયે કહ્યું કે, હાં, મેં સુપ્રીમ કોર્ટના આદેશ વિશે સાંભળ્યું છે. અમારે આદેશની કોપી પ્રાપ્ત કરવી પડશે. અમે ચોક્કસપણે સીઓએની બેઠકમાં આ મુદ્દા વિશે ચર્ચા કરીશું.  સીઓએ 18 માર્ચે યોજાનારી બેઠકમાં આંતરરાષ્ટ્રીય ક્રિકેટ કાઉન્સિલ (ICC) અધિકારીઓની સાથે બોર્ડની ડોપિંગ વિરોધી નીતિ પર ચર્ચા કરશે. આ દિવસે શ્રીસંતના પ્રતિબંધનો મુદ્દો પણ ઉઠી શકે છે. બીસીસીઆઈની પાસે હવે જસ્ટિસ (નિવૃત) ડીકે જૈનના રૂપમાં નવા લોકપાલ અને મધ્યસ્થ પીએસ નરસિમ્હા છે, જેથી આશા છે કે નિર્ણય ઝડપથી આવશે.