આ વરિષ્ઠ નાગરીકો હંમેશા વોટ્સએપ પર જ રહે છે!

ટેક્નોલોજીના આ યુગમાં યુવાનો તો ટેક્નો સેવી બની જ રહ્યા છે પણ તમને વિશ્ર્વાસ નહીં આવે કે આ દોડમાં દાદા-દાદી પણ પાછળ નથી. કેટલાક વરિષ્ઠ નાગરિકો એ હદે ટેક્નોલોજીનો ઉપયોગ કરી રહ્યા છે કે તેઓ યુવાનોને પણ પાછળ છોડી દે તેમ છે. તો આવો જાણીએ આવા જ કેટલાક વરિષ્ઠ નાગરિકો વિશે જેઓ ખુલ્લા હાથે ટેકનોલોજીનો ઉપયોગ કરી રહ્યા છે.
79 વર્ષના રિના લેહરી ભરપૂર રીતે ટેક્નોલોજીનો ઉપયોગ કરે છે. તેમની પાસે 2 મોબાઈલ ફોન અને 2 કોમ્પ્યુટર ડેસ્કટોપ છે. કોલકાત્તામાં રહેતાં આ દાદી પોતાનો મોટાભાગનો સમય વોટ્સએપ પર વિતાવે છે. આ દાદી કહે છે કે, હું જૂના પરિચિતો સાથે સંપર્કમાં રહી શકું છું અને જૂની યાદોને તાજી કરી શકી છું ઉપરાંત નવા મિત્રો પણ બનાવી શકું છું.
83 વર્ષના રિટાયર્ડ સિવિલ એન્જિનિયર રમેશ દેસાઈએ કહ્યું કે તેઓ દિવસમાં 2થી 3 કલાક ફેસબુક પર વિતાવે છે. તેમણે કહ્યું કે, હું મારો વધુ સમય વેડફતો હોઉ તેવું મને નથી લાગી રહ્યું. રિટાયરમેન્ટ પછી તમારી પાસે ઘણો સમય રહેતો હોય છે. સમાજ સાથે જોડાઈ રહેવા માટે તમારે નવા રસ્તાઓ શોધવા પડે. ફેસબુકનો સૌથી મોટો ફાયદો એ છે કે તમે ઘરે બેસીને જ લોકો સાથે કનેક્ટ થઈ શકો છો.
ઈંઅખઅઈં (ઈન્ટરનેટ એન્ડ મોબાઈલ એસોસિએશન ઑફ ઈન્ડિયા)એ 2017માં કરેલા એક અભ્યાસ મુજબ ભારતમાં 45 વર્ષથી વધુ ઉંમરના એવા લોકોની વસ્તી વધુ છે જે મોબાઈલ ડેટા અને વોઈસ કોલ્સ માટેનું સૌથી વધુ બિલ ચૂકવી રહ્યા હોય. રિના લેહરી કહે છે કે વોટ્સએપનો ઉપયોગ કરવાથી મારું એકાંત દૂર થાય છે તેથી કહી શકું કે આ મારા માટે સમયનો બગાડ નથી.
85 વર્ષના પૂર્વ સીઈઓ બીએમ આહલુવાલિયાને મોબાઈલનો વધુ ઉપયોગ કરવાની આદત હોવાના કારણે ક્યારેક પરિજનોનો સામનો કરવો પડી રહ્યો છે. બીએમ આહલુવાલિયાએ કહ્યું કે, ‘તેઓ મારો ફોન ક્યાંક ફેંકી દેવા માગે છે.’ આહલુવાલિયા દરરોજ 4થી 5 કલાક મોબાઈલ ફોન પર વિતાવે છે. તેમણે કહ્યું કે હું દિવસમાં બેથી ત્રણ કલાક વોટ્સએપ પર વિતાવું છું ઉપરાંત ઈમેઇલ અને ફેસબુક પર પણ વધારે સમય પસાર કરું છું.
71 વર્ષના શોભના જયસિંહે સ્વીકાર્યું કે તેઓ દિવસમાં 8 કલાક પોતાના ફોનમાં સમય પસાર કરે છે, તેમને ફોન વિના એકાંત અનુભવાય છે.
મારા પતિ અને દીકરો હંમેશા કહેતા રહે છે કે હું ક્યારેય ફોનને એકલો ન મૂકી શકું. છેલ્લા કેટલાક વર્ષોમાં શોભના જયસિંહની જેમ ટેક્નોલોજીનો ભરપૂર ઉપયોગ કરતા વરિષ્ઠ નાગરિકોમાં વધારો થયો છે. શોભા જયસિંહે કહ્યું કે શરૂઆતમાં વોટ્સએપ પર હું અમુક લોકો સાથે જ વાતચીત કરતી હતી પણ હવે મારી પાસે બે સત્સંગ ગ્રુપ, એક ફેમિલી ગ્રુપ અને એક કિટી પાર્ટી ગ્રુપ છે.