આઈફોનની ડિઝાઈન ચોરી કરવા બદલ સેમસંગને થયો રૂ.3600 કરોડનો દંડ

એપલ અને સેમસંગ વચ્ચે ડિઝાઈન ચોરીને લઈને ચાલી રહેલા 7 વર્ષ જૂના કેસનો ચુકાદો આવી ગયો છે. જેમાં કેલિફોર્નિયાની એક કોર્ટે એપલ કંપનીના આઈફોનની ડિઝાઈન ચોરી કરવાના મામલામાં સેમસંગ કંપનીને તગડો ઝાટકો આપ્યો છે. કોર્ટે સેમસંગને આદેશ આપ્યો છે કે ડિઝાઈન
કોપી કરવા મામલે તે એપલને 3600 કરોડનું વળતર ચૂકવે.
બંને કંપનીઓ વચ્ચે 2011થી આ વિવાદ ચાલી રહ્યો હતો. આ મામલે એપલે કેલિફોર્નિયાની કંપનીમાં કેસ દાખલ કરાવ્યો હતો. એક રિપોર્ટ મુજબ 2012માં થયેલ સુનાવણી દરમિયાન સેમસંગને કોપી ચોરી કરવા બદલ ગુનેગાર ગણવામાં આવી અને એપલને એક અબજ ડોલરનું વળતર ચૂકવવા માટે આદેશ આપ્યો હતો પણ બાદમાં થયેલી સુનાવણી દરમિયાન આ રકમ ઘટાડી દેવામાં આવી. યુએસ પેટન્ટ એક્ટ અંતર્ગત પેટન્ટના ઉલ્લંઘન કરવા પર તે ઉત્પાદનથી થયેલા કુલ લાભની રકમ આપવી પડી શકે છે. 2015માં સેમસંગને 1 અબજ ડોલર રૂપિયાનો દંડ ચૂકવવા માટે આદેશ કરવામાં આવ્યો હતો, ત્યારે સેમસંગના વકીલોએ વળતરની રકમ 1 અબજ ડોલરથી ઘટાડીને 40 કરોડ ડોલર કરવા યુએસ સુપ્રીમ કોર્ટમાં અરજી કરી હતી.
સેન જોંસમાં નોર્થન કેલિફોર્નિયા યુએસ ડિસ્ટ્રિક્ટ કોર્ટની એક જ્યૂરીએ વળતરની
રકમ નક્કી કરવા માટે પાંચ દિવસનો સમય લીધો હતો.
આ મામલામાં આરોપ છે કે સેમસંગના એન્ડ્રોઈડ મોબાઈલમાં આઈફોનની પેટન્ટનો ઉપયોગ કરવામાં આવ્યો છે. એપલે પોતાના નિવેદનમાં કહ્યું હતું કે અમે જ્યૂરીનો આભાર વ્યક્ત કરીએ છીએ જેમણે પોતાના ફેસલામાં સેમસંગને જવાબદાર સમજી.
વધુમાં એપલ કંપનીએ કહ્યં કે આ મામલો પૈસાથી ક્યાંય વધુ મહત્વપૂર્ણ છે. આઈફોનની સાથે સ્માર્ટફોનમાં ક્રાંતિ આવી હતી અને આ હકિકત છે કે સેમસંગે ખોટી રીતે અમારી ડિઝાઈન કોપી કરી હતી. મહત્વપૂર્ણ છે કે એપલમાં સતત સખત મહેનત કરતા અને સંશોધનો કરતા લોકોને અમે રક્ષણ આપતા રહેશું. અગાઉ આવા જ એક કેસમાં એપલ કંપનીએ નોકિયાને 200 મિલિયન ડોલર ચૂકવવા પડ્યા હતા.
ક્લોઝિંગ આર્ગ્યુમેન્ટ વખતે સેમસંગના વકીલ જોહ્ન ક્યુને કહ્યું કે સેમસંગ એમ નથી કહી રહ્યું કે પ્રોફિટ આપવાની કોઈ જરૂર નથી. એ માત્ર એટલું જ કહી રહી છે કે આ ફોનમાંથી થયેલ તમામ નફો ન આપી શકાય. એપલે દાવો કર્યો હતો કે આ તેનો એક મહત્વપૂર્ણ પ્રોજેક્ટ હતો અને સેમસંગે ડિઝાઈન ચોરી કરી હોવાના કારણે કંપનીને નુકસાન થયું છે. ઉલ્લેખનીય છે કે આ કેસ થયા બાદથી સેમસંગે ચોરી કરેલ પેટન્ટવાળો ફોન વેચવાનું બંધ કરી દીધું છે.
આ કેસ મુજબ કુલ ત્રણ પેટન્ટ ડિઝાઈનની ચોરી કરવામાં આવી હતી જેમાં આઈફોનનો રાઉન્ડેડ કોર્નર અને બેઝલ ઉપરાંત સ્ક્રીનની એપ લેઆઉટનો પણ સમાવેશ થાય છે ‘બાઉન્સ બેક’ તથા ‘ટેપ ટૂ ઝૂમ’ ફંક્શન પણ ચોરી કરવામાં આવ્યાં હતાં. સાત વર્ષ પહેલાં આ કેસ થયો હતો.
ટ્રાયલમાં સેમસંગને ગુનેગાર માનવામાં આવી હતી અને ચોરી કરેલા ફીચર્સ આખો નફો જપ્ત કરવા લાયક છે કે નહીં તે અંગે દલીલો થઈ હતી.
આ કેસમાં ચોરીની પેટન્ટવાળા ફોનથી થયેલો તમામ નફો જપ્ત કરી લેવાના કોર્ટના આદેશને સેમસંગ દ્વારા પડકારવામાં આવ્યો હતો. બાદમાં આ કેસ 2016માં યુએસ સુપ્રીમ કોર્ટમાં આવ્યો હતો અને એમ કહીને કેસને ફરી નીચલી અદાલતમાં મોકલી આપવામાં આવ્યો હતો કે ડિઝાઈન કે અમુક ઘટકો ચોરી કરવા બદલ આખો નફો જપ્ત કરવાની કોઈ જરૂર નથી હોતી.
ગૂગલ, ડેલ, ફેસબુક સહિતના આઈટી જાયન્ટ્સની મદદથી સેમસંગને દંડની રકમ ઘટાડવામાં સફળતા મળી, જેમણે દાવો કર્યો કે ડિઝાઈન ઉલ્લંઘન પર સખતાઈથ કરવામાં આવશે તો ભવિષ્યમાં આવા કેસમાં વધારો થઈ શકે છે. જ્યારે ફેશન અને મેન્યુફેક્ચરિંગની દિગ્ગજ કંપનીઓ અને ડિઝાઈન પ્રોફેશનલ્સ દ્વારા એફલને સપોર્ટ કરવામાં આવ્યો હતો.