જો તમે પણ આ રીતે ફોન લોક કરતાં હોવ તો થઈ જાઓ સાવધાન

શું તમને પણ લાગે છે કે ફેસને સ્માર્ટફોનનો પાસવર્ડ બનાવવો એ સૌથી સરળ રીત છે? મોબાઈલનો ફ્રન્ટ કેમેરો તમારી ઓળખ કરી દે અને લોક ખુલી જાય તેને સલામત માનો છો? આ પદ્ધતિમાં ફોન તો તરત જ અનલોક થઈ જાય છે પરંતુ સ્માર્ટફોન બનાવનાર કંપનીઓએ સ્વીકાર્યું છે કે ફેસ રેકોગ્નાઈઝેશન પાસવર્ડ કરતાં ફિંગરપ્રિન્ટ લોક અને ટાઈપિંગ પાસવર્ડ વધારે સુરક્ષિત છે.
સેમસંગ એસ9 સાથે ચેતવણી આપવામાં આવે છે કે,’ફેસ ડિટેક્શન પ્રણાલી કરતાં વધારે સુરક્ષિત આઈઆરઆઈએસ સ્કેન, પેટર્ન અને પિન પાસવર્ડ છે. તમારા ફોનને તમારા જેવો ચહેરો ધરાવતી કોઈપણ વ્યક્તિ ખોલી શકે છે.’ તો અન્ય કંપની શાઓમીએ પણ ‘રેડમી નોટ 5’ પર આવી જ ચેતવણી લખી છે. વન પ્લસ પણ આ પ્રકારના ફીચરને સુવિધા માને છે સુરક્ષિત નહિ. ‘કેસ્પરસ્કાઈ લેબ્સ’ અનુસાર,’સસ્તા ફોનના સેન્સર માત્ર ફ્રન્ટ કેમેરા પર આધાર રાખે છે. જેમાં અત્યાધુનિક અલ્ગોરિધમ નથી હોતાં. આ જ રીતે સામાન્ય આઈઆર સેન્સર અથવા ડોટ પ્રોજેક્ટરવાળા 2ડી કેમેરાને સરળતાથી મૂર્ખ બનાવી શકાય છે. આ એપ્લિકેશનને સોશિયલ મીડિયાનો ફોટો અથવા સામાન્ય તસવીરથી પણ અનલોક કરી શકાય છે.’
ફેસથી મોબાઈલની સ્ક્રીનને અનલોક કરવાનું ફીચર પહેલીવાર 2011માં એન્ડ્રોઈડ 4.0 સાથે આવ્યું હતું. જોકે, આ પ્રક્રિયા ખૂબ જ ધીમી હોવાના કારણે તે અસફળ રહ્યું હતું.
માર્ચ,2017માં ફરીથી સેમસંગ
ગેલેક્સી એસ8માં આ ફીચર લોન્ચ થયું. જોકે, સપ્ટેમ્બર 2017માં એપલે આ ફીચર આપ્યું ત્યારથી તેની લોકપ્રિયતા વધી હતી.
એપલનું ફેસ આઈડી ચહેરાના 30 હજાર પિક્સલ્સને ઓળખે છે આ સાથે જ ખાસ 3મ મોડલ તૈયાર કરે છે. જે ફોનની ચીપમાં સેવ થઈ જાય છે. જ્યારે યુઝર્સ ફોનને અનલોક કરવા ઈચ્છે છે ત્યારે ઈન્ફ્રારેડ કેમેરો આ પિક્સલ્સને ઓળખે છે. પેટર્નને એપ્રૂવ કરે છે અને પછી જ લોક ખુલી શકે છે.