રેપ પીડિતાને ન્યાય અપાવવા ગુજરાતમાં ઠેર-ઠેર રેલી

  • રેપ પીડિતાને ન્યાય અપાવવા ગુજરાતમાં ઠેર-ઠેર રેલી

અમદાવાદ, સુરત, રાજકોટ અને જૂનાગઢમાં પણ કેન્ડલ માર્ચ
અમદાવાદની રેલીમાં હાર્દિક પટેલ પણ જોડાયા
અમદાવાદ તા.16
દેશભરમાં દિવસેને દિવસે દુષ્કર્મની ઘટનાઓમાં સતત વધારો થઇ રહ્યો છે. જમ્મુ અને કાશ્મીરના કઠુઆમાં, ઉત્તર પ્રદેશના ઉન્નાવ અને ગુજરાતના સુરતમાં બાળકી સાથે થયેલા બળાત્કારના વિરોધમાં ઠેર-ઠેર લોકોએ અવાજ ઉઠાવ્યો છે. દુષ્કર્મ પીડિતાઓના ન્યાય માટે રાજ્યભરમાં લોકો રેલી કાઢી રહ્યા છે.
કઠુઆમાં 8 વર્ષીય બાળકીને મંદિરમાં બંદી બનાવી તેના પર દુષ્કર્મ આચર્યા બાદ હત્યા કરી દેવામાં આવી હતી, રવિવારે દરિયાપુર વિસ્તારના લોકોએ રેલી કાઢીને આ ઘટનાનો વિરોધ કર્યો હતો. જ્યારે બીજા એક કેસમાં ઉત્તર પ્રદેશમાં ભાજપના એમએલએ કુલદિપ સિંહ સેંગર એક છોકરી પર દુષ્કર્મ આચર્યું હતું, શહેરની છોકરીઓના એક ગ્રુપે માર્ચ યોજી આ ઘટનાનો વિરોધ કર્યો હતો. દરિયાપૂરમાં ઘટનાનો વિરોધ કરી રહેલી એક છોકરીએ કહ્યું કે, છોકરીનો રેપ એ ઘોર અપરાધ છે અને માત્ર 8 વર્ષની જ બાળકી હોય તેનો રેપ કરવો માનવીય કલ્પનાની પણ બહાર છે.
નિકોલ વિસ્તારમાં લોકોએ કેન્ડલ માર્ચ યોજી તાજેતરમાં થયેલી દુષ્કર્મની શરમજનક ઘટનાઓનો વિરોધ કર્યો હતો. જેમાં પાટીદાર અનામત આંદોલન સમિતિના નેતા હાર્દિક પટેલ પણ જોડાયો હતો. હાર્દિકે કહ્યું કે કઠુઆની 8 વર્ષીય બાળકીને ન્યાય અપાવવા માટે હું લડીશ. અન્ય દુષ્કર્મ પીડિતોને પણ ન્યાય અપાવવા માટે હું લડીશ. આવી ક્રૂર ઘટનાઓ પાછળ જે કોઇપણ જવાબદાર છે તેમની સામે કેસ નોંધાવવો જોઇએ અને તેમને સજા થવી જોઇએ. અમદાવાદના પાસ ક્ધવીનર જયેશ પટેલે કહ્યું કે સુરત, ઉન્નાવ અને કઠુઆની દુષ્કર્મ પીડિતોને ન્યાય અપાવવા માટે તેઓ લડશે. જો સરકાર ઝડપથી કાર્યવાહી નહીં કરે તો અમે ટૂંક સમયમાં જ રાષ્ટ્રવ્યાપી આંદોલન છેડીશું. સુરત, જૂનાગઢ અને રાજકોટ જિલ્લાઓમાં પણ દુષ્કર્મના વિરોધમાં કેન્ડલ માર્ચ યોજાઇ રહી છે.
અમદાવાદમાં યોજાનાર પ્રોટેસ્ટમાં જોડાવવા માટે દલિત નેતા જીજ્ઞેશ મેવાણીએ શહેરીજનોને અપીલ કરી. રવિવારે સાંજે રાષ્ટ્રીય દલિત અધિકાર મંચ અને મુસ્લિમ કોમ્યુનિટી મેમ્બર્સ દ્વારા પણ પ્રોટેસ્ટ કરવામા આવ્યું હતું.