ગુજરાતના સાગર કાંઠે ત્સુનામીનો ખતરો


અમદાવાદ તા. 13
ભારતના દરેક રાજ્યોમાં સૌથી મોટી કોસ્ટલાઈન એટલે કે દરિયાકિનારો ગુજરાત પાસે છે. આ માટે જ ગુજરાતે સુનામી જેવી કુદરતી આફત માટે કાયમ તૈયાર રહેવાની જરુર છે. ઉલ્લેખનીય છે કે 28મી નવેમ્બર 1945ના રોજ પાકિસ્તાનના માકરણ કોસ્ટ(બલૂચિસ્તાન)માં ભૂકંપ આવવાને કારણે અરબ સાગરના ઉત્તરભાગમાં અને હિંદ મહાસાગરમાં સુનામી આવી હતી.
સુનામીને કારણે મુંબઈ અને કચ્છમાં અનેક લોકોએ જીવ ગુમાવવા પડ્યા હતા. કેન્દ્રનાં અર્થ સાયન્સ ,મંત્રાલયના પૂર્વ સેક્રેટરી ડોક્ટર શૈલેષ નાયકે જણાવ્યું કે, 1945માં માકરણમાં આવેલી સુનામીની અસર મુંબઈના દરિયાકિનારા સુધી પહોંચી હતી. નાયકે આગળ જણાવ્યું કે, આવી ઘટનાઓ 100 વર્ષમાં એકવાર થાય છે. ગુજરાત સરકારે એક અવેરનેસ પ્રોગ્રામનું આયોજન કરવું જોઈએ અને જ્યારે સુનામીની શક્યતા હોય તેવા સમયમાં શું કરવું જોઈએ અને શું ન કરવું જોઈએ તે વિષે લોકોને જાગૃતિ આપવી જોઈએ.
શૈલેષ નાયકના જણાવ્યા અનુસાર, લોકો સરકારની વોર્નિંગ પર વિશ્વાસ નથી કરતા અને લોકો પાસે ઘણી ઓછી માહિતી હોય છે.
માટે સરકારે અવેરનેસ પ્રોગ્રામનું આયોજન કરવાની અત્યંત જરુર છે. માકરણના દરિયાકિનારે બોયું મુકવામાં આવ્યું છે, જે સુનામી શરુ થયાની 6 મિનિટમાં વોર્નિંગ ઈશ્યુ કરશે. સરકારને આ વોર્નિંગને રિસ્પોન્સ આપવામાં 2 કલાકનો સમય લાગી શકે છે. પ્રાપ્ત માહિતી અનુસાર, 1945માં આવેલી સુનામીને કારણે કચ્છ સહિતના પશ્ચિમ ભારતના દરિયાકિનારાના વિસ્તારો અને ઈરાન, ઓમાનમાં જાનમાલનું ઘણું નુકસાન થયુ હતું. સુનામીને કારણે વર્સોવા(અંધેરી), હાજી અલી(મહાલક્ષ્મી), જુહુ(વિલે પાર્લે) અને દાંડા(ખાર) વગેરે કોસ્ટને અસર થઈ હતી. નાયના જણાવ્યા અનુસાર, 2014થી વાવાઝોડાનો ખતરો ચાર વાર મંડરાઈ ચુક્યો છે. ઓખી પણ ગુજરાતના દરિયાકિનારા સુધી પહોંચી ગઈ હતી.