ભારતના ભાગેડુ આરોપીઓ માટે બ્રિટન બન્યું સ્વર્ગ


નવી દિલ્હી: નીરવ મોદી, લલિત મોદી, વિજય માલ્યા બસ આ ત્રણ જ ઉદાહરણ નથી, જેમણે ભારતમાંથી નાસીને બ્રિટનમાં શરણ લીધી હોય. વાસ્તવમાં આ લિસ્ટ બહુ લાંબું છે. 2013થી અત્યાર સુધી ભારત છોડીને નાસી ગયેલા 5500થી વધુ લોકોએ બ્રિટનમાં રાજકીય શરણ માટે અરજી કરી છે. ખાસ વાત એ છે કે, તેમાંથી તમામ અપરાધીઓ નથી. હવે સવાલ એ છે કે, આખરે ભારતીયો માટે લંડન જ સીધો અને સરળ રસ્તો કેમ બની રહ્યું છે? યુરોપિયન ક્ધવેન્શન ઑન હ્યુમન રાઇટ્સ (ઈસીએચઆર) પર યુકેએ હસ્તાક્ષર કર્યા છે અને તે અંતર્ગત યુકેના ન્યાયતંત્રને એવું લાગે છે કે, કોઈ વ્યક્તિને પ્રત્યાર્પિત કરવામાં આવે તો તેને પરેશાન કરવામાં આવી શકે છે અથવા તો મોતની સજા આપવામાં આવી શકે છે કે પછી રાજકીય કારણોથી વ્યક્તિનું પ્રત્યર્પણ કરવામાં આવ્યું હોય તો તે પ્રત્યર્પણની અપીલને ફગાવી શકે છે. કેટલાક ચર્ચિત ભારતીયો દ્વારા બ્રિટનમાં શરણ માગવા પાછળનું મુખ્ય કારણ નાણાં સાથે સંકળાયેલું છે. મ્યુઝિક ડિરેક્ટર નદીમ સૈફી હોય, ભૂતપૂર્વ આઈપીએલ કમિશનર લલિત મોદી, કિંગફિશર એરલાઇન્સનો વિજય માલ્યા કે પછી હીરાનો કારોબારી નીરવ મોદી હોય, આ તમામ ભારતીયો બેંકિંગ સિસ્ટમમાંથી લગભગ બે અબજ ડોલરથી વધુનું ફ્રોડ કરવાના આરોપી છે. અહેવાલ મુજબ, અબજપતિ હીરા કારોબારી નીરવ મોદીએ હાલમાં જ યુકેમાં રાજકીય શરણ માગી છે. તેણે દાવો કર્યો છે કે, જો તે ભારત પાછો ફરશે તો તેનું રાજકીય ઉત્પીડન થઈ શકે છે. ભારત અને બ્રિટને 1993માં પ્રત્યર્પણ સંધિ પર હસ્તાક્ષર કર્યા હતા, પરંતુ તેની પર કોઈ ડેવલપમેન્ટ થયું નથી. ભારતે 2008માં મર્ડર કેસમાં આરોપી યુકેના નાગરિક મનિન્દર સિંહ કોહલીને પ્રત્યાર્પિત કર્યો હતો, પણ યુકેએ ભારતના પ્રત્યર્પણની તમામ અરજીઓ રોકી રાખી છે. તેમાં બ્રિટિશ નાગરિક રેમન્ડ વર્લેનું નામ પણ સામેલ છે. ગોવામાં તે બાળ યોનશોષણનો આરોપી છે. જો નીરવ મોદીની અરજીને મંજૂર કરવામાં આવે તો તે નિશ્ચિંત થઈને ઓછામાં ઓછાં પાંચ વર્ષ સુધી ત્યાં રહી શકે છે. ત્યાર બાદ તે તેને રિન્યુ પણ કરી શકે છે.