રાહુલની ઇફતાર પાર્ટીમાં મોદીની ફિટનેસની મજાક

નવીદિલ્હી તા.14
કોંગ્રેસ અધ્યક્ષ રાહુલ ગાંધીએ બુધવારે ઇફ્તાર પાર્ટીનું આયોજન કર્યું. જેમાં વડાપ્રધાન મોદીના ફિટનેસના વીડિયોનો ભારે મજાક ઉડ્યો હતો. અત્રે ઉલ્લેખનીય છે કે, વડાપ્રધાન મોદીએ ફિટનેસ ચેલેન્જ હેઠળ પોતાનો વીડિયો જાહેર કર્યો હતો અને તેના પર રાહુલની પાર્ટીમાં ચર્ચા દરમિયાન ઘણા નેતાઓએ વ્યંગાત્મક રીતે હસતા જોવા મળ્યા હતા. ઇફતાર પાર્ટીના પ્રસંગે રાહુલ ગાંધીએ વિપક્ષી દળોના ઘણા નેતાઓને આમંત્રીત કર્યા હતા. જેમાં માકપા મહાસચિવ સીતારામ યેચૂરી,

ડીએમકે સાંસદ કનિમોઝી, તૃણમુલ કોંગ્રેસના દિનેશ ત્રિવેદી, બસપાના સતીશ ચંદ્ર મિશ્રા, એનસીપીના ડીપી ત્રિપાઠી, જદયુનાં પૂર્વ નેતા શરદ યાદવ વગેરેનો સમાવેશ થાય છે
આ દરમિયાન કેટલાક નેતાઓ રાહુલ ગાંધીની સાથે બેઠેલા હતા. રાહુલે પોતાના ટેબલ પર બેઠેલા એક મેહમાનને પુછ્યું કે, તમે વડાપ્રધાન મોદીનો ફિટનેસ વીડિયો જોયો, ત્યાર બાદ થોડુ અટકીને તેઓ પોતે જ બોલ્યા, આ વીડિયો ખુબ જ વિચિત્ર છે. આ કોમેન્ટ પર દિનેશ ત્રિવેદી અને સીતારામ યેચુરી જોરજોરથી હસવા લાગ્યા હતા. ત્યાર બાદ રાહુલે સીતારામ યેચુરીને હસતા હસતા પુછ્યું કે, તમે પણ ફિટનેસ વીડિયો બનાવ્યો, જે અંગે યેચુરી ફરીથી જોરજોરથી હસવા લાગ્યા હતા.
અત્રે ઉલ્લેખનીય છે કે, રમત ગમત મંત્રી રાજ્યવર્ધન સિંહ રાઠોડ દ્વારા ચાલુ કરાયેલ ફિટનેસ ચેલેન્જને મોદીએ પુરૂ કર્યું હતું. જો કે તેમની ફિટનેસ સિદ્ધ કરવાની પદ્ધતી ઘણી જ અલગ હતી. આ દરમિયાન ન માત્ર તેમણે યોગ કર્યા પરંતુ પગે ચાલવાની ઘણી પદ્ધતી પણ લોકો સમક્ષ મુકી હતી.
21 જૂને મોદી યોગા-ડે મનાવશે દેહરાદૂનમાં દહેરાદૂન,તા.14
21 જૂન આંતરરાષ્ટ્રીય યોગ દિવસના અવસરે ઉત્તરાખંડની રાજધાની દેહરાદૂનમાં વડાપ્રધાન મોદી 50 હજાર લોકો સાથે યોગ કરશે. આ કાર્યક્રમ દેહરાદૂનના ફોરેસ્ટ રિસર્ચ ઇન્સ્ટીટ્યુટમાં આયોજીત કરવામાં આવશે.
મુખ્ય કાર્યક્રમ 21 જુન સવારે 6 વાગ્યા થી 8 વાગ્યા સુધી આયોજીત થશે. જેને લઇને દેહરાદૂનમાં તડામાર તૈયારીઓ કરવામાં આવી રહી છે. વડાપ્રધાન આ કાર્યક્રમમાં સામેલ થવાના હોવાથી આ કાર્યક્રમને સફળ બનાવવા માટે વિવિધ સંસ્થાઓનો સહયોગ લેવામાં આવી રહ્યો છે. તેમજ આ કાર્યક્રમમાં સામેલ થવા ઓનલાઇન અને ઓફલાઇન રજીસ્ટ્રેશન શરૂ કરી દેવામાં આવ્યું છે. તેમજ સ્થળ પર લોકોને પહોંચાડવા માટે મોટી સંખ્યામાં બસોની પણ વ્યવસ્થા કરવામાં આવી છે. આ કાર્યક્રમને લઇને ઉત્તરાખંડ સરકાર કોઇ કસર છોડવા નથી માંગતી.